លោក ង្វៀន សួនហ្វ៊ក នាយករដ្ឋមន្ត្រីវៀតណាម បានថ្លែងនៅក្នុងអង្គប្រជុំជាមួយ ក្រុមប្រឹក្សាគោលនយោបាយរូបិយវត្ថុ និងហិរញ្ញវត្ថុជាតិ ឲ្យបានដឹងថា គោលដៅសំខាន់បំផុតរបស់រដ្ឋាភិបាលវៀតណាម ក្នុងឆ្នាំនេះ គឺទប់ស្កាត់ការរាតត្បាតនៃមេរោគ Covid 19 ធានាឲ្យបាននូវ សុវត្ថិភាព សុខភាព និងជីវិតរបស់ប្រជាជន ហើយនឹងសម្រេចឲ្យបាននូវ កំណើនសេដ្ឋកិច្ច ៦,៨% ទៅតាមការកំណត់របស់ រដ្ឋសភាជាតិ។
នាយករដ្ឋមន្ត្រីវៀតណាម បានបញ្ជាក់ថា នៅពេលនេះ វៀតណាមគ្មានមូលដ្ឋាន ក្នុងការកែសម្រួលគោលដៅ កំណើនសេដ្ឋកិច្ចនោះទេ ហើយលោកបានស្នើដល់ សមាជិកក្រុមប្រឹក្សា ឲ្យបង្ហាញពី ដំណោះស្រាយដ៏សមស្រប ឆ្លើយតបទៅនឹងផលអវិជ្ជមាន ដែលបង្កឡើងដោយមេរោគ Covid 19។
អត្ថបទគួរអាន
យ៉ាងណាក៏ដោយ ការអះអាងរបស់លោក ង្វៀន សួនហ្វ៊ក គឺដើម្បីឆ្លើយតបទៅនឹង ការកែប្រែការព្យាករណ៍របស់ក្រសួងផែនការ និងវិនិយោគវៀតណាម ដែលបានកំណត់ថា កំណើនសេដ្ឋកិច្ចវៀតណាម អាចនឹងធ្លាក់ចុះមកនៅត្រឹម ៦,២៥% បើសិនជាមេរោគ ត្រូវបានទប់ស្កាត់ ក្នុងត្រីមាសទី ១ ឬអាចធ្លាក់ចុះមកនៅត្រឹម ៥,៩៦% បើសិនជាមេរោគនេះ ត្រូវបានគ្រប់គ្រង នៅក្នុងត្រីមាសទី ២។
ក្រៅពីនេះ ក្រុមហ៊ុន Fitch Solutions ក៏បានព្យាករណ៍ទម្លាក់ពី កំណើនសេដ្ឋកិច្ចវៀតណាម មកនៅត្រឹម ៦,៣% ក្នុងឆ្នាំ ២០២០ ដោយសារតែការផ្ទុះឡើងនៃវីរុស Covid 19 បានជះឥទ្ធិពលអវិជ្ជមានដល់ វិស័យសំខាន់ៗជាច្រើន ដូចជា វិស័យឧស្សាហកម្មផលិត ខ្វះខាតវត្ថុធាតុដើម និងពិបាកនាំចេញ ខណៈវិស័យទេសចរណ៍វៀតណាម បាត់បង់ទាំងភ្ញៀវទេសចរចិន ជប៉ុន និងកូរ៉េខាងត្បូងថែមទៀតផង។
សូមជម្រាបថា ក្រសួងផែនការ និងវិនិយោគវៀតណាម បានវិភាគដែរថា វៀតណាម អាចនឹងត្រូវបាត់បង់ចំណូលថវិកាជាតិ ប្រមាណ ១.៨០០ លានដុល្លារអាមេរិក បើសិនជាមេរោគនេះ នៅរីករាលដាលរហូតដល់ដំណាច់ត្រីមាសទី ២ ដែលធ្វើឲ្យចំណូលថវិកាជាតិសរុប សម្រេចបាន ៦៣ពាន់លានដុល្លារអាមេរិក ថយចុះ ១,៦% ធៀបនឹងឆ្នាំ ២០១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
