នៅគ្រាដែល វៀតណាមកំពុងខ្វះវ៉ាក់សាំងចាក់ជូនពលរដ្ឋ គេសង្កេតឃើញថា ករណីឆ្លងនៅក្នុងប្រទេសនេះ ក៏កំពុងហក់ឡើងខ្ពស់ខ្លាំងណាស់ដែរ ពោលគឺមានដល់ទៅជិត ១ម៉ឺនករណីក្នុងមួយថ្ងៃ។ នេះបើយោងតាមការចុះផ្សាយដោយសារព័ត៌មានអន្តរជាតិធំៗជាច្រើន។
ឧបនាយករដ្ឋមន្ត្រី លោក វូ ឌឹកដាម ដែលជាប្រធានក្រុមការងារប្រយុទ្ធនឹងជំងឺឆ្លងរបស់វៀតណាមបានប្រាប់សារព័ត៌មានរ៉យទ័រថា ស្ថានភាពជំងឺកូវីដកំពុងមានភាពតានតឹងកាន់តែខ្លាំងឡើងហើយ! ហើយរដ្ឋាភិបាលក៏កំពុងប្រឈមនឹងកង្វះវ៉ាក់សាំងកូវីដ១៩ចាក់ជូនពលរដ្ឋនៅទូទាំងប្រទេសផងដែរ ។
ទន្ទឹមនេះលោក វូ ឌឹកដាម បន្តថា មូលហេតុនៃការខ្វះវ៉ាក់សាំងចាក់ជូនពលរដ្ឋ ដោយសារបញ្ហាផ្គត់ផ្គង់មានភាពយឺតយ៉ាវ ប៉ុន្ដែ លោកបានប្តេជ្ញាចិត្តថា នឹងធានាឱ្យមានការផ្គត់ផ្គង់វ៉ាក់សាំងសម្រាប់ប្រជាជននៅក្នុងប្រទេសឲ្យបានគ្រប់គ្រាន់តាមតម្រូវការ។ មន្ត្រីជាន់ខ្ពស់របស់វៀតណាមដដែលនេះបន្ថែមថា ក្នុងរយៈពេលប៉ុន្មានខែកន្លងមកនេះ មេដឹកនាំវៀតណាមបានធ្វើការទាក់ទងទូរស័ព្ទប្រហែល ២០ដងទៅកាន់ភាគីបរទេសជាដៃគូ ដើម្បីធានាឱ្យមានការផ្គត់ផ្គង់វ៉ាក់សាំងបន្ថែមទៀត។
អត្ថបទទាក់ទង
ជាមួយគ្នានេះ នាយករដ្ឋមន្ត្រីវៀតណាម លោក ផាម មីញចីង (Pham Minh Chinh) នៅឯកិច្ចប្រជុំគណៈរដ្ឋមន្ត្រីកាលពីថ្ងៃព្រហស្បតិ៍បានជំរុញឱ្យមានការផលិតវ៉ាក់សាំងការពារជំងឺកូវីដក្នុងប្រទេសរបស់ខ្លួនឲ្យបានឆាប់ផងដែរ។
រលកឆ្លងកូវីដនៅប្រទេសវៀតណាមភាគច្រើនលេចចេញឡើងនៅកណ្តាលទីក្រុងហូជីមិញ និង ខេត្តឧស្សាហកម្ម ប៊ិញឌឿង និង ដុងណៃ ខណៈដែលតួលេខកាលពីថ្ងៃសោរ៍សប្ដាហ៍មុននេះ បង្ហាញថា វៀតណាមមានអ្នកឆ្លងដល់ទៅជិត១ម៉ឺននាក់ ត្រឹមរយៈពេល១ថ្ងៃ ដែលជាតួលេខខ្ពស់បំផុតមិនធ្លាប់មាន។
មកទល់ពេលនេះ វៀតណាមទើបតែទទួលបានវ៉ាក់សាំងកូវីដ-១៩សរុប១៩លានដូសប៉ុណ្ណោះ ពីកម្មវិធីកូវ៉ាក់ និងកិច្ចព្រមព្រៀងដែលធ្លាប់មានជាមួយនឹងប្រទេសដៃគូផ្គត់ផ្គង់វ៉ាក់សាំងរបស់ខ្លួន។ ក្នុងនោះ វៀតណាមបានទទួលវ៉ាក់សាំងប្រភេទ AstraZeneca ជាង១១លាន៥សែនដូស, វ៉ក់សាំងSputnik V របស់រុស្ស៊ី ១ម៉ឺន២ពាន់ដូស, វ៉ាក់សាំង Pfizer របស់អាមេរិកជាង៧៤ម៉ឺនដូស និងជាង ៥លានដូសទៀតជាវ៉ាក់សាំង Moderna។ ខណៈវ៉ាក់សាំងដែលបានពីប្រទេសចិន Sinopharm វិញមានជាង១លាន៥សែនដូស។
ក្រៅពីវ៉ាក់សាំង ដែលទទួលបាននេះ វៀតណាមក៏បាននិងកំពុងខិតខំចរចាបញ្ជាទិញវ៉ាក់សាំងជាបន្ដបន្ទាប់ទៀតផងដែរ តួយ៉ាង កាលពីខែមិថុនារដ្ឋាភិបាលវៀតណាម បានយល់ព្រមទិញវ៉ាក់សាំង AstraZeneca បន្ថែម៣០លានដូស ហើយថ្មីៗនេះ ក៏មានផែនការនឹងបញ្ជាទិញវ៉ាក់សាំង Pfizer អាមេរិក២០លានដូសបន្ថែមទៀតផងដែរ។
ក្រសួងសុខាភិបាលវៀតណាមមានផែនការនឹងចាក់វ៉ាក់សាំងជូនពលរដ្ឋឲ្យបានដល់៧០% នៃចំនួនពលរដ្ឋសរុប ប៉ុន្ដែ មកទល់ពេលនេះ វៀតណាមទើបតែមានអ្នកដែលបានចាក់វ៉ាក់សាំងយ៉ាងហោចណាស់១ដូស មានប្រមាណ ១២លាន៥សែននាក់ ក្នុងនោះ អ្នកដែលបនាចាក់គ្រប់២ដូស ទើបតែមានជាង១លាន៣សែននាក់ប៉ុណ្ណោះ។ ដូច្នេះ ហើយវៀតណាមកំពុងត្រូវការមានវ៉ាក់សាំងក្នុងដៃឲ្យបានច្រើនថែមទៀត ដើម្បីជំរុញល្បឿនចាក់វ៉ាក់សាំងរបស់ខ្លួនឲ្យបានលឿន។
សូមបញ្ជាក់ថា មកទល់ពេលនេះ វៀតណាមមានករណីឆ្លងសរុបជាង២៦ម៉ឺនករណីហើយ ក្នុងនោះ ស្លាប់មានជាង៥ពាន់ករណី៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
