សារព័ត៌មាន VN Express បានរាយការណ៍ថា កាលពីពាក់កណ្ដាលខែមករាឆ្នាំនេះ ក្រុមហ៊ុនម៉ាករថយន្ដរបស់អាមេរិក Ford បានប្រកាសថា នឹងវិនិយោគ៨២ លានដុល្លារអាមេរិក ដើម្បីពង្រីកសមត្ថភាពរោងចក្រផលិត នៅក្នុងភាគខាងជើងនៃប្រទេសវៀតណាម ដោយវានឹងធ្វើឲ្យការផលិតរបស់ក្រុមហ៊ុននេះនឹងនឹងកើនឡើងរហូតដល់៣ដង ពោលគឺកើនឡើងពីចំនួន ១ម៉ឺន៤ពាន់គ្រឿង ទៅដល់៤ម៉ឺនគ្រឿងក្នុងមួយឆ្នាំ។
ការវិនិយោគបន្ថែមរបស់ក្រុមហ៊ុន Ford នេះ នឹងធ្វើឲ្យការវិនិយោគរបស់ក្រុមហ៊ុននេះ នៅវៀតណាមកើនឡើងដល់លើស២០០ លានដុល្លារអាមេរិក។ ការលក់រថយន្ដរបស់ក្រុមហ៊ុននេះ បានកើនឡើង៣១% កាលពីឆ្នាំមុន ដែលបានលក់រថយន្ដចំនួនជាង៣ម៉ឺន២គ្រឿង។
អត្ថបទទាក់ទង!
ប្រភពព័ត៌មានបានឲ្យដឹងទៀតថា កាលពីឆ្នាំ២០១៨ ក្រុមហ៊ុនតូយ៉ូតា ក៏បានជួលដីបន្ថែម ជាង ៩ហិកតា ដើម្បីពង្រីករោងចក្រផងដែរ ខណៈដែលក្រុមហ៊ុន Honda ក៏បានលើកសំណើដើម្បីពង្រីកបន្ថែមនូវសមត្ថភាពរោងចក្រផលិតរបស់ខ្លួនដែរ។ បន្ថែមពីនេះ ក្រុមហ៊ុន Minsubishi ក៏មានគម្រោងបង្កើតរោងចក្រទី២របស់ខ្លួន នៅក្នុងប្រទេសវៀតណាមដូចគ្នា។
ជាមួយគ្នានេះ គេសង្កេតឃើញថា ក្រុមហ៊ុនផលិតរថយន្ដក្នុងស្រុកវៀតណាម មួយចំនួនក៏បានពង្រីកខ្លួន ដើម្បីប្រជែងជាមួយនឹងក្រុមហ៊ុនបរទេសទាំងនោះផងដែរ។
ជាក់ស្ដែង ក្រុមហ៊ុនផលិតរថយន្ដវៀតណាម Thanh Cong Motor ថ្មីៗនេះ ក៏បានចុះកិច្ចព្រមព្រៀងជាមួយនឹងក្រុមហ៊ុនកូរ៉េខាងត្បូង Hyundia ដើម្បីបង្កើតរោងចក្រទី២របស់ខ្លួន នៅវៀតណាម។
អត្ថបទគួរអាន!
ទោះយ៉ាងណា បើតាមសមាគមអ្នកផលិតរថយន្ដវៀតណាមបានបញ្ជាក់ថា បើទោះបីជា ការលក់របស់ក្រុមហ៊ុនផលិតក្នុងស្រុកនៅតែមានចំនួនខ្ពស់ជាងរថយន្ដនាំចូលក៏ពិតមែន តែបើមើលទៅលើភាគរយនៃកំណើន គឺរថយន្ដនាំចូលមានកំណើនខ្ពស់ណាស់។
ជាក់ស្ដែង កាលពីឆ្នាំមុន ការលក់រថយន្ដក្នុងស្រុកបានធ្លាក់ចុះ១២% មកនៅជិត១៩ម៉ឺនគ្រឿង ខណៈដែលការលក់របស់រថយន្ដនាំចូលលវិញ មានការកើនឡើង ៨២% មានចំនួន ជាង១៣ម៉ឺនគ្រឿង។
សូមបញ្ជាក់ថា កាលពីឆ្នាំមុន វៀតណាមនាំចូលរថយន្ដប្រមាណ១៤ម៉ឺនគ្រឿង កើនឡើងជាង៦៩% ធឿបនឹងឆ្នាំកន្លងទៅ នេះបើតាមរបាយការណ៍ពីគយវៀតណាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
