វៀតណាម នាំចូលរថយន្តតម្លៃជិត ២ពាន់លានដុល្លារ ៧ខែ ដើមឆ្នាំ ២០១៩

គយវៀតណាម បានបញ្ជាក់ថា ការកើនឡើង​នៃការនាំចូល​រថយន្ត​ដ៏ច្រើនលើសលប់​នេះ គឺដោយសារតែ​ឆ្នាំមុន រដ្ឋាភិបាល​វៀតណាម បានរឹត​បន្តឹងលើ លក្ខខណ្ឌនាំចូល ដែលធ្វើឲ្យ​តួលេខ​នាំចូល​រថយន្ត ធ្លាក់ចុះខ្លាំង។

អ្នករកស៊ីនៅក្នុង​ឧស្សាហកម្ម​រថយន្តវៀតណាម​ បានឲ្យ​ដឹងថា ឆ្នាំមុន រដ្ឋាភិបាល​វៀតណាម បានចេញ​អនុក្រឹត្យ ដែលមានលក្ខខណ្ឌ​ពិបាកជាងមុន​ ដូចជា តម្រូវឲ្យ អ្នកនាំចូល ផ្តល់វិញ្ញាបនប័ត្រ​ច្បាស់លាស់​ដើម្បីបញ្ជាក់​ពីគុណភាព និងប្រទេសដើម។

គួរជម្រាបដែរថា កាលពីឆ្នាំ ២០១៨កន្លងទៅ វៀតណាម នាំចូល​រថយន្តជាង ៧ម៉ឺនគ្រឿង​ ដែលមាន​ការធ្លាក់ចុះ​ប្រមាណ ២០ភាគរយ ធៀបនឹងឆ្នាំ ២០១៧ ក៏ប៉ុន្តែ​តម្លៃរថយន្ត​សរុប មានចំនួន ១,៦ ពាន់​លានដុល្លារ​អាមេរិក កើនឡើង ២១ភាគរយវិញ។

ទោះបីជាយ៉ាងណាក៏ដោយ រដ្ឋាភិបាល​វៀតណាម មិននៅស្ងៀមនោះទេ ហើយក៏ចាប់ផ្ដើម​រឹតបន្ដឹង​ចំពោះការ​នាំចូលរថយន្ដ​ពីក្រៅប្រទេស​ផងដែរ ដើម្បីលើក​ទឹកចិត្តដល់ ក្រុមហ៊ុន​ផលិតរថយន្ត​ក្នុងស្រុក និងមានបំណងឲ្យ ពលរដ្ឋវៀតណាម ប្រើប្រាស់រថយន្ដ​ដែលផលិត​នៅក្នុងស្រុកវិញ៕