ឧបទ្ទវហេតុនៅ Fukushima នៅប្រទេសជប៉ុន បានធ្វើឱ្យគម្រោងថាមពលនុយក្លេអ៊ែរនៅតំបន់អាស៊ីអាគ្នេយ៍នៅនឹងថ្កល់ ដោយបង្ខំឱ្យរដ្ឋាភិបាលបង្កក ឬបោះបង់ចោលផែនការរបស់ពួកគេ។ ប៉ុន្តែ ១០ ឆ្នាំក្រោយមក រដ្ឋាភិបាលមួយចំនួននៅក្នុងតំបន់នេះ រួមទាំងប្រទេសវៀតណាម បានចាប់ផ្តើមពិនិត្យមើលឡើងវិញនូវគម្រោងថាមពលនុយក្លេអ៊ែរនេះ ដែលជាប្រភពថាមពលដ៏មានសក្តានុពល ដើម្បីបំពេញការប្តេជ្ញាចិត្ត សម្រេចបាននូវអព្យាក្រឹតភាពកាបូន និងការធានានិរន្តរភាពកំណើនសេដ្ឋកិច្ច។ ក្នុងនោះ អ្នកជំនាញក៏បាននិយាយដែរថា ប្រទេសវៀតណាម នឹងត្រូវពឹងផ្អែកលើនុយក្លេអ៊ែរកាន់តែខ្លាំងឡើង ដើម្បីទ្រទ្រង់កំណើនសេដ្ឋកិច្ចដ៏លឿនបំផុតក្នុងតំបន់ ក៏ដូចជាសេដ្ឋកិច្ចដែលត្រូវការថាមពល និងការសម្រេចឲ្យបាននូវគោលដៅគ្មានការបំភាយឧស្ម័នពុល។
សូមជម្រាបថា វៀតណាម និងរុស្ស៊ីបានចុះហត្ថលេខាលើអនុស្សរណៈនៃការយោគយល់គ្នាក្នុងឆ្នាំ ២០១១ ដើម្បីសាងសង់រោងចក្រថាមពលនុយក្លេអ៊ែរក្នុងរយៈពេលមួយទសវត្សរ៍ ប៉ុន្តែគម្រោងនេះត្រូវបានពន្យារពេល ដោយសារតែការកើនឡើងនៃការព្រួយបារម្ភអំពីសុវត្ថិភាព បន្ទាប់ពីការកើតមានឡើងនូវឧបទ្ទវហេតុរោងចក្រនុយក្លេអ៊ែរនៅ Fukushima ប្រទេសជប៉ុនក្នុងខែមីនាឆ្នាំ២០១១។
សូមបញ្ជាក់ថា គម្រោងដែលមានតម្លៃ ៣៥០ លានដុល្លារនេះ រួមមានម៉ាស៊ីនដែលផលិតដោយរុស្ស៊ីអត្ថបទគួរអាន
សូមបញ្ជាក់ថា គម្រោងដែលមានតម្លៃ ៣៥០ លានដុល្លារនេះ រួមមានម៉ាស៊ីនដែលផលិតដោយរុស្ស៊ី ព្រមទាំងមន្ទីរពិសោធន៍ស្រាវជ្រាវផងដែរ ខណៈការវិនិយោគសរុបរបស់រោងចក្រនុយក្លែអ៊ែរនេះ អាចមានច្រើនជាង ៥០០ លានដុល្លា។ នេះបើយោងតាមការចុះផ្សាយរបស់សារព័ត៌មាន Vietnam Investment Review ។ ដោយក្នុងនោះ ក្រុមហ៊ុនរដ្ឋរុស្ស៊ី Rosatom Group ក៏នឹងចូលរួមក្នុងគម្រោងនេះ ជាមួយនឹងគោលដៅនៃការបញ្ចប់ការសាងសង់នៅចុងឆ្នាំ ២០២៤។
យ៉ាងណាមិញ ជុំវិញបញ្ហានេះ ក្រុមប្រឹក្សាថាមពលវៀតណាម ក៏បានស្នើឱ្យរដ្ឋសភា និងនាយករដ្ឋមន្ត្រីវៀតណាម ត្រូវតែរួមបញ្ចូលថាមពលនុយក្លេអ៊ែរនៅក្នុងផែនការមេអគ្គិសនីថ្មី ខណៈតម្រូវការអគ្គិសនីរបស់ប្រទេសវៀតណាមត្រូវបានគេរំពឹងថានឹងកើនឡើងក្នុងល្បឿនពី ៨,៥% ទៅ ៩,៤% ជារៀងរាល់ឆ្នាំ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
