វៀតណាមគ្រោងចំណាយ ១ពាន់លានដុល្លារ សម្រាប់ចាក់វ៉ាក់សាំងកូវីដ-១៩ជូនពលរដ្ឋខ្លួន

បើតាមការប៉ាន់ស្មានរបស់ក្រសួងហិរញ្ញវត្ថុវៀតណាម ការចំណាយដើម្បីទទួលបានវ៉ាក់សាំងចាក់ជូនពលរដ្ឋប្រមាណ ១៥០លានដូសនៅឆ្នាំនេះ នឹងត្រូវចាយថវិកាប្រមាណ១ពាន់លានដុល្លារអាមេរិក។ ក្នុងនោះ មានជាង៩០០លានដុល្លារ គឺចំណាយលើការទិញវ៉ាក់សាំង និងនៅសល់ប៉ុន្មានគឺចំណាយសម្រាប់ការដឹកជញ្ជូន ស្ដុកទុកចែកចាយ និងគ្រប់គ្រងវ៉ាក់សាំង។

ក្រសួងហិរញ្ញវត្ថុវៀតណាម បានប៉ាន់ប្រមាណថា រដ្ឋាភិបាលនឹងផ្ដល់ថវិកាប្រមាណជិត៧០០លានដុល្លារសម្រាប់មូលនិធិកម្មវិធីចាក់វ៉ាក់សាំងនេះ ខណៈដែលអាជ្ញាធរទីក្រុង និងខេត្តផ្សេងៗទៀត រួមទាំងប្រភពីវិស័យឯកជនផ្សេងទៀតនឹងត្រូវចូលរួមវិភាគទាននូវចំនួនទឹកប្រាក់ដែលនៅសល់ប្រមាណ៣០០លានដុល្លារអាមេរិក។ ប៉ុន្ដែ ក្រសួងហិរញ្ញវត្ថុវៀតណាមព្រមានថា ប្រសិនបើការរាតត្បាតនៃមេរោគនៅតែបន្ដ និងតម្រូវការវ៉ាក់សាំងកើនឡើងទៀត នោះវានឹងធ្វើឲ្យមានការលំបាកក្នុងការពឹងផ្អែកលើមូលនិធិសាធារណៈនេះ។

ក្រសួងសុខាភិបាលវៀតណាម កន្លងមកក៏បានចុះកិច្ចព្រមព្រៀងទិញវ៉ាក់សាំង ១១០លានដូសរួចហើយដែរ សម្រាប់ឆ្នាំ២០២១នេះ។ ក្នុងនោះដែរ ក៏មានរួមបញ្ចូលនូវកិច្ចសន្យាទិញវ៉ាក់សាំង Pfizer-BioNTech ប្រមាណ ៣១លានដូស ដែលនឹងដឹកមកដល់វៀតណាមនៅត្រីមាសទី៣ និងទី៤ ឆ្នាំនេះ រួមទាំងវ៉ាក់សាំង AstraZeneca ជិត៣៩លានដូសទៀតបានមកពីយន្ដការកូវ៉ាក់។

វ៉ាក់សាំងប្រមាណ ២លាន៥សែនដូស នៃ ចំនួនវ៉ាក់សាំងសរុបជិត ៣៩លានដូស ពីយន្តការកូវ៉ាក់របស់អង្គការសុខភាពពិភពលោកបានដឹកមកដល់វៀតណាមរួចហើយមកទល់ពេលនេះ។ ប្រទេសវៀតណាម បានចាប់ផ្ដើមចាក់វ៉ាក់សាំងតាំងពីដើមខែមីនាមកម្ល៉េះ ដោយប្រើប្រាស់វ៉ាក់សាំងប្រភេទ AstraZeneca ដែលជាការផ្ដល់ជូនតាមយន្ដការកូវ៉ាក់ ហើយមានប្រជាជនវៀតណាមប្រមាណជាង១លាននាក់ហើយ នៃចំនួនប្រជាជនសរុប ៩៦លាននាក់ បានចាក់វ៉ាក់សាំងដូសទី១។

បច្ចុប្បន្ន វៀតណាមក៏បាននិងកំពុងផលិតវ៉ាក់សាំងកូវីដ-១៩ ដោយខ្លួនឯងផងដែរ ប៉ុន្ដែកំពុងស្ថិតក្នុងដំណើរការសាកល្បងនៅឡើយទេ។ បញ្ហាផ្គត់ផ្គង់វ៉ាក់សាំងយឺតយ៉ាវ ក៏កំពុងជំរុញឲ្យវៀតណាមខ្នះខ្នែងស្វែងរកការផ្ទេរបច្ចេវិទ្យាផលិតវ៉ាក់សាំងពីក្រៅប្រទេសផងដែរ។ ជាក់ស្ដែង ថ្មីៗនេះ វៀតណាមបានស្នើសុំការផ្ទេរបច្ចេកវិទ្យាផលិតវ៉ាក់សាំងតាមបែបបច្ចេកទេស mRNA ពីក្រៅប្រទេស ដើម្បីយកមកផលិតបន្ដនៅក្នុងស្រុក ហើយសំណើនេះ កំពុងត្រូវបានអង្គការសុភាពពិភពលោកត្រួតពិនិត្យនៅឡើយ។

សូមបញ្ជាក់ថា វៀតណាមនៅមួយរយៈចុងក្រោយនេះ បាននិងកំពុងស្ថិតក្នុងហានិភ័យឆ្លងកូវីដ-១៩គួរឲ្យបារម្ភ ក្រោយចំនួនឆ្លងថ្មីៗបានកើនឡើងជាងបន្ដបន្ទាប់ ក្រោយពេលប្រទេសនេះ មានការស្ងប់ស្ងាត់ការឆ្លងកូវីដ-១៩ក្នុងសហគមន៍បានមួយរយៈ។ យ៉ាងណាមិញ នៅថ្ងៃទី ២០ ខែឧសភា តាមការរាយការណ៍វៀតណាមមានអ្នកឆ្លងថ្មី ៤៤នាក់ ដែលធ្វើឲ្យតួលេខអ្នកឆ្លងកូវីដ-១៩សរុបកើនដល់ជាង ១ពាន់៧រយនាក់ និងអ្នកស្លាប់មានជិត៤០នាក់ហើយ៕