ស្ងាត់ៗវៀតណាមសាង់សង់មូលដ្ឋានខែលការពារទប់ទល់ជាមួយចិននៅសមុទ្រចិនខាងត្បូង

វិទ្យាស្ថានអន្តរជាតិសិក្សាភូមិសាស្ត្រ និងយុទ្ធសាស្រ្តនាវាចរណ៍អាស៊ី ដែលមានទីតាំងនៅសហរដ្ឋអាមេរិកបានបញ្ចេញរបាយការណ៍សិក្សាថ្មីមួយរបស់ខ្លួន រកឃើញថា ក្នុងរយៈពេល២ឆ្នាំចុងក្រោយនេះប្រទេសវៀតណាមបាននិងកំពុងកសាងមូលដ្ឋានទ័ពជាខែលការពារ នៅតំបន់ប្រជុំកោះស្ព្រាតលី (Spratly) ដើម្បីធានាពីការវាយប្រហារណាមួយពីប្រទេសចិនក្នុងជម្លោះសមុទ្រចិនខាងត្បូង ព្រមទាំងឲ្យធានាបានពីការវាយប្រហារតបទៅទីតាំងរបស់ចិនវិញ នៅក្នុងតំបន់ប្រជុំកោះ ដែលមានជម្លោះក្បែរនោះ។ នេះបើយោងតាមការចុះផ្សាយដោយសារព័ត៌មាន South China Morning Post។

កោះ Sin Cowe របស់វៀតណាមដែលបានចាក់ដីពង្រីកធ្វើជាមូលដ្ឋានខែកការពារ ក្បែរប្រជុំកោះ Spratly (រូបភាព៖ Google Earth)

របាយការណ៍ដដែលបានបង្ហាញថា វៀតណាមបានបំពាក់ស្ទើរតែនៅគ្រប់កន្លែងទាំងអស់នៃតំបន់ប្រជុំកោះ Spratly ក្នុងដែនដីរបស់ខ្លួនជាមួយនឹងប្រព័ន្ធខែលការពារដែនអាកាស និងដែនទឹកទំនើបៗ។

ជាពិសេសវៀតណាមបានផ្តោតទៅលើតំបន់២ ដែលទំនងជាកន្លែងយុទ្ធសាស្ត្រសំខាន់ រួមមានតំបន់ថ្មប៉ប្រះទឹក Sin Cowe និង West Reef ដោយវៀតណាមបានបំពាក់នូវអាវុធទំនើបចុងក្រោយបំផុតនៅទីនោះ។

សូមជម្រាបជូនដែរថា សមុទ្រចិនខាងត្បូងមានក្រឡាផ្ទៃ៣លានគីឡូម៉ែត្រក្រឡា និងមានកោះចំនួន២៥០ ។ បច្ចុប្បន្ន ចិនបានចូលកាន់កាប់អស់ជិត៨០ភាគរយទៅហើយក្នុងតំបន់នោះ។ ឯវៀតណាម ជារឿយៗបានគំរាមថា នឹងប្ដឹងចិនទៅកាន់តុលាការយុត្តិធម៌អន្តរជាតិ និងទទូចឲ្យចិនគោរពច្បាប់សមុទ្រអន្តរជាតិឆ្នាំ១៩៨២។

ប៉ុន្តែកន្លងមកគេសង្កេតឃើញថា ការបង្ហាញសាច់ដុំដាក់គ្នាបានកើតឡើងញឹកញាប់តែរវាងចិន និងសហរដ្ឋអាមេរិក ដែលជាប្រទេសក្រៅតំបន់ប៉ុណ្ណោះ ពោលគឺអាមេរិកតែងធ្វើសមយុទ្ធយោធាជើងទឹក និងចល័តនាវាដឹកយន្តហោះរបស់ខ្លួនក្នុងដែនទឹកនេះ ដោយសំអាងថាតំបន់នោះ ជាដែននាវាចរណ៍អន្តរជាតិ៕