រដ្ឋាភិបាលវៀតណាម នឹងធ្វើការដំឡើងពន្ធចន្លោះពី ៤% ទៅដល់ ២៥% ទៅលើផលិតផលដែក នាំចូលមកពីក្រុមហ៊ុនចំនួន ១៦ របស់ប្រទេសចិន ដោយបានចាត់ទុកថា ជាការលក់បង្ខូចថ្លៃទំនិញ ដែលធ្វើឲ្យប៉ះពាល់ដល់វិស័យឧស្សាហកម្មដែករបស់វៀតណាម។
យោងតាមសេចក្តីសម្រេចរបស់ក្រសួងឧស្សាហកម្ម និងពាណិជ្ជកម្មវៀតណាម បានបង្ហាញថា ពន្ធនេះ នឹងត្រូវដាក់ទៅលើ ផលិតផលដែកថែបត្រជាក់មួយចំនួន ដែលនាំមកពីប្រទេសចិន សម្រាប់រយៈពេល ៥ឆ្នាំ ដែលមានសុពលភាពចាប់ពីថ្ងៃទី ២៨ ខែធ្នូ ឆ្នាំ ២០២០នេះតទៅ។
អត្ថបទទាក់ទង!
ដើម្បីធានាដល់អត្ថប្រយោជន៍របស់ក្រុមហ៊ុន និងបុគ្គលផ្ទាល់ ក្រសួងបានណែនាំដល់ពួកគេ ឲ្យចុះឈ្មោះជាភាគីពាក់ព័ន្ធ នៅក្នុងករណីត្រួតពិនិត្យឡើងវិញចំពោះបញ្ហានេះ និងសហការជាមួយភ្នាក់ងារស៊ើបអង្កេត ដើម្បីសម្រេចការងារនេះបានដោយរលូន។
យ៉ាងណាក៏ដោយចុះ ក្រុមហ៊ុន និងបុគ្គល ដែលកំពុងស្ថិតក្នុងដំណាក់កាលចុះកិច្ចព្រមព្រៀងទិញលក់ នាំចូលនិងចែកចាយ ក៏ដូចជាប្រើប្រាស់ផលិតផលដែក ដែលជាប់ពន្ធលើការបង្ខូចថ្លៃ គឺត្រូវតែយកចិត្តទុកដាក់ជាចាំបាច់ចំពោះបញ្ហានេះ ព្រោះអត្រាពន្ធនេះ អាចនឹងប្រែប្រួល នៅពេលដែលទទួលបានលទ្ធផលនៃការស៊ើបអង្កេត។
គួរជម្រាបថា នៅក្នុងរយៈពេល ១១ខែដើមឆ្នាំ ២០២០នេះ ផលិតកម្មដែក និងការលក់ដែកវៀតណាម ស្ថិតនៅក្នុងកម្រិតមួយថេរ ពុំមានការឡើងចុះនោះទេ តែយ៉ាងណា ការនាំចេញដែកវៀតណាម សម្រេចបានជាង ៤លានតោន ដែលមានការធ្លាក់ចុះ ៣% ធៀបនឹងពេលដូចគ្នា កាលពីឆ្នាំ ២០១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
