វៀតណាមនាំចេញបង្គាទៅទីផ្សារអាមេរិកកើនឡើង២២%ក្នុងរយៈ៩ខែឆ្នាំ២០២១

សមាគមនាំចេញ និងផលិតអាហារសមុទ្រវៀតណាម (VASEP) បានលើកឡើង​ថ្មីៗនេះថា តម្រូវការរបស់សហរដ្ឋអាមេរិក​នៅតែមានកម្រិតខ្ពស់ ជាពិសេសនៅពេល​ដែល​សេដ្ឋកិច្ច​ប្រទេស​នេះចាប់ផ្តើម​ងើបឡើងវិញ បន្ទាប់ពីការផ្ទុះឡើង​នៃជំងឺកូវីដ-១៩ ហើយស្របពេលដែលរដូវកាលទិញទំនិញចុងឆ្នាំក៏ខិតជិតមកដល់។ ក្នុងនោះដែរ ការនាំចេញបង្គារ​របស់​វៀតណាម​ទៅ​កាន់សហរដ្ឋអាមេរិក គឺមានការកើនឡើង ១០ខែជាប់ៗគ្នា​មកហើយ។

សមាគមដដែលនេះ បានបន្ថែមថា សហរដ្ឋអាមេរិកបាននឹងកំពុងបង្កើនការនាំចូលបង្គាតាំងពីដើមឆ្នាំមកម្ល៉េះ ប៉ុន្តែដោយសារប្រទេសវៀតណាមប្រឈមនឹងកង្វះការផ្គត់ផ្គង់ ហើយទើបតែពេលនេះដែលវៀតណាមមានឱកាសជំរុញការនាំចេញរបស់ខ្លួន។ យ៉ាងណាមិញ ក្រុមហ៊ុននាំចេញរបស់វៀតណាមក៏ទំនងជានឹងទទួលបានអត្ថប្រយោជន៍ផងដែរ នៅដូវកាលទិញទំនិញថ្ងៃបុណ្យណូអែលនៅអឺរ៉ុប ដែលតម្រូវការទំនិញនឹងមានការកើនឡើង។

គួរំឭកថា ការនាំចេញបង្គាទៅសហភាពអឺរ៉ុប​ក្នុងរយៈពេល៩ ខែដំបូងក៏មានការកើនឡើង ១០ភាគរយ ដែរ ធៀបនឹងឆ្នាំមុន ដែលកើនដល់ជាង ៤០០ លានដុល្លារ។

សូមជម្រាបថា សហរដ្ឋអាមេរិកគឺជាទីផ្សារនាំចេញបង្គាដ៏ធំបំផុតរបស់វៀតណាមក្នុងរយៈពេល ៩ ខែដំបូង ដែលស្មើនឹង ២៨ភាគរយនៃការនាំចេញសរុប ខណៈដែលអឺរ៉ុបមាន ១៥ ភាគរយ និងប្រទេសចិន ១១ ភាគរយ។ យ៉ាងណាមិញ សម្រាប់​ឆ្នាំ២០២១នេះ វៀតណាម​មានគោលដៅ នាំចេញបង្គារ​ឲ្យបានដល់ទៅ ៤ពាន់លាន​ដុល្លារអាមេរិក៕

អត្ថបទ៖ ស៊ើង និមល់