សារព័ត៌មានអនឡាញរបស់វៀតណាម VN Express បានផ្សាយនៅថ្ងៃទី១២ ខែមេសា ឆ្នាំ២០២០នេះ ថា ក្រុមហ៊ុនអាកាសចរណ៍ Vietnam Airlines ក៏បានចុះកិច្ចសន្យាលក់យន្តហោះចំនួន ៥គ្រឿងផងដែរ។
ព័ត៌មានេះនៃការលក់ភាគហ៊ុនចេញនេះ ត្រូវបានបង្ហាញឲ្យដឹងនៅក្នុងកំណត់ហេតុក្រោយសវនកម្ម បន្ថែមលើរបាយការណ៍ហិរញ្ញវត្ថុបូកសរុបឆ្នាំ២០១៩ របស់ក្រុមហ៊ុន Vietnam Airlines ដែលផ្សព្វផ្សាយកាលពីថ្ងៃសុក្រកន្លងទៅនេះ ដោយក្នុងនោះ ក៏មានការពន្យល់អំពីផលប៉ះពាល់ពីវីរុសកូវីដ១៩ ដែល Vietnam Airlines បានទទួលរង ផងដែរ។
ខេមបូណូមីស ពុំទាន់អាចសុំការបញ្ជាក់ពីតំណាងក្រុមហ៊ុន កម្ពុជា អង្គរ អ៊ែរ បាននៅឡើយទេ នៅថ្ងៃអាទិត្យ ទី១២ ខែមេសា នេះ។
អត្ថបទទាក់ទង
យោងតាមសារព័ត៌មាន VN Express កាលពីដើមឆ្នាំ២០២០នេះ នាយករដ្ឋមន្ត្រីវៀតណាមបានអនុម័តយល់ព្រមលើផែនការ ដែលអនុញ្ញាតឲ្យអាកាសចរណ៍ Vietnam Airlines កែសម្រួលឡើងវិញនូវវិនិយោគទុនរបស់ខ្លួន នៅក្នុងក្រុមហ៊ុន កម្ពុជា អង្គរ អ៊ែរ ដូច្នេះហើយក្រុមហ៊ុនក៏អនុវត្តការលក់ភាគហ៊ុន ស្របទៅតាមផែនការនេះ។
ក្រុមហ៊ុនអាកាសចរណ៍ Vietnam Airlines កាន់កាប់ភាគហ៊ុន ៤៩% នៃក្រុមហ៊ុន កម្ពុជា អង្គរ អ៊ែរ ដែលជាអាកាសចរណ៍ជាតិរបស់កម្ពុជា ហើយភាគហ៊ុន ៥១% គឺកាន់កាប់ដោយរដ្ឋាភិបាលកម្ពុជា។
ជាមួយគ្នានេះ Vietnam Airlines ក៏បានចុះហត្ថលេខាលក់យន្តហោះ ប្រភេទ A321 របស់ខ្លួន ចំនួន ៥គ្រឿងផងដែរ ដែលមានតម្លៃសរុប ៣៧លានដុល្លារអាមេរិក ទៅឲ្យអ្នកទិញដែលមិនត្រូវបានគេបញ្ចេញអត្តសញ្ញាណនៅឡើយ។ ការប្រគល់យន្តហោះទាំង ៥គ្រឿងនេះ នឹងធ្វើឡើងនៅមុនខែមិថុនា ឆ្នាំនេះ៕
