នៅមុនថ្ងៃបើកកិច្ចប្រជុំនេះ លោកហ្សេឡេស្គី បាននិយាយថា វេទិកានេះ គឺជាវេទិកាសេដ្ឋកិច្ចពិភពលោកដ៏មានឥទ្ធិពលមួយ ហើយប្រទេសអ៊ុយក្រែនមានរឿងរាវខ្លះៗ ដើម្បីនិយាយទៅកាន់មេដឹកនាំប្រទេស និងធុរកិច្ចទាំងអស់របស់ពិភពលោក។
បន្ទាប់ពីបានផ្អាករៀបចំ ក៏ដូចជាមានការពន្យារពេលជាច្រើនលើកច្រើនសារ ដោយសារតែជំងឺរាតត្បាតកូវីដ១៩នៅរយៈពេលជាង២ឆ្នាំមកនេះ នៅទីបំផុតវេទិកាសេដ្ឋកិច្ចពិភពលោក នឹងត្រូវរៀបចំឡើងឡើងវិញហើយនៅឆ្នាំ២០២២នេះ ដោយមានរយៈពេល៤ថ្ងៃ ចាប់ផ្តើមនៅថ្ងៃចន្ទទី២៣ ដល់ថ្ងៃទី២៦ខែឧសភានេះ នៅទីក្រុងដាវ៉ូសប្រទេសស្វីស។
ក្នុងនោះដែរ ប្រធានបទ ដែលនឹងត្រូវលើកយកមកជជែកពិភាក្សាមុនគេបង្អស់នៅថ្ងៃដំបូងនៃរបៀបវារៈកម្មវិធីនេះ គឺទាក់ទងនឹងបញ្ហាដែលកំពុងកើតឡើងនៅប្រទេសអ៊ុយក្រែន ដែលជាបញ្ហាដ៏ក្ដៅគគុករបស់ពិភពលោក ខណៈប្រធានាធិបតីអ៊ុយក្រែនលោក ហ្សេឡេនស្គី ក៏មានមុខតាមរយៈប្រព័ន្ធវីដេអូពីចម្ងាយ ដើម្បីថ្លែងសារទៅកាន់មេដឹកនាំប្រទេស និងមេដឹកនាំធុរកិច្ចដែលចូលរួមក្នុងវេទិការនេះផងដែរ។
លោក Zelenskiy បាននិយាយនៅក្នុងសុន្ទរកថា វីដេអូប្រចាំថ្ងៃរបស់លោកកាលពីយប់ថ្ងៃទី២២ឧសភាថា នេះគឺជាវេទិកាសេដ្ឋកិច្ចដ៏មានឥទ្ធិពលបំផុតរបស់ពិភពលោកដែលប្រទេសអ៊ុយក្រែនត្រូវតែនិយាយពីអ្វីមួយនៅក្នុងវេទិកានេះ។
ប៉ុន្ដែ នៅក្នុងវេទិកាសេដ្ឋកិច្ចពិភពលោកនេះ គឺមិនមានអ្នកនយោបាយរុស្ស៊ី ថ្នាក់ដឹកនាំសំខាន់ៗណាមួយចូលរួមនោះទេ។
តាមធម្មតាប្រទេសរុស្ស៊ីតែងមានទីតាំងមួយរបស់ខ្លួនផ្ទាល់ នៅអំឡុងវេទិកាសេដ្ឋកិច្ចពិភពលោកនេះ ដើម្បីតាំងបង្ហាញសម្រាប់ក្រុមអ្នកដឹកនាំអាជីវកម្ម និងអ្នកវិនិយោគ ប៉ុន្តែនៅឆ្នាំនេះគេឃើញក្រុមសិល្បករអ៊ុយក្រែនបានប្រែក្លាយទីកន្លែងនៅតាមផ្លូវសំខាន់មួយក្នុងទីក្រុងដាវ៉ូស ដោយបានសរសេរដាក់ឈ្មោះថា Russian Warcrimes House ដែលមានន័យជាខ្មែរថា «ផ្ទះឧក្រិដ្ឋកម្មសង្គ្រាមរុស្ស៊ី» ដែលបង្ហាញពីភាពវេទនា និងការបំផ្លិចបំផ្លាញជាទីបំផុតនូវអ្វីដែលបង្កឡើងដោយសារតែការឈ្លានពានរបស់រុស្ស៊ីទៅលើប្រទេសអ៊ុយក្រែន។
ក្រៅពីវិបត្តិនៅអ៊ុយក្រែន ការងើបរើសេដ្ឋកិច្ចឡើងវិញក្រោយជំងឺកូវីដ១៩ ការដោះស្រាយការប្រែប្រួលអាកាសធាតុ អនាគតនៃការងារ ការបង្កើនល្បឿននៃមូលធននិយមរបស់ភាគីពាក់ព័ន្ធ និងការប្រើប្រាស់បច្ចេកវិទ្យាថ្មីក៏ស្ថិតនៅក្នុងចំណោមប្រធានបទដែលគ្រោងនឹងពិភាក្សានៅក្នុងវេទិកាសេដ្ឋកិច្ចពិភពលោក នៅទីក្រុងដាវ៉ូសផងដែរ។
អត្ថបទគួរអាន
ប្រធានគណៈកម្មការអឺរ៉ុបលោកស្រី Ursula von der Leyen អធិការបតីអាល្លឺម៉ង់លោក Olaf Scholz និងអគ្គលេខាធិការអង្គការណាតូលោក Jens Stoltenberg ក៏បានទៅចូលរួមនៅក្នុងចំណោមមេដឹកនាំដែលត្រូវថ្លែងសុន្ទរកថានៅក្នុងកិច្ចប្រជុំនេះដែរ។ ជាមួយគ្នានេះ ខាងភាគីកម្ពុជាយើង ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏មានដឹកនាំគណៈប្រតិភូ និងអ្នកជំនាញធំៗដើម្បីចូលរួមក្នុងវេទិកាពិភពលោកមួយនេះដែរ។
នៅលើរបៀបវារៈទាក់ទងនឹងធុរៈកិច្ច ការពិភាក្សាក្នុងផ្នែកនេះ ទំនងជាផ្តោតសំខាន់ទៅលើស្ថានភាពដ៏ជូរចត់នៃទីផ្សារហិរញ្ញវត្ថុរបស់រដ្ឋ និងសេដ្ឋកិច្ចពិភពលោក។
បន្ទាប់ពីមានការធ្លាក់ចុះសេដ្ឋកិច្ចយ៉ាងខ្លាំងកាលពី២ឆ្នាំមុនដោយការចាប់ផ្តើមផ្ទុះឡើងនៃជំងឺកូវីដ១៩ ឥឡូវនេះមានការគំរាមកំហែងជាច្រើនចំពោះការងើបរើសេដ្ឋកិច្ចឡើងវិញដែលនាំឱ្យមូលនិធិរូបិយវត្ថុអន្តរជាតិទម្លាក់ការព្យាករពីកំណើនសេដ្ឋកិច្ចសកលរបស់ខ្លួនជាលើកទី២ចាប់តាំងពីដើមឆ្នាំនេះ។
អតិផរណាដោយសារការរាំងស្ទះខ្សែសង្វាក់ផ្គត់ផ្គង់បានបង្កជាបញ្ហាកាលពីឆ្នាំមុន ជាពិសេសនៅក្នុងសេដ្ឋកិច្ចសហរដ្ឋអាមេរិក គួបផ្សំដោយបញ្ហាមួយចំនួន ដែលបានកើតឡើងតាំងពីដើមឆ្នាំ២០២២នេះរួមទាំងការលុកលុយរបស់រុស្ស៊ីទៅលើអ៊ុយក្រែន និងរលកនៃវិធានការបិទខ្ទប់ដោយសារជំងឺកូវីដ១៩នៅទូទាំងប្រទេសចិន ដែលបានរាំងស្ទះដល់ការស្តារសេដ្ឋកិច្ចសាកលឡើងវិញផងដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
