មន្ត្រីអាមេរិកដដែលសុំមិនបញ្ចេញអត្តសញ្ញាណបានគូសបញ្ជក់ទៀតថា គេមិនអាចធ្វើការលម្អិតអំពីជំនួយដែលទីក្រុងប៉េកាំងកំពុងផ្តល់ឱ្យម៉ូស្គូនោះទេ តែគ្រាន់តែដឹងថា វាជាជំនួយផ្នែកយោធា និងសេដ្ឋកិច្ចតែមិនមានអ្វីធំដុំឡើយ គ្រាន់តែជាការជួយសម្រាលបន្ទុក ទណ្ឌកម្មដែលបានដាក់ដោយអាមេរិក និងសម្ព័ន្ធ កុំឱ្យរុស្ស៊ីជួបការលំបាកពេក។
មន្ត្រីអាមេរិករូបនោះដដែលបាននិយាយថា និន្នាការថ្មីនេះវាអាចនឹងគ្រប់គ្រាន់ហើយ សម្រាប់ធ្វើឱ្យរដ្ឋអំណាចលោកចូ បៃដិន ភ្ញាក់ផ្អើលពីទង្វើរបស់ចិន ដែលនៅបន្តជួយរុស្ស៊ីនេះ ហើយទីក្រុងវ៉ាស៊ីនតោនគួរលើកយកបញ្ហានេះទៅជជែកជាមួយសមភាគីក្រុងប៉េកាំង។
គួរជម្រាបឡើងវិញបន្តិចថា ប្រធានាធិបតីចិនលោក ស៊ី ជីនពីង ធ្លាប់បានលើកឡើងម្តងហើយម្តងទៀតថា ចិនមានជំហរអព្យាក្រឹត្យ ក្នុងជម្លោះរុស្ស៊ី-អ៊ុយក្រែន ហើយតែងស្នើឱ្យមានកិច្ចចរចាសន្តិភាពរវាងប្រទេសទាំងពីរ។ ចិនតែងប្រឆាំងដាច់ខាតក្នុងការប្រើប្រាស់អាវុធនុយក្លេអ៊ែរ នៅក្នុងជម្លោះ។ ទោះយ៉ាងណាគេ អាចកត់សម្គាល់បានថា ប៉េកាំងមិនធ្លាប់បាន ថ្កោលទោសទីក្រុងម៉ូស្គូម្តងឡើយ ចំពោះទង្វើឈ្លានពានលើអ៊ុយក្រែន ហើយសូម្បីតែពេលខ្លះ រុស្ស៊ីបានគំរាមប្រើនុយក្លេអ៊ែរថែមទៀត។
យ៉ាងណាក៏ដោយ សារព័ត៌មាន Bloomberg មិនអាចសុំការស្រាយបំភ្លឺជុំវិញរបាយការណ៍ក្រុមហ៊ុនចិនជួយរុស្ស៊ីនេះពីសំណាក់អ្នកនាំពាក្យក្រុមប្រឹក្សាសន្តិសុខជាតិ និងទីភ្នាក់ងារស៊ើបការណ៍សម្ងាត់របស់សហរដ្ឋអាមេរិកបានទេ។ ខណៈស្ថានទូតចិនប្រចាំទីក្រុងវ៉ាស៊ីនតោនវិញ ក៏មិនបានឆ្លើយតបទៅនឹងសំណើរសុំការអត្ថាធិប្បាយពីអ្នកសារព័ត៌មានដែរ។
អត្ថបទគួរអាន
ទន្ទឹមគ្នានេះ មន្ត្រីនៅក្នុងរដ្ឋបាលលោក បៃឌិន ផ្សេងទៀត ក៏និយាយស្រដៀងគ្នានេះដែរថា ក្រុមហ៊ុនគ្រាក់ៗមួយចំនួនគ្រប់គ្រងដោយរដ្ឋចិនពិតជាកំពុងជួយរុស្ស៊ីដោយចេតនាក្នុងការបន្តធ្វើសង្គ្រាមនៅអ៊ុយក្រែនមែន ទោះពួកគេមិនបានបញ្ជាក់លម្អិតអំពីហេតុភេទ និងភស្តុតាងជាក់លាក់ណាមួយ ដើម្បីអះអាងការលើកឡើងរបស់ខ្លួនក្តី។
ជាមួយគ្នានេះ រដ្ឋបាលអាមរិកក៏កំពុងពិនិត្យមើលភស្តុតាងដែលរកឃើញទាំងនេះឱ្យបានច្បាស់លាស់ផងដែរ មុននឹងដាក់ចេញចំណាត់ការណាមួយ។ ក៏ប៉ុន្តែបើនៅទីបំផុតការពិតបែបនេះមែន នោះគេអាចសន្មតបានទំនាក់ទំនងអាមេរិក-ចិនអាចនឹងស្គាល់នូវភាពរង្គោះរង្គើកាន់តែខ្លាំងជាថ្មីទៀត ហើយនឹងប៉ះពាល់ដល់គោលនយោបាយរបស់អាមេរិកចំពោះរុស្ស៊ីនិងចិនតែម្តង។
មែនទែនទៅ យុទ្ធសាស្ត្ររបស់អាមេរិកលើអ៊ុយក្រែន គឺដើម្បីធ្វើឱ្យរដ្ឋអំណាចរបស់លោក ពូទីន ឯកោ និងការប្រើគ្រប់មធ្យាបាយទាំងអស់ក្នុងការបិទសេដ្ឋកិច្ចរុស្ស៊ី ដែលជាដង្ហើមក្នុងការបន្តធ្វើសង្គ្រាមនៅអ៊ុយក្រែន។ ទោះយ៉ាងណា ការកើនឡើងនៃការគាំទ្រពីសំណាក់ប្រទេសចិន ដែលជាមហាអំណាចសេដ្ឋកិច្ចទីពីររបស់ពិភពលោកនេះ បាននិងកំពុងបន្សាបយុទ្ធសាស្ត្រនេះយ៉ាងខ្លាំង។
ជាក់ស្តែងចិនច្រានចោលទណ្ឌកម្មរបស់សហរដ្ឋអាមេរិក និងសម្ព័ន្ធមិត្តថា ជាការរំលោភលើអធិបតេយ្យភាពនៃប្រទេសដទៃ។ ក្នុងនោះ ការនាំចូលរបស់ចិនពីប្រទេសរុស្ស៊ីបានកើនឡើងជិត ៥០% ខណៈដែលការនាំចេញទៅកាន់រុស្ស៊ីវិញក៏មានការកើនឡើង១៣% កាលពីឆ្នាំ២០២២។
បន្ថែមពីនេះ នៅប្រទេសចិនមានសហគ្រាសរដ្ឋរាប់ពាន់ ដែលខ្លះគ្រប់គ្រងដោយផ្ទាល់ពីរដ្ឋអំណាចប៉េកាំងមាននាយកប្រតិបត្តិមានឋានៈស្មើរដ្ឋមន្ត្រី និងខ្លះទៀតគឺស្ថិតនៅក្រោមការត្រួតពិនិត្យតិចតួចពីរដ្ឋាភិបាលក្រុងប៉េកាំង។ តែយ៉ាងណា ពួកគេទាំងអស់សុទ្ធតែស្ថិតនៅក្រោមឥទ្ធិពលរបស់បក្សកុម្មុយនិស្តចិន ទោះបីជាព័ត៌មានលម្អិតនៃប្រតិបត្តិការរបស់ក្រុមហ៊ុនទាំងអស់នោះ មិនមែនតែងតែត្រូវបានត្រួតពិនិត្យដោយរដ្ឋអំណាចក៏ដោយ៕
