បញ្ហាខ្វះទឹក៖រដ្ឋាករទឹកអំពាវនាវពលរដ្ឋឲ្យប្រើប្រាស់ដោយសន្សំសំចៃ

ដោយពិនិត្យឃើញថា នារដូវប្រាំងនេះត្រូវការទឹកនឹងកាន់តែកើនឡើង រដ្ឋាករទឹកស្វយ័តក្រុងភ្នំពេញ បានអំពាវនាវដល់ពលរដ្ឋទាំងក្នុងរាជធានីភ្នំពេញ និងក្រុងតាខ្មៅ ឲ្យប្រើប្រាស់ដោយសន្សំសំចៃ ព្រោះរោងចក្រទឹកស្អាតផលិតមិនទាន់ដើម្បីបំពេញតម្រូវនោះទេ។នេះបើយោងតាមសេចក្តីជូនដំណឺងរបស់រដ្ឋាករទឹកស្វយ័តក្រុងភ្នំពេញនាពេលថ្មីៗនេះ។

នៅក្នុងសេចក្តីជូនដំណឹងដដែលបានឲ្យដឹងទៀតថា បច្ចុប្បន្ននេះ មានតម្រូវការទឹកស្អាតប្រមាណ៧០០.០០០ ម៉ែត្រគូប ក្នុងមួយថ្ងៃ ខណៈដែលរោងចក្រផលិតទឹកស្អាតទាំង៤ របស់រដ្ឋាករទឹកស្វយ័តក្រុងភ្នំពេញអាចផលិតបានតែ ៦០០.០០០ម៉ែត្រគូបក្នុងមួយថ្ងៃប៉ុណ្ណោះ។ រដ្ឋាករទឹកស្វយ័តក្រុងភ្នំពេញស្នើសុំយ៉ាងទទូចដល់ សាធារណៈចូលរួមជួយសន្សំសំចៃទឹក ដោយកុំប្រើប្រាស់ទឹកស្អាតបាញ់លាងសម្អាតផ្ទះ កាត់បន្ថយការស្រោចសួនច្បារ និងលាងរថយន្តជាដើម ដើម្បីអាចចែករំលែកទឹកស្អាតឲ្យដល់ពលរដ្ឋដទៃទៀត ជាពិសេសនៅតំបន់ជាយក្រុង។

សូមបញ្ជាក់ថា សព្វថ្ងៃនេះ រដ្ឋាករទឹកស្វយ័តក្រុងភ្នំពេញមានរោងចក្រផលិតទឹកស្អាតចំនួន៤ហើយ ហើយកំពុងតែបន្តសាងសង់បន្ថែមនូវរោងចក្រផលិតទឹកស្អាតថ្មីបន្ថែមមួយទៀតនៅបាក់ខែង សម្រាប់ផ្គត់ផ្គង់ពលរដ្ឋនៅក្នុងរាជធានីភ្នំពេញផង និងក្រុងតាខ្មៅផង ដែលរោងចក្រថ្មីនេះសាងសង់រួចរាល់ នឹងអាចផលិតទឹកស្អាតបាន ៣៩០.០០០ ម៉ែត្រគូបបន្ថែមទៀតក្នុងមួយថ្ងៃ សម្រាប់ឆ្នាំ២០២៣ ៕