អង្គការជំនួយអន្តរជាតិចំនួន ១១ បានលើកឡើងនៅក្នុងសេចក្តីថ្លែងការណ៍រួមមួយថា មានមនុស្សប្រហែល ២៧ លាននាក់កំពុងទទួលរងភាពអត់ឃ្លាននៅក្នុងតំបន់អាហ្វ្រិកខាងលិច ហើយចំនួននោះអាចកើនឡើងដល់ ៣៨ លាននាក់នៅខែមិថុនា ពោលគឺកើនឡើង ៤០% ធៀបឹងនឹងឆ្នាំមុន និងជាកម្រិតខ្ពស់បំផុតក្នុងប្រវត្តិសាស្ត្រ។
ទន្ទឹមនឹងនេះ អាហ្វ្រិកខាងលិចក៏បានទទួលរងនៅ គ្រោះទឹកជំនន់ និងគ្រោះរាំងស្ងួតកាន់តែអាក្រក់ទៅៗ ដោយសារឥទ្ធិពលនៃការប្រែប្រួលអាកាសធាតុ ដែលធ្វើឲ្យពិបាកក្នុងការធ្វើស្រែចម្ការផងដែរ។ ផលិតកម្មធញ្ញជាតិក្នុងឆ្នាំ ២០២១ និង ២០២២ បានធ្លាក់ចុះ ៣៩%នៅនីហ្សេរីយ៉ា និងធ្លាក់ចុះ ១៥% នៅប្រទេសម៉ាលី។ នេះបើយោងតាមបណ្តាញការពារវិបត្តិស្បៀងអាហាររបស់អាហ្វ្រិកខាងលិច។
លើសពីនេះទៀត តម្លៃអាហារពិភពលោកបានឡើងថ្លៃ ហើយពាណិជ្ជកម្មត្រូវបានរំខានដោយសារការឈ្លានពានរបស់រុស្ស៊ីលើអ៊ុយក្រែន។ បណ្តាញទប់ស្កាត់វិបត្តិស្បៀងអាហាររបស់អាហ្វ្រិកខាងលិចបាននិយាយថា ការបិទព្រំដែនដោយសារតែជំងឺកូវីត ១៩ ក៏មានឥទ្ធិពលអវិជ្ជមានផងដែរ។
អត្ថបទគួរអាន
អ្នកស្រីអាសាឡាម៉ា ដាវាឡាក់ ស៊ីឌី (Assalama Dawalack Sidi) នាយកប្រចាំតំបន់របស់ Oxfam សម្រាប់អាហ្វ្រិកខាងលិច និងកណ្តាលបានអះអាងថា ប្រទេសអាហ្វ្រិកខាងលិចចំនួន ៦ បាននាំចូលពី ៣០% ទៅ ៥០% នៃស្រូវសាលីពីប្រទេសរុស្ស៊ី និងអ៊ុយក្រែន។ នេះបើយោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) ។
អ្នកស្រី Sidi ក៏បានព្រមានដែរថា សង្គ្រាមអ៊ុយក្រែនក៏ជាហានិភ័យនៃការបង្វែរមូលនិធិដែលត្រូវការច្រើនពីតំបន់ផងដែរ ដោយម្ចាស់ជំនួយជាច្រើនបានបង្ហាញរួចហើយថា ពួកគេអាចនឹងកាត់បន្ថយការផ្តល់មូលនិធិសម្រាប់ទ្វីបអាហ្វ្រិកដើម្បីចំណាយសម្រាប់ជនភៀសខ្លួនអ៊ុយក្រែនវិញ។
សូមបញ្ជាក់ថា ប្រទេសនៅតំបន់អាហ្វ្រិក គឺប្រឈមនឹងផលប៉ះពាល់ខ្លាំងជាងគេ នៃវិបត្តិស្បៀងអាហារ ដែលកំពុងបង្កឡើងដោយបញ្ហាប្រេងឥន្ធនៈឡើងថ្លៃ ការកើនឡើងនៃអតិរផណា ហើយបញ្ហានេះ កំពុងត្រូវបានរុញច្រានកាន់តែខ្លាំងឡើងដោយសារតែភាពតានតឹងនៃវិបត្តិសង្គ្រាមរុស្ស៊ី និងអ៊ុយក្រែន ដែលកំពុងតែបន្ដអូសបន្លាយ៕
អត្ថបទ វ៉ាន់
ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
