ថ្នាក់ដឹកនាំសមាគមសហគ្រិនវ័យក្មេងកម្ពុជា ចាត់ទុកមហោស្រពនេះ ជាឱកាសសម្រាប់កម្ពុជាក្នុងការបង្ហាញពីបរិយាកាស និងឱកាសវិនិយោគនៅកម្ពុជា ក៏ដូចជាផ្សព្វផ្សាយពីសក្តានុពលរបស់កម្ពុជាក្នុងការទាក់ទាញការវិនិយោគផងដែរ។
លោក ស៊ាង សុបញ្ញា ប្រធានសមាគមសហគ្រិនវ័យក្មេងកម្ពុជា បានចាត់ទុកការធ្វើជាម្ចាស់ផ្ទះមហោស្រព សហគ្រិនវ័យក្មេងអាស៊ានចន្លោះពីថ្ងៃទី១២-១៣ ខែវិច្ឆិកា ខាងមុខ ជាកិត្តិយសដ៏អស្ចារ្យមួយសម្រាប់កម្ពុជាក្នុងការធ្វើឲ្យសហគ្រិនមកពីប្រទេសផ្សេងៗក្នុងតំបន់ និងលើពិភពលោកស្គាល់ពីកម្ពុជា បន្ទាប់ពីខកខានរៀបចំមហោស្រពនេះពីរឆ្នាំកន្លងមក ដោយសារការឆ្លងរាតត្បាតនៃជំងឺកូវីដ-១៩។ សម្រាប់លោក សុបញ្ញា ក្រៅពីផ្តល់ជាវេទិកាជួបជុំដល់សហគ្រិននិងអ្នកវិនិយោគក្នុងការផ្លាស់មតិយោបល់ និងបង្ហាញសក្តានុពលវិនិយោគទៅវិញទៅមក វេទិកានេះក៏ជាឱកាសសម្រាប់កម្ពុជាក្នុងការបង្ហាញពីបរិយាកាស និងឱកាសវិនិយោគដល់វិនិយោគិនអន្តរជាតិផងដែរ។ បន្ថែមលើនេះ វេទិកាជួបជុំនេះ ក៏នឹងផ្តល់ដល់វិនិយោគិនកម្ពុជាក្នុងការចាប់យកផលប្រយោជន៍ និងឱកាសវិនិយោគនៅក្រៅប្រទេសផងដែរ។
អត្ថបទគួរអាន
បើតាមការគូសបញ្ជាក់របស់លោក ស៊ាង សុបញ្ញា ក្រៅពីពិភាក្សាគ្នាលើប្រធានបទស្នូល«រីកចម្រើនកាន់តែខ្លាំងទាំងអស់គ្នា» មហោស្រពសហគ្រិនវ័យក្មេងអាស៊ាននេះ ក៏នឹងពិភាក្សាគ្នាលើវិធីសាស្ត្រក្នុងការទទួលបានហិរញ្ញប្បទាន ដើម្បីពង្រីក និងស្តារអាជីវកម្មក្នុង និងក្រោយវិបត្តិកូវីដ-១៩ និងការប្រើប្រាស់ប្រព័ន្ធបច្ចេកវិទ្យាក្នុងការអភិវឌ្ឍន៍ឲ្យកាន់តែរីកចម្រើនផងដែរ។ ការទាញយកផលប្រយោជន៍ពីការធ្វើពាណិជ្ជកម្មទ្វេភាគី និងពហុភាគី ក៏នឹងក្លាយជាប្រធានបទមួយផងដែរ។
ប្រធានសមាគមសហគ្រិនវ័យក្មេងកម្ពុជារូបនេះបានគូសបញ្ជាក់ទៀតថា មហោស្រពសហគ្រិនវ័យក្មេងអាស៊ានដែលកម្ពុជាធ្វើជាម្ចាស់ផ្ទះនឹងមានសហគ្រិនវ័យក្មេងមកពីប្រទេសក្នុងតំបន់អាស៊ាន និងប្រទេសដៃគូរួមមានសហរដ្ឋអាមេរិក អូស្ត្រាលី នូវែលសេឡង់ ចិន ជប៉ុន និងកូរ៉េខាងត្បូងចន្លោះពី២០០នាក់ទៅ៣០០នាក់ រួមទាំងសហគ្រិនកម្ពុជាចន្លោះពី៤០០នាក់ទៅ៥០០នាក់។ បន្ថែមលើនេះកម្ពុជាក៏គ្រោងអញ្ជើញសហគ្រិនមកពីប្រទេសមួយចំនួនទៀតឲ្យចូលរួមជាលក្ខណៈសង្កេតការណ៍ផងដែរ៕
