សេចក្តីថ្លែងការណ៍នេះត្រូវបានសម្រេចប្រកាស ក្រោយកិច្ចប្រជុំកំពូលពីរថ្ងៃនៅទីក្រុងសាម៉ាកាន់ ប្រទេសអ៊ូសបេគីស្ថាន ដោយបានសង្កត់ធ្ងន់លើកិច្ចសហប្រតិបត្តិការឲ្យកាន់តែជិតស្និទ្ធជាងមុនលើវិស័យយោធា និងសេដ្ឋកិច្ច រហូតដល់សន្តិសុខ និងវិស័យវប្បធម៌ផងដែរ។
ក្នុងនោះដែរ ប្រទេសជាសមាជិកទាំងប្រាំបី «បានបញ្ជាក់ឡើងវិញនូវការប្តេជ្ញាចិត្តរបស់ពួកគេលើគោលជំហរប្រជាធិបតេយ្យ យុត្តិធម៌ និងសណ្តាប់ធ្នាប់ពិភពលោកពហុប៉ូល ដោយផ្អែកលើគោលការណ៍ទទួលស្គាល់ដោយសកលនៃច្បាប់អន្តរជាតិ»។
ជាមួយគ្នានោះដែរ លោក ស៊ី ជីនពីង បានជំរុញឲ្យមានការរួបរួមគ្នា ដើម្បីប្រឆាំងការពារពីមហាអំណាចដទៃពីការជ្រៀតជ្រែកក្នុងកិច្ចការផ្ទៃក្នុង ព្រមទាំងការញុះញង់ឲ្យមាន «បដិវត្តន៍ពណ៌» ដូចដែលធ្លាប់ប្រព្រឹត្តទៅនៅក្នុងអតីតសមាជិករដ្ឋនៃសហភាពសូវៀត។ លោកស៊ី ថែមទាំងបានឆ្លៀតគូសបញ្ជាក់ដែររថា ចិនតែងចាត់ទុកកោះតៃវ៉ាន់ជាផ្នែកមួយនៃប្រទេសចិន ក៏ដូចជាបញ្ហាក្នុងស្រុកដែរ។
មែនទែនទៅ ចិននិងរុស្ស៊ីចាត់ទុកពិភពលោកថា ជាផ្លូវបំបែកជាមួយរួចស្រេចទៅហើយ ដោយមើលឃើញពីការកើនឡើងឥទ្ធិពលរបស់ខ្លួននៅតំបន់អាស៊ី តែគេមិនទាន់ប្រាកដនៅឡើយទេថា តើសមាជិកនៃអង្គការនេះអាចនឹងធ្វើការពួតដៃគ្នាកម្រិតណានោះ។
អត្ថបទគួរអាន
គួររលឹកបន្តិចថា អង្គការសហប្រតិបត្តិការស៊ាងហៃ (SCO) ត្រូវបានបង្កើតឡើងក្នុងឆ្នាំ២០០១ មានមុខងារជំរុញស្ថិរភាព និងបង្កើនការជឿទុកចិត្តគ្នារវាងរដ្ឋអតីតសហភាពសូវៀត ក៏ដូចជាកិច្ចសហប្រតិបត្តិការជាធ្លុងមួយ ដែលរួមមានប្រទេសចិន រុស្សី កាហ្សាក់ស្ថាន អ៊ូសបេគីស្ថាន កៀហ្ស៊ីស៊ីស្ថាន តាហ្ស៊ីគីស្ថាន ឥណ្ឌា និងប៉ាគីស្ថាន។
មេដឹកនាំចំនួន១៤ នាក់ បានចូលរួមក្នុងកិច្ចប្រជុំកំពូលនោះ រួមមានពីរដ្ឋសង្កេតការណ៍ដូចជា អាហ្វហ្គានីស្ថាន បេឡារុស អ៊ីរ៉ង់ និងម៉ុងហ្គោលី ព្រមទាំងដៃគូសន្ទនារួមមាន អាស៊ែបៃហ្សង់ អាមេនី កម្ពុជា នេប៉ាល់ តួកគី និងស្រីលង្កា។
អង្គការថ្នាក់តំបន់មួយនេះ ក៏កំពុងសម្លឹងមើលការពង្រីងខ្លួនផងដែរ ដោយប្រទេសអ៊ីរ៉ង់បានចុះហត្ថលេខាលើអនុស្សរណៈមួយឆ្ពោះទៅចូលរួមកិច្ចប្រជុំកំពូលឆ្នាំ ២០២៣ នៅក្នុងប្រទេសឥណ្ឌា ក្នុងនាមជាសមាជិកពេញសិទ្ធិទីប្រាំបួនរបស់ខ្លួន ហើយបេឡារុស្ស ដែលជាសម្ព័ន្ធមិត្តរបស់រុស្ស៊ី បានចាប់ផ្តើមដំណើរការសមាជិកភាពដូចគ្នា។
មួយវិញទៀត អេហ្ស៊ីប អារ៉ាប៊ីសាអូឌីត និងកាតា ទើបបានចុះហត្ថលេខាជាដៃគូសន្ទនា ដោយសម្លឹងមើលការចូលរួមក្នុងក្របខណ្ឌនេះផងដែរ ស្របពេលដែលអេមីរ៉ាត់អារ៉ាប់រួម គុយវ៉ែត មីយ៉ាន់ម៉ា បារ៉ែន និងម៉ាល់ឌីវ ក៏កំពុងសម្លឹងមើលដូចគ្នាដែរ។
ទោះបីជាយ៉ាងណាក៏ដោយ អង្គការនេះត្រូវបានគេមើលឃើញថា មិនអាចប្រែខ្លួនជាអង្គការណាតូទី២នោះឡើយ ដោយហេតុថា សមាជិកខ្លះនៅតែមានភាពតានតឹង និងមិនត្រូវរ៉ូវគ្នាជាអាទិ៍ដូចជា ចិននិងឥណ្ឌា ឥណ្ឌានិងប៉ាគីស្ថាន ដែលមានភាពរកាំរកូសរឿងព្រំដែនមិនទាន់ត្រូវរ៉ូវគ្នានៅឡើយ៕
