ទោះយ៉ាងណា គេនៅមិនទាន់ច្បាស់ទេថាតើ នៅពេលណាដែលភ្នាក់ងារគយរបស់ប្រទេសចិននឹងផ្តើមអនុវត្តបម្រាមខាងលើ។ ប៉ុន្តែបើតាមគេហទំព័រទីភ្នាក់ងារគយចិនបានបង្ហាញថា ផលិតផលនាំចូលពីតៃវ៉ាន់យ៉ាងហោចណាស់ ៥០ប្រភេទ ស្មើនឹងជាង២ពាន់មុខ បានស្ថិតក្នុងបញ្ជី «ផ្អាកការនាំចូល» បើទោះបីជាការចុះបញ្ជីរបស់ពួកគេនៅមានសុពលភាព ហើយខ្លះទៀតមានដល់ឆ្នាំ ២០២៧ក៏ដោយ។
ទិន្នន័យពីគយចិនដដែលបង្ហាញថា ក្នុងខែមករាដល់មិថុនា ចិនបាននាំចូលទំនិញពីតៃកោះវ៉ាន់កើនដល់តម្លៃជាង១២២ពាន់លានដុល្លារ កើនឡើង ៧,៣% ធៀបនឹងឆ្នាំមុន។ ទំនិញនាំចូលសំខាន់ៗរួមមានបន្ទះឈីប និងគ្រឿងអេឡិចត្រូនិកផ្សេង ខណៈទំនិញដទៃទៀតរូមមានម្ហូបអាហារ និងនំចំណីជាដើម។ល។
ផលិតដែលចិននាំចូលច្រើនបន្ទាប់មកទៀត ពីកោះតៃវ៉ាន់រួមមាន អាហារសមុទ្រ កាហ្វេ ផលិតផលទឹកដោះគោ ភេសជ្ជៈ និងទឹកខ្មេះ។ បើគិតពីខែមករាដល់ខែមិថុនាឆ្នាំ២០២២ ចិនបាននាំចូលផលិតផលទាំងនេះពីតៃវ៉ាន់ក្នុងតម្លៃជិត ៦០លានដុល្លារអាមេរិក។
ដោយឡែក សម្រាប់ផលិតផលខ្សាច់ធម្មជាតិវិញដែលមានសារៈសំខាន់ណាស់ក្នុងការសាងសង់ ធ្វើជាស៊ីម៉ង់ត៍ និងប៉េតុង ត្រូវបានប្រទេសចិននៅថ្ងៃពុធទី០៣ ប្រកាសឈប់នាំចេញទៅតៃវ៉ាន់ដូចគ្នា។
ជុំវិញការឈប់នាំចេញខ្សាច់ទៅតៃវ៉ាន់ភ្លាមៗដូច្នេះ ត្រូវបានក្រសួងពាណិជ្ជកម្មចិនអះអាងថា ជាចំណាត់ដែលផ្អែកលើច្បាប់ និងបទប្បញ្ញត្តិរបស់ខ្លួន តែក្រសួងមិនបានលម្អិតអ្វីច្រើនជាងនេះឡើយ។ យោងតាមទិន្នន័យផ្លូវការរបស់ចិន ជាង ៩០% នៃការនាំចូលខ្សាច់ធម្មជាតិរបស់តៃវ៉ាន់ គឺបាននាំមកពីប្រទេសចិន។
សូមជម្រាបថា ក្រៅពីការបិទខ្ទប់ និងផ្អាកការនាំចេញនាំចូលទំនិញរវាងប្រទេសទាំងពីរ ប្រទេសចិនក៏បានប្តេជ្ញាថា នឹងចាត់វិធានការប្រឆាំងអង្គការដែលមានមូលដ្ឋាននៅកោះតៃវ៉ាន់ចំនួនពីរ ដែលខ្លួនបានអះអាងថា បានចូលរួមយ៉ាងសកម្មក្នុងសកម្មភាពគាំទ្រកោះតៃវ៉ាន់ឲ្យប្រកាសឯករាជ្យ។ អង្គការទាំងពីរនោះគឺ មូលនិធិតៃវ៉ាន់សម្រាប់លទ្ធិប្រជាធិបតេយ្យ និងមូលនិធិសហប្រតិបត្តិការអន្តរជាតិ និងអភិវឌ្ឍន៍របស់តៃវ៉ាន់។ អង្គភាពទាំងពីរនេះ នឹងត្រូវហាមឃាត់មិនឱ្យធ្វើកិច្ចសហប្រតិបត្តិការជាមួយអង្គការ ក្រុមហ៊ុន និងបុគ្គលណាមួយឡើយ នៅចិនដីគោក៕
