ទោះយ៉ាងណា អ្នកជំនាញរូបនេះលើកទឹកចិត្តឲ្យអ្នកមានបំណងចង់វិនិយោគ ឬទិញអចលនទ្រព្យតែគ្មានចំណេះដឹងលើវិស័យនេះគួរពឹងពាក់អ្នកជំនាញ ប្រសិនបើមិនចង់ឲ្យការសម្រេចចិត្តក្លាយជាកំហុសនៅពេលក្រោយ។
អគ្គនាយកក្រុមហ៊ុនអចលនទ្រព្យ CPL ឧកញ៉ា ចេង ខេង ជឿជាក់ថា អ្នកវិនិយោគ ឬអ្នកទិញនឹងមិនអាចទទួលបានអចលនទ្រព្យស្ថិតនៅទីតាំងល្អ ឬប្រាក់ចំណេញខ្ពស់នោះទេ ប្រសិនបើនៅរង់ចាំឱកាសល្អ ឬតម្លៃថោក ទើបទិញអចលទ្រព្យនោះ ព្រោះតម្លៃអចលនទ្រព្យតែងតែមានការប្រែប្រួល និងមានតម្លៃថ្លៃ ពេលអចលនទ្រព្យនោះត្រូវបានលក់ពីម្នាក់ទៅម្នាក់។ អ្នកជំនាញមានបទពិសោធជាង២០ឆ្នាំក្នុងវិស័យអចលនទ្រព្យរូបនេះបានលើកជាទ្រឹស្តីអចលនទ្រព្យថា ត្រូវទិញហើយរង់ចាំ កុំរង់ចាំទិញអចលនទ្រព្យ។
ទន្ទឹមនឹងនេះ ឧកញ៉ា ចេង ខេង លើកទឹកចិត្តឲ្យអ្នកចង់ទិញអលនទ្រព្យ តែគ្មានជំនាញក្នុងវិស័យនេះ គួរស្វែងរកការពិភាក្សាពីអ្នកជំនាញ ឬក្រុមហ៊ុនទីភ្នាក់ងារ និងវាយតម្លៃអចលនវត្ថុ បើមិនចង់ឲ្យការប្រើប្រាស់ហិរញ្ញវត្ថុក្នុងការទិញអចលនវត្ថុជួបបញ្ហា។ អគ្គនាយកក្រុមហ៊ុនអលនទ្រព្យ CPL រូបនេះអះអាងថា ការពឹងអ្នកជំនាញ ឬក្រុមហ៊ុនអចលនវត្ថុក្នុងការទិញអចលនទ្រព្យ មិនត្រឹមតែជួយឲ្យការប្រើប្រាស់ហិរញ្ញវត្ថុមានសុវត្ថិភាពនោះទេ ថែមទាំងអាចផ្តល់ប្រាក់ចំណេញខ្ពស់ក្នុងរយៈពេលខ្លីក៏អាចថាបាន។
អត្ថបទគួរអាន
អ្នកជំនាញក្នុងវិស័យអចលនទ្រព្យរូបនេះសង្កត់ធ្ងន់ថា ការស្វែងរកការពិភាក្សា ឬពឹងអ្នកជំនាញ ឬក្រុមហ៊ុនទីភ្នាក់ងារ និងវាយតម្លៃអចលនវត្ថុទៀតសោត ត្រូវសិក្សាពីប្រវត្តិអ្នកជំនាញ ឬក្រុមហ៊ុននោះឲ្យបានល្អិតល្អន់។ ជាពិសេសពាក់ព័ន្ធបញ្ហាផ្លូវច្បាប់ និងស្នាដៃដែលអ្នកជំនាញ ឬក្រុមហ៊ុននោះសម្រេចបាននាពេលកន្លងមក ដ្បិតការពឹងអ្នកជំនាញ ឬក្រុមហ៊ុនទីភ្នាក់ងារអចលនវត្ថុ ដែលគ្មានការអនុញ្ញាតពីស្ថាប័នរដ្ឋ ឬគ្មានជំនាញច្បាស់លាស់ នឹងអាចនាំហានិភ័យកាន់ខ្ពស់ក្នុងការប្រើប្រាស់ហិរញ្ញវត្ថុ។
អ្នកជំនាញក្នុងវិស័យអចលនទ្រព្យអះអាងថា បច្ចុប្បន្នវិស័យអចលនទ្រព្យបានស្ទុះងើបឡើងវិញបណ្តើរៗហើយ ក្រោយរាជរដ្ឋាភិបាលសម្រេចបើកប្រទេសឡើងវិញ និងលើកលែងការធ្វើចត្តាឡីស័កចំពោះអ្នកដំណើរចូលមកកម្ពុជា ដែលបានចាក់វ៉ាក់សាំងកូវីដ-១៩ រួច។ អ្នកជំនាញរំពឹងថា វិស័យអចលនទ្រព្យកម្ពុជានឹងមានការរីកចម្រើនខ្លាំងនៅឆ្នាំ២០២២ ជាមួយកំណើនពី១០% ទៅ១៥% បើធៀបនឹងឆ្នាំ២០២១៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
