ក្រៅតែពីកិច្ចពិភាក្សា ជាមួយប្រធានាធិបតីអាមេរិក ចូ បៃដិន ដែលគ្រោងនឹងធ្វើឡើងនៅថ្ងៃសុក្រទី១៤ខែមករា នាយករដ្ឋមន្ត្រីជប៉ុន លោក គីស៊ីដា ក៏នឹងធ្វើដំណើរទៅជាន់ដីប្រទេសបារាំង អ៊ីតាលី អង់គ្លេស និងកាណាដា ដើម្បីបង្កើនទំនាក់ទំនងផ្នែកការពារជាតិរវាងជប៉ុន និងប្រទេសអឺរ៉ុបទាំងនោះ។ ទីក្រុងប៉ារីសនឹងក្រាលកំរាលព្រំក្រហម ទទួលលោកគីស៊ីដាមុនគេនៅល្ងាចថ្ងៃចន្ទទី០៩មករានេះ។
នៅមុនចាកចេញពីប្រទេសកំណើតរបស់ខ្លួន លោក គីហ្ស៊ីដា បាននិយាយថា៖ កិច្ចប្រជុំកំពូលរវាងលោកជាមួយលោក បៃដិន នឹងបញ្ជាក់ពីភាពរឹងមាំនៃសម្ព័ន្ធភាពជប៉ុន-អាមេរិក និងរបៀប ដែលប្រទេសទាំងពីរអាចធ្វើការកាន់តែជិតស្និទ្ធនៅក្រោមយុទ្ធសាស្ត្រសន្តិសុខ និងការពារជាតិថ្មីរបស់ជប៉ុន។ ក្នុងនោះ លោកនឹងពន្យល់ដល់លោក បៃដិន នូវយុទ្ធសាស្ត្រថ្មី ដែលជប៉ុនកំពុងពង្រឹងការការពារនៅលើកោះភាគនិរតីរបស់ខ្លួនដែលនៅជិតកោះតៃវ៉ាន់ រួមទាំងកោះ យ៉ូណាហ្គូនិ (Yonaguni) និងកោះ អ៊ីសីហ្កាគី(Ishigaki) ដែលជាមូលដ្ឋានទ័ពថ្មីកំពុងត្រូវបានសាងសង់ឡើង។
ជាមួយគ្នានោះ នាយករដ្ឋមន្ត្រីជប៉ុនរូបនេះរំពឹងថា ដំណើរទស្សនកិច្ចផ្លូវការរបស់លោកនឹងធ្វើឱ្យទំនាក់ទំនងផ្ទាល់ខ្លួនកាន់តែស៊ីជម្រៅជាមួយមេដឹកនាំផ្សេងទៀត ដើម្បីពិភាក្សាអំពីបញ្ហាសន្តិសុខដែលកំពុងក្តៅគគុក រួមទាំងការឈ្លានពានរបស់រុស្ស៊ីមកលើអ៊ុយក្រែន បញ្ហាសេដ្ឋកិច្ចពិភពលោក និងសារៈសំខាន់នៃការការពារសណ្តាប់ធ្នាប់ពិភពលោក ដោយផ្អែកលើច្បាប់អន្តរជាតិ។
អត្ថបទគួរអាន
បើតាមមន្ត្រីជាន់ខ្ពស់ក្រុងតូក្យូ ក្នុងអំឡុងពេលកិច្ចពិភាក្សានៅឯសេតវិមាន មេដឹកនាំទាំងពីរត្រូវបានគេរំពឹងថា នឹងមានពិភាក្សាអំពីបញ្ហាទាក់ទងនឹងប្រទេសចិន ការអភិវឌ្ឍនុយក្លេអ៊ែរ និងមីស៊ីលរបស់កូរ៉េខាងជើង ក៏ដូចជាសង្រ្គាមឈ្លានពានរបស់រុស្ស៊ីលើអ៊ុយក្រែនផងដែរ។ មន្ត្រីរូបនោះបន្ថែមថា ក្នុងដំណើរទស្សនកិច្ចរបស់លោក គីស៊ីដា លោកនឹងស្វែងរកការពង្រឹងទំនាក់ទំនងយោធាទ្វេភាគីជាមួយប្រទេសចំនួនបួនផ្សេងទៀត មិនត្រឹមតែសហរដ្ឋអាមេរិកនោះទេ។
ជាក់ស្តែង គេឃើញពីការអភិវឌ្ឍរួមគ្នារបស់ប្រទេសជប៉ុន និងការផលិតយន្តហោះចម្បាំងជំនាន់ក្រោយ F-X របស់ខ្លួនជាមួយចក្រភពអង់គ្លេស និងអ៊ីតាលី សម្រាប់ការដាក់ពង្រាយ នៅឆ្នាំ២០៣៥។ សំណុំរឿងនេះ ក៏នឹងក្លាយជារបៀបវារៈកំពូលក្នុងអំឡុងពេលដំណើរទស្សនកិច្ចរបស់លោកនៅទីក្រុងរ៉ូម និងទីក្រុងឡុងដ៍ នៅថ្ងៃទី១០-១១ ខែមករានេះជាបន្តបន្ទាប់ផងដែរ។
លើសពីនោះ ជប៉ុន និងអង់គ្លេសក៏នឹងពិភាក្សាគ្នាអំពីកិច្ចព្រមព្រៀងប្រតិបត្តិការយោធាជាមួយគ្នាទៅវិញទៅមក។ ក្រៅពីសន្ធិសញ្ញាសន្តិសុខជប៉ុន-អាមេរិកដែលអនុញ្ញាតឱ្យទាហានអាមេរិកឈរជើងនៅក្នុងប្រទេសជប៉ុន ទីក្រុងតូក្យូក៏មានកិច្ចព្រមព្រៀងស្រដៀងគ្នានេះ ជាមួយប្រទេសអូស្ត្រាលីដែរ ហើយចក្រភពអង់គ្លេសនឹងស្ថិតនៅលំដាប់បន្តបន្ទាប់ក្នុងកិច្ចព្រមព្រៀងនេះ។
ដោយឡែក អំឡុងពេលពិភាក្សាជាមួយប្រធានាធិបតីបារាំងលោកម៉ាក្រុង នាយករដ្ឋមន្ត្រីជប៉ុនរំពឹងថានឹងនាំយកការព្រួយបារម្ភអំពីសកម្មភាពដែលកំពុងកើនឡើងរបស់ចិននៅក្នុងតំបន់ប៉ាស៊ីហ្វិកខាងត្បូង និងបញ្ជាក់ជាថ្មីពីសមយុទ្ធយោធារួមគ្នាជាមួយទីក្រុងប៉ារីសក៏ថាបាន៕
