ការចាកចេញពីឋានៈប្រទេសមានការអភិវឌ្ឍតិចតួច វាសបញ្ជាក់ភាពការរីកចម្រើននៃសេដ្ឋកិច្ចកម្ពុជា និងផ្ដល់ឱកាសសម្រាប់កម្ពុជាការប្រកួតប្រជែងស្មើមុខស្មើមាត់នៅលើឆាកអន្តរជាតិ។ ក៏ប៉ុន្តែ វាក៏នាំមកជាមួយបញ្ហាប្រឈមមួយចំនួនដែរ ដូចជាការបាត់បង់អត្ថប្រយោជន៍ និងប្រព័ន្ធអនុគ្រោះមួយចំនួន ដែលយើងកំពុងទទួលបាននាពេលបច្ចុប្បន្ន។
ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានគូសបញ្ជាក់ថា ប្រទេសកម្ពុជា បានបំពេញតាមលក្ខណៈវិនិច្ឆ័យជាលើកទី១ ដែលអាចត្រៀមខ្លួនចាកចេញពីចំណាត់ថ្នាក់ជាប្រទេសដែលមានអភិវឌ្ឍន៍តិចតួច ហើយនឹងត្រូវបានវាយតម្លៃម្តងទៀតនៅដើមឆ្នាំ២០២៤ ហើយកម្ពុជាអាចចាកចេញពីចំណាត់ថ្នាក់អភិវឌ្ឍតិចតួចនៅចុងឆ្នាំ២០២៧។ ការលើកឡើងរបស់ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បែបនេះ បានធ្វើឡើងក្នុងនាមជាតំណាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី៨ ខែមីនា ឆ្នាំ២០២៣ បានអញ្ជើញថ្លែងសន្ទរកថាគន្លឹះ ក្នុងកិច្ចប្រជុំពេញអង្គនៃសន្និសីទអង្គការសហប្រជាជាតិលើកទី៥ ស្ដីពីក្រុមប្រទេសអភិវឌ្ឍន៍តិចតួច (LDC) នៅទីក្រុងដូហា ប្រទេសកាតា ក្រោមប្រធានបទ៖ «Leaving No One Behind»។
អត្ថបទគួរអាន
ដ្បិត ការចាកចេញនេះ ស្របនឹងគោលនយោបាយរាជរដ្ឋាភិបាល ក្នុងការនាំកម្ពុជាឱ្យឈានដល់ប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសដែលមានចំណូលខ្ពស់នៅឆ្នាំ២០៥០ ក៏ដោយចុះ ក៏ប៉ុន្តែ កន្លងមក រាជរដ្ឋាភិបាលកម្ពុជា ក៏បានបង្ហាញនូវការព្រួយបារម្ភ ផងដែរ ជុំវិញការចាកចេញរបស់កម្ពុជាពីប្រទេសមានការអភិវឌ្ឍតិចតួចនេះ។ ការបារម្ភរបស់ប្រមុខរាជរដ្ឋាភិបាលកម្ពុជា ដូច្នេះ ដោយសារតែនៅពេលដែលកម្ពុជា ចាកចេញពីប្រទេសមានចំណូលមធ្យមកម្រិតទាប កម្ពុជានឹងបាត់បង់ការទទួលបានអត្រាការប្រាក់អនុគ្រោះពីប្រទេសរកចម្រើនមួយចំនួនដែលជាម្ចាស់ជំនួយ។ យ៉ាងណាក៏ដោយ ជុំវិញបញ្ហានេះ សម្ដេច ហ៊ុន សែន នាយករដ្ឋមន្រ្តីនៃកម្ពុជា ថ្មីៗនេះ នៅតែបន្តស្នើឲ្យម្ចាស់ជំនួយបន្តអនុគ្រោះលើអត្រាការប្រាក់សម្បទាន បើទោះបី កម្ពុជាចាកចេញពីប្រទេសមានចំណូលមធ្យមកម្រិតទាប ក៏ដោយ។ ត្រង់ចំណុចនេះ សម្ដេចបានបញ្ជាក់ថា កម្ពុជានៅតែមានតម្រូវការកម្ចីពីបរទេស ដើម្បីអភិវឌ្ឍន៍ហេដ្ឋារចនាសម្ព័ន្ធ ប៉ុន្តែ សម្ដេចមិនចង់ខ្ចីលុយពីខាងក្រៅក្នុងទំហំធំពេក នោះទេ ដូច្នេះ ទើបសម្ដេចបន្តអំពាវនាវដល់ប្រទេសជាម្ចាស់ជំនួយទាំងអស់ បន្តផ្ដល់ការអនុគ្រោះលើអត្រាការប្រាក់សម្បទានសម្រាប់កម្ពុជា។
សូមបញ្ជាក់ផងដែរថា រាជរដ្ឋាភិបាលកម្ពុជា បានកំណត់ចក្ខុវិស័យក្នុងការប្រែក្លាយកម្ពុជាឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០។ ខណៈបច្ចុប្បន្ន កម្ពុជាគឺស្ថិតនៅក្នុងឋានៈជាប្រទេសចំណូលមធ្យមកម្រិតទាប ហើយក្នុងឋានៈនេះ កម្ពុជាអាចមានសិទ្ធិខ្ចីប្រាក់ពីសមាគមអភិវឌ្ឍន៍អន្តរជាតិ (IDA) ជាមូលនិធិរបស់ក្រុមធនាគារពិភពលោក សម្រាប់ប្រជាជាតិក្រីក្របំផុត៕
