លោក Wang ដែលមានអាយុ ៦៧ ឆ្នាំត្រូវបានគេចាត់ទុកថា កំពុងស្ថិតក្នុងចំណោមបេក្ខជនកំពូលដែលនឹងត្រូវតែងតាំងដើម្បីស្នងតំណែងនាយករដ្ឋមន្ត្រីចិន ពីលោកលី ខឺឈាំង នៅពេលដែលលោក លី នឹងចាកចេញពីមុខតំណែងរបស់គាត់ក្នុងខែមីនា ឆ្នាំ២០២៣។ មុខតំណែង នាយករដ្ឋមន្ត្រីចិននេះ គឺដើរតួនាទីដ៏សំខាន់ក្នុងនាមជាអ្នកត្រួតពិនិត្យមើលគោលនយោបាយសេដ្ឋកិច្ចរបស់ប្រទេសមហាយក្សសេដ្ឋកិច្ចធំបំផុតទីពីររបស់ពិភពលោកមួយនេះ។
មែនទែនទៅ តំណែងនាយករដ្ឋមន្ត្រីគឺជាតំណែងខ្ពស់បំផុតទី២ បន្ទាប់ពីប្រធានាធិបតីនៅក្នុងជួរបក្សកុម្មុយនិស្តចិន តែវាហាក់មិនសូវមានឥទ្ធិពលទៅវិញ ក្រោយពីលោក Xi បានបង្រួបបង្រួមអំណាចផ្ទាល់ខ្លួន ព្រមទាំងបានដាក់ការក្តាប់អំណាចរដ្ឋយ៉ាងរឹងមាំ ពិសេសលើការគ្រប់គ្រងសេដ្ឋកិច្ចចិន ហើយប្រធានាធិបតីចិនរូបនេះ ត្រូវបានគេរំពឹងថា នឹងរក្សាអំណាចរបស់ខ្លួនជាបន្តទៀតក្នុងអាណត្តិទី៣ ដឹកនាំបក្សកុម្មុយនិស្តចិននៅសមាជបក្សនៅថ្ងៃទី១៦ តុលាខាងមុខនេះ។
គួរជម្រាបថា ក្នុងឆ្នាំ ២០១២ លោក Wang ត្រូវបានផ្ទេរទៅកាន់តំណែងជាគណៈកម្មាធិការអចិន្ត្រៃយ៍ការិយាល័យនយោបាយ ប៉ុន្តែ ក្នុងនាមជាឧបនាយករដ្ឋមន្ត្រី លោកបានជួយមើលការខុសត្រូវលើទំនាក់ទំនងសេដ្ឋកិច្ចខាងក្រៅរបស់ប្រទេសចិន រួមទាំងជាមួយសហរដ្ឋអាមេរិកផងដែរ។
អត្ថបទគូរអាន
បន្ថែមពីនេះ នៅឆ្នាំ ២០១៧ លោកត្រូវបានដំឡើងឋានៈជាបុគ្គលដែលមានអំណាចកំពូលទី៤ ក្នុងចំណោមបុគ្គលប្រាំពីររូបនៃបក្សកុម្មុយនិស្តចិន ហើយលោកក៏ជាប្រធាននៃសន្និសីទទីប្រឹក្សានយោបាយប្រជាជនចិន (CPPCC) ដែលជាស្ថាប័នប្រឹក្សានយោបាយដ៏មានឥទ្ធិពលមួយថែមទៀតផង។
ទោះជាយ៉ាងណាក៏ដោយ អ្នកឃ្លាំមើលមួយចំនួនអះអាងថា លោក Wang នឹងទទួលបានការជឿទុកចិត្តពីលោក ស៊ី ជីនពីង បន្ទាប់ពីបានរក្សាជំហរដាក់ខ្លួន និងបម្រើការដ៏ស្មោះត្រង់ជាមួយលោក ស៊ី ជីនពីង នៅក្នុងគណៈកម្មាធិការអចិន្ត្រៃយ៍បក្សអស់រយៈពេល ៥ ឆ្នាំកន្លងមកនេះ។
ក្នុងប៉ុន្មានឆ្នាំចុងក្រោយនេះក្រោមការដឹកនាំរបស់លោកប្រធានាធិបទី ស៊ី ជីនពីង លោក Wang ហាក់បីដូចមានការថ្នាំងថ្នាក់ខ្លះដែរទៅនឹងទំនោរកំណែទម្រង់របស់លោកស៊ី ដែលបានគូសបន្ទាត់ដ៏តឹងតែងរបស់បក្សកុម្មុយនិស្ដិចិន លើបញ្ហានយោបាយដ៏រសើប រួមមានបញ្ហាកោះតៃវ៉ាន់ តំបន់ស៊ីនជាំង និងទីបេ ទោះបីជា លោកនៅតែបង្ហាញពីការគាំទ្រដល់លោកស៊ីក៏ដោយ។
មួយវិញទៀត ក្នុងនាមជាប្រធាននៃសន្និសីទទីប្រឹក្សានយោបាយប្រជាជនចិន (CPPCC) លោក Wang បានដឹកនាំក្រុមគោលនយោបាយមួយនៅតំបន់ភាគខាងលិចនៃតំបន់ Xinjiang របស់ប្រទេសចិនផងដែរ ដែលជាកន្លែងជនជាតិភាគតិចមូស្លីមជាងមួយលាននាក់ត្រូវបានឃុំខ្លួននៅក្នុងជំរុំឃុំឃាំងនោះ។
ក្រៅតែពីលោក វ៉ាង យ៉ាង ក៏មានបេក្ខភាព សក្ដាពុលផ្សេងៗទៀតដែរ ក្នុងការប្រជែងតំណែងនាយករដ្ឋមន្ត្រីចិននេះ រួមមានដូចជា លោក Hu Chunhua លេខាបក្សកុម្មុយនិស្ដចិនប្រចាំខេត្តគ័ងទុងជាដើម៕
