យើងផ្តើមនិយាយពីលទ្ធផលនៃដំណើរការត្រួតពិនិត្យរបស់វ៉ាក់សាំង ស៊ីណូហ្វាម (Sinopharm)ជាមុនសិន។ ក្រុមអ្នកជំនាញឯករាជ្យនៃអង្គការសុខភាពពិភពលោកបានឲ្យដឹង នៅថ្ងៃទី៥ឧសភាថា ពួកគេពុំសូវមានជំនឿចិត្តលើទិន្នន័យផ្នែកខ្លះរបស់វ៉ាក់សាំង ស៊ីណូហ្វាមនោះទេ។ តើអ្វីដែលអ្នកជំនាញពុំសូវមានទំនុកចិត្ត?
ក្រុមអ្នកជំនាញអង្គការសុខភាពពិភពលោកបានប្រាប់ទីភ្នាក់ងារព័ត៌មាន Reuters ថា ពួកគេពុំសូវមានទំនុកចិត្តលើទិន្នន័យដែលថា «ផលរំខានសុខភាពធ្ងន់ធ្ងររបស់វ៉ាក់សាំងស៊ីណូហ្វាមលើមនុស្សចាប់ពីអាយុ ៦០ឆ្នាំឡើងទៅ មានកំរិតទាប» និង មិនសូវមានទំនុកចិត្តផងដែរ ទៅលើទិន្នន័យដែលថា «ផលរំខានសុខភាពធ្ងន់ធ្ងររបស់វ៉ាក់សាំងស៊ីណូហ្វាមលើមនុស្សដែលមានជំងឺប្រចាំកាយ មានកំរិតទាប»។។
គួរជម្រាបជូនថា ទិន្នន័យដែលក្រុមអ្នកជំនាញនៃអង្គការសុខភាពពិភពលោកយកមកបញ្ជាក់អះអាងទាំងអស់នេះ គឺយកមកពីការពិសោធន៍សាកល្បងលើកទី៣ នៅតាមមន្ទីរពិសោធន៍ជាច្រើនដូចជា នៅប្រទេសចិន បារ៉ែន អេហ្ស៊ីប និងអារ៉ាប់រួមជាដើម។
អត្ថបទទាក់ទង
ទោះយ៉ាងណាក៏ដោយ ក្រុមអ្នកជំនាញឯករាជ្យនៃអង្គការសុខភាពពិភពលោកទាំងអស់នោះ បានបង្ហាញពីការជឿជាក់ខ្លាំងទៅលើវ៉ាក់សាំងចិនស៊ីណូហ្វាមជុំវិញប្រសិទ្ធភាពរបស់វាចំពោះការការពារការឆ្លងកូវីដ-១៩ សម្រាប់មនុស្សវ័យ១៨ ដល់៥៩ឆ្នាំ។
ប្រសិទ្ធភាពនៃការសាកល្បងដំណាក់កាលទី៣នៅប្រទេសជាច្រើន បានបង្ហាញថា ស៊ីណូហ្វាមមានប្រសិទ្ធភាពក្នុងបរិមាណ ៧៨% អាចទប់ទល់នឹងកូវីដ-១៩ ក្រោយចាក់ដូសទី២។
គួរបញ្ជាក់ថាដែរថា វ៉ាក់សាំងចិនស៊ីណូហ្វាម ត្រូវបានអនុញ្ញាតឲ្យប្រើប្រាស់ជាង ៤៥ប្រទេសនិងដែនដីជុំវិញពិភពលោកសម្រាប់មនុស្សពេញវ័យ ហើយមកទល់នឹងពេលនេះ បានប្រើប្រាស់អស់ ៦៥លានដូសហើយ។
ដោយឡែក សម្រាប់វ៉ាក់សាំងចិនមួយប្រភេទទៀត គឺ ស៊ីណូវ៉ាក់ (Sinovac) ត្រូវបានក្រុមអ្នកជំនាញឯករាជ្យនៃ អង្គការសុខភាពពិភពលោកអះអាងស្រដៀងគ្នាដែរថា វាមានប្រសិទ្ធភាព ប៉ុន្តែនៅខ្វះខាតទិន្នន័យមួយចំនួន។
តើទិន្នន័យអ្វីដែលក្រុមអ្នកជំនាញឯករាជ្យ WHO អះអាងថា ខ្វះខាតនោះ?
ទិន្នន័យដែលខ្វះខាតនោះ គឺចង់សំដៅដល់ ភស្តុតាង ដែលបញ្ជាក់ថា វ៉ាក់សាំងស៊ីណូវ៉ាក់មិនមានផលរំខានដល់សុខខាពធ្ងន់ធ្ងរក្រោយពេលចាក់។
ស្រដៀងទៅនឹងវ៉ាក់សាំងស៊ីណូហ្វាមដែរ វ៉ាក់សាំងចិនស៊ីណូវ៉ាក់ត្រូវបានអ្នកជំនាញអង្គការសុខភាពពិភពលោកអះអាងថា ពួកគេមានជំនឿចិត្តកម្រិតមធ្យមប៉ុណ្ណោះទៅលើទិន្នន័យដែលថា «ផលរំខានសុខភាពធ្ងន់ធ្ងររបស់វ៉ាក់សាំងស៊ីណូវ៉ាក់លើមនុស្ស ដែលមានអាយុក្រោម ៥៩ឆ្នាំ មានកម្រិតទាប»។
លើសពីនេះក្រុមអ្នកជំនាញឯករាជ្យ WHO បន្តអះអាងថា ពួកគេ មានជំនឿចិត្តតិចតួចទៅលើទិន្នន័យដែលបង្ហាញថា «ផលរំខានសុខភាពធ្ងន់ធ្ងររបស់វ៉ាក់សាំងស៊ីណូវ៉ាក់ លើមនុស្សដែលមានអាយុលើ៦០ឆ្នាំ មានកម្រិតទាប»។
គួរជម្រាបជូនថា ទិន្នន័យដែលក្រុមអ្នកជំនាញអង្គការសុខភាពពិភពលោកយកមកអះអាងទាំងអស់នេះ គឺយកមកពីការពិសោធន៍សាកល្បងលើកទី៣ នៅតាមមន្ទីរពិសោធន៍ជាច្រើនដូចជា នៅប្រទេសចិន ប្រេស៊ីល ឥណ្ឌូនេស៊ី តួគី និងឈីលី។
យ៉ាងណាក៏ដោយអ្នកជំនាញបានទទួលស្គាល់ថា វ៉ាក់សាំងចិនស៊ីណូវ៉ាក់ពិតជាមានប្រសិទ្ធភាពអាចការពារអ្នកមានអាយុក្រោម ៦០ឆ្នាំ ពីការឆ្លងកូវីដ-១៩បានពិតប្រាកដមែន។
សូមបញ្ជាក់ថា វ៉ាក់សាំងចិនស៊ីណូវ៉ាក់ត្រូវបានអនុញ្ញាតឲ្យប្រើប្រាស់នៅជាង ៣២ប្រទេស និងដែនដីជុំវិញពិភពលោក សម្រាប់មនុស្សពេញវ័យ ហើយមកទល់នឹងពេលនេះ បានប្រើប្រាស់អស់ចំនួន ២៦០លានដូសហើយ។
បច្ចុប្បន្នអង្គការសុខភាពពិភពលោកបាននឹងកំពុងពិនិត្យវាយតម្លៃពីប្រសិទ្ធភាពវ៉ាក់សាំងទាំងពីរប្រភេទរបស់ចិននេះ គឺវ៉ាក់សាំងស៊ីណូហ្វាម និងស៊ីណូវ៉ាក់។ គេអាចនឹងសម្រេចថា តើ WHO នឹងទទួលស្គាល់ ឬមិនទទួលស្គាល់ លើគុណភាពវ៉ាកសាំងចិន នៅក្នុងពេលឆាប់ៗនេះ។ ប្រសិនបើ WHO ទទួលស្គាល់មែន នោះវ៉ាក់សាំងរបស់ចិននឹងត្រូវចុះក្នុងបញ្ជី ប្រើប្រាស់បន្ទាន់របស់អង្គការសុខភាពពិភពលោក។ ប្រការនេះនឹងត្រួសត្រាយផ្លូវឲ្យវ៉ាក់សាំងចិន អាចប្រើប្រាស់ក្នុងការរួមចំណែកដល់យន្តការជាសកល COVAX បាន។
ដោយឡែក ទីភ្នាក់ងារឱសថសហភាពអឺរ៉ុប បានប្រកាសកាលពីថ្ងៃទី៤ខែឧសភាដែរថា ខ្លួននឹងចាប់ផ្តើមនីតិវិធីត្រួតពិនិត្យគុណភាព សុវត្ថិភាព និងប្រសិទ្ធភាពរបស់វ៉ាក់សាំងចិន ស៊ីណូវ៉ាក់ (Sinovac) ដើម្បីឈានទៅប្រើប្រាស់វ៉ាក់សាំងមួយប្រភេទនេះ នៅលើទឹកដីអឺរ៉ុបផងដែរ៕
