WHO ថា អូមីក្រុង មានអត្រាឆ្លងលឿនបំផុតមិនធ្លាប់មាន និងជំរុញឱ្យប្រទេសនានាចាត់វិធានការឆ្លើយតបឲ្យបានលឿន

អង្គការសុខភាពពិភពលោក បានជំរុញឱ្យប្រទេសនានាធ្វើសកម្មភាព និងការរឹតបន្តឹងឡើងវិញ យ៉ាងឆាប់រហ័សដើម្បីគ្រប់គ្រងការឆ្លង និងការពារប្រព័ន្ធវិស័យ    សុខាភិបាលរបស់ពួកគេពីមេរោគបំប្លែងថ្មី អូមីក្រុង។ ល្បឿនចម្លងរបស់អូមីក្រុង បានធ្វើឱ្យករណីឆ្លងនៅទូទាំងពិភពលោកកើនឡើងកាន់តែខ្ពស់។ ជាក់ស្ដែង នៅអឺរ៉ុប បច្ចុប្បន្ននេះ ជាតំបន់មានករណីឆ្លងខ្លាំងជាងគេ មាន ៦២ ភាគរយនៃករណីកូវីដ១៩សរុបរបស់ពិភពលោក ក្នុងរយៈពេល ៧ ថ្ងៃចុងក្រោយនេះ។

ទន្ទឹមនេះ បណ្តាប្រទេសអ៊ឺរ៉ុបផ្សេងទៀតក៏បានដាក់កម្រិតឡើងវិញកាលពីថ្ងៃអង្គារ ខណៈប្រទេសហូឡង់ បានប្រកាស បិទសាលាបឋមសិក្សានៅសប្តាហ៍ក្រោយ និងបិទខ្ទប់នៅពេលយប់ ដោយព្រួយបារម្ភពីការរីករាលដាលនៃមេរោគ អូមីក្រុង។ ដោយឡែក នាយករដ្ឋមន្រ្តីអង់គ្លេស គ្រោងនឹងដាក់ចេញនូវច្បាប់ថ្មីស្តីពីការពាក់ម៉ាស់ ការធ្វើតេស្តរកមេរោគជាប្រចាំថ្ងៃ ដើម្បីជៀសវាងការធ្វើចត្តាឡីស័ក និងការជំរុញការចាក់វ៉ាក់សាំងជាដើម។ គួរជម្រាបថា អង់គ្លេសកាលពីថ្ងៃចន្ទសប្ដាហ៍នេះ បានបញ្ជាក់ពីករណីស្លាប់ដោយសារមេរោគ អូមីក្រុង ដំបូងគេបង្អស់របស់ពិភពលោកផងដែរ។ យ៉ាងណាមិញ គេមិនទាន់មានភស្តុតាងជាក់លាក់ណាមួយដែលបង្ហាញថា អូមីក្រុង  បណ្តាលឱ្យមានជំងឺធ្ងន់ធ្ងរទេ។

ក្រុមហ៊ុន Pfizer ថ្មីៗនេះបានសាកល្បងថ្នាំគ្រាប់ព្យាបាលកូវីដ១៩របស់ខ្លួន ដែលអាចកាត់បន្ថយការចូលសម្រាកព្យាបាលនៅមន្ទីរពេទ្យ និងការស្លាប់ដោយសារកូវីដ១៩ផងដែរ ហើយថ្នាំរបស់ក្រុមហ៊ុន Pfizer ក៏មានសមត្ថភាពអាចប្រឆាំងនឹងមេរោគអូមីក្រុងបានទៀតផង ខណៈដែលរដ្ឋបាលចំណីអាហារ និងឱសថអាមេរិក នឹងអនុញ្ញាតឱ្យប្រើក្នុងរយៈប៉ុន្មានថ្ងៃទៀតនេះ។

សូមបញ្ជាក់ថា រហូតមកទល់ពេលនេះ ប្រធានអង្គការសុខភាពពិភពលោក តេដ្រ្តូស បានឱ្យដឹងថា វត្តមានរបស់មេរោគបំប្លែងថ្មី អូមីក្រុងត្រូវបានរកឃើញប្រទេសចំនួន ៧៧ ហើយ ប្រហែលជា បាននិងកំពុងរីករាលដាលដល់ប្រទេសភាគច្រើន ដែលមិនទាន់បានអាចរកឃើញផងដែរ៕

អត្ថបទ៖ ស៊ើង និមល់