អគ្គនាយក WHO លោក តេដ្រូស បាននិយាយថា ការចាក់វ៉ាក់សាំងពិតជាអាចការពារអាយុជីវិត ព្រមទាំងកាត់បន្ថយហានិភ័យដែលវិវត្តទៅជាឈឺធ្ងន់ធ្ងរ និងស្លាប់ដោយសារតែកូវីដ១៩បានពិតមែន ប៉ុន្តែវានៅតែអាចឆ្លង និងរីករាលដាលបានដដែល ខណៈមនុស្សជាច្រើនចាប់ផ្ដើមត្រឡប់ទៅជួបជុំគ្នាឡើងវិញ។
ប្រធាន WHO សង្កត់ធ្ងន់ថា ទោះបីជាអ្នកបានចាក់វ៉ាក់សាំងក៏ដោយ តែចូលបន្តការប្រុងប្រយ័ត្នដើម្បីការពារកុំឱ្យឆ្លងទៅខ្លួនឯង និង អ្នកដ៏ទៃ ។ មានន័យថា ត្រូវតែ ពាក់ម៉ាស រក្សាគម្លាត ចៀសវាងការជួបជុំ និងជួបជាមួយអ្នកដទៃនៅខាងក្រៅ ឬត្រូវប្រាកដថា កន្លែងដែលអ្នកជួបជុំត្រូវមានខ្យល់ចេញចូលល្អ ហើយប្រសិនបើពលរដ្ឋទាំងអស់អាចអនុវត្តបាន នោះមិនចាំបាច់ងាកទៅរកការបិទខ្ទប់ប្រទេសឡើងវិញនោះទេ។
អឺរ៉ុបក្លាយជាចំណុចក្ដៅមួយនៃការផ្ទុះជំងឺរាតត្បាតកូវីដ១៩ជាថ្មី ដែលកំពុងរងសម្ពាធកាន់តែខ្លាំងឡើងៗ ទាំងប្រព័ន្ធថែទាំសុខាភិបាល និងពលរដ្ឋអឺរ៉ុប ខណៈករណីឆ្លងថ្មីនៅអឺរ៉ុប គឺមាន ៦៧% នៃករណីឆ្លងថ្មីសរុបរបស់ពិភពលោកកាលពីសប្តាហ៍មុននេះ។ ទន្ទឹមនេះ ករណីឆ្លងថ្មីនៅសហរដ្ឋអាមេរិកក៏បានកើនឡើង ២៣%ដែរ កាលពីសប្ដាហ៍មុនដែលជាសញ្ញាមួយបង្ហាញថា សហរដ្ឋអាមេរិកក៏អាចប្រឈមមុននឹងការឆ្លងរាតត្បាតកើនឡើងវិញផងដែរ។
អត្ថបទគួរអាន
ករណីឆ្លងកូវីដ១៩ចេះតែកើនឡើងខ្លាំងបែបនេះ បានជំរុញឱ្យប្រទេសមួយចំនួនបានចាត់វិធានការទប់ស្កាត់យ៉ាងតឹងរឹង និងខ្លះទៀតបានប្រកាសបិទប្រទេស ខណៈដែលអ្នកជំនាញផ្នែកសុខភាពបានជំរុញឱ្យពង្រីកយុទ្ធនាការចាក់ដូសជំរុញដល់ពលរដ្ឋបន្ថែមទៀត ពោល មជ្ឈមណ្ឌលបង្ការ និងគ្រប់គ្រងជំងឺអឺរ៉ុប (ECDC) បានណែនាំវ៉ាក់សាំងដូសជំរុញសម្រាប់មនុស្សពេញវ័យទាំងអស់ ជាមួយនឹងការផ្ដល់អាទិភាពសម្រាប់អ្នកដែលមានអាយុលើសពី ៤០ ឆ្នាំ ជាមុនដើម្បីបង្កើនប្រព័ន្ធភាពស៊ាំក្នុងរាងកាយ។
តាមការប៉ាន់ស្មានរបស់អង្គការសុខភាពពិភពលោក រហូតដល់ទៅដល់ខែមីនាឆ្នាំ២០២២ តំបន់អឺរ៉ុបនឹងមានអ្នកស្លាប់ដោយសារកូវីដ១៩នឹងកើនដល់ជាង២លាន២សែននាក់ ខណៈបច្ចុប្បន្ននៅតំបន់អឺរ៉ុបទាំងមូល មានករណីឆ្លងកូវីដ ១៩ សរុបប្រមាណ ៧១ លាននាក់ ហើយក្នុងនោះ ករណីស្លាប់មានជាង ១ លាន ៦សែននាក់៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
