របាយការណ៍ថ្មីរបស់ធនាគារពិភពលោក ដែលបានធ្វើបច្ចុប្បន្នភាពសេដ្ឋកិច្ចក្នុងតំបន់អាស៊ីបូព៌ានិងអាស៊ីប៉ាស៊ីហ្វិក បានព្យាករណ៍ថា សេដ្ឋកិច្ចចិននឹងកើនឡើង ៨,១% ក្នុងឆ្នាំ ២០២១ បើប្រៀបធៀបទៅនឹងឆ្នាំមុនដែលមានកំណើនត្រឹម ២,៣%ប៉ុណ្ណោះ ហើយកំណើនរបស់ចិននេះ នឹងអូសទាញកំណើនសេដ្ឋកិច្ចក្នុងតំបន់នៅឆ្នាំ២០២១នេះ ដល់ទៅ ៧,៤% ពោលគឺកើនឡើងពី ១,២% កាលពីឆ្នាំ ២០២០។
បើគេមិនរាប់បញ្ចូលកំណើនរបស់សេដ្ឋកិច្ចចិន សេដ្ឋកិច្ចក្នុងតំបន់អាស៊ីបូព៌ា និងអាស៊ីប៉ាស៊ីហ្វិកអាចមានកំណើនត្រឹម ៤,៤%ប៉ុណ្ណោះ។
ប្រទេសវៀតណាមត្រូវបានគេមើលឃើញថា ជាប្រទេសដែលមានសេដ្ឋកិច្ចលេចធ្លោមួយក្នុងតំបន់អាស៊ាន ដែលមានសមាជិក១០ប្រទេស ជាមួយនឹងអត្រាកំណើនដែលរំពឹងថា មានដល់ ៦,៦%ក្នុងឆ្នាំ២០២១ ពោលគឺកើនឡើងពី ២,៩% នៅឆ្នាំ២០២០។ គួរកត់សម្គាល់ថា ប្រទេសចិន និងវៀតណាមស្ថិតក្នុងចំណោមប្រទេសតិចតួច ដែលបានរងការវាយប្រហារតិចតួចដោយជំងឺរាតត្បាតកូវីដ-១៩ និងមានសេដ្ឋកិច្ចស្ទុះងើបឡើងវិញលឿនជាងគេ។
World Bank កត់សម្គាល់ថា កំណើនសេដ្ឋកិច្ចសម្រាប់រដ្ឋនីមួយៗ គឺពឹងផ្អែកលើការទប់ទល់ជាមួយជំងឺកូវីដ១៩ និងសមត្ថភាពរបស់រដ្ឋនីមួយៗ ក្នុងការទាញយកអត្ថប្រយោជន៍ពីការងើបឡើងវិញនៃពាណិជ្ជកម្មអន្តរជាតិព្រមទាំសមត្ថភាព របស់រដ្ឋាភិបាលក្នុងការផ្តល់ការគាំទ្រក្នុងវិស័យសារពើពន្ធ និងជំនួយហិរញ្ញវត្ថុ។
អត្ថបទគួរអាន
សម្រាប់កម្ពុជាវិញ ធនាគារពិភពលោកនៅតែបន្ដរក្សាការព្យាកររបស់ខ្លួនដដែល ថាកម្ពុជានឹងសម្រេចបានកំណើន៤% នៅឆ្នាំ២០២១ និងឆ្នាំ២០២២កើនដល់៥,២% បន្ទាប់ពីបានធ្លាក់ចុះជាង៣% កាលពី២០២០។ ទោះយ៉ាងណា អ្នកជំនាញសេដ្ឋកិច្ចខ្លះ បានលើកឡើងថា ការរាតត្បាតនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនេះ ទំនងជាអាចនឹងប៉ះពាល់ដល់ការព្យាករកំណើនសេដ្ឋកិច្ច៤%នៅឆ្នាំនេះ ខណៈដែលការត្បាតនៃជំងឺនៅតែបន្ដនៅឡើយ។
ដោយឡែក បើមើលទៅលើប្រទេសថៃវិញ តាមរយៈការព្យាករពីធនាគារពិភពលោកដដែលនេះ ហាក់ដូចជាមានការទម្លាក់ការព្យាករទាបជាងមុនបន្តិចមកនៅត្រឹមតែ ៣,៤% នៅឆ្នាំ២០២១ ខណៈការព្យាករពីមុនថាមានដល់៤% ដោយសារថាការងើបឡើងវិញធ្វើឡើងដោយសន្សឹមៗចំពេលដែល មានភាពមិនប្រាកដប្រជាខ្ពស់ និងចុះទន់ខ្សោយនៃវិស័យទេសចរណ៍របស់ថៃ។
កាលពីឆ្នាំ២០២០ សេដ្ឋកិច្ចថៃដាំក្បាលចុះដល់ទៅជាង -៦%ឯណោះ ដែលជាការធ្លាក់ចុះខ្លាំងបំផុតក្នុង២ទសវត្សរ៍កន្លងមកនេះ។
ដោយឡែក វិស័យទេសចរណ៍ពិភពលោកត្រូវបានគេរំពឹងថា នឹងនៅតែប្រឈមនឹងបញ្ហាខ្លាំងដែលបណ្ដាលមកពីការរីករាលដាលនៃកូវីដ-១៩ ហើយវានឹងមិនទាន់ធូរស្បើយវិញទេ រហូតដល់ឆ្នាំ ២០២៣ ហើយវាអាចនឹងពន្យារពេលដល់ការស្ទុះងើបឡើងវិញ នៃសេដ្ឋកិច្ចរបស់ប្រទេស ដែលពឹងផ្អែកខ្លាំងលើវិស័យទេសចរណ៍ ពិសេសប្រទេសក្នុងតំបន់អាស៊ានរួមមាន ថៃ និងកម្ពុជាជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
