ប្រទេសមហាអំណាចនុយក្លេអ៊ែរទាំង៥ ចេញសេចក្តីថ្លែងការណ៍រួមដ៏កម្រ ប្តេជ្ញាជៀសវាងសង្គ្រាមអាវុធនុយក្លេអ៊ែរ

បើតាមសេចក្តីថ្លែងការណ៍ដដែលពី ប្រទេសទាំង៥ដែលសុទ្ធសឹងជាមហាអំណាចនុយក្លេអ៊ែរ និងជាសមាជិកអចន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិផងដែរនោះ បានចាត់ទុកការបញ្ចៀសសង្គ្រាមរវាងប្រទេសដែលមានអាវុធនុយក្លេអ៊ែរ និងប្រទេសមានអាវុធនុយក្លេអ៊ែរដូចគ្នា ថាជាកាតព្វកិច្ចមួយ ដែលត្រូវធ្វើ។ ជាមួយគ្នានេះ ភាគីទាំង៥បានបង្ហាញការតាំងចិត្តខ្ពស់ ក្នុងការធ្វើការងារជាមួយប្រទេសទាំងអស់ ដើម្បីបង្កើតសន្តិភាពសម្រាប់ពិភពលោកផងដែរ។

នៅក្នុងសេចក្ដីថ្លែងការណ៍រួមនោះប្រទេសទាំង៥បានបញ្ជាក់យ៉ាងដូច្នេះថា «យើងសូមបញ្ជាក់អះអាងថា សង្គ្រាមនុយក្លេអ៊ែរ គឺមិនអាចឈ្នះបានទេ ហើយក៏មិនត្រូវឲ្យមានការប្រយុទ្ធវាយប្រហារណាមួយកើតឡើងដែរ»។

ជំនួសឲ្យការប្រើប្រាស់ជាការគម្រាមកំហែង និងការបង្ករសង្គ្រាម នុយក្លេអ៊ែរគួរតែត្រូវបានប្រើប្រាស់សម្រាប់ការការពារ រារាំងការឈ្លានពាន និងការពារកុំឲ្យមានសង្គ្រាមទៅវិញទេ។ នេះជាអ្វីដែលភាគីទាំង៥បានលើកឡើង។

ងាកទៅមើលភាគីចិនដែលត្រូវបានសារព័ត៌មានចិនស៊ីនហួរចុះផ្សាយបន្តិច ឃើញថាភាគីចិនតាមរយៈអនុរដ្ឋមន្ត្រីការបរទេសលោក ម៉ា ចៅឈូ (Ma Zhaoxu) បាននិយាយថា សេចក្តីថ្លែងការណ៍រួមដ៏កម្រនេះ អាចជួយបង្កើនការជឿទុកចិត្តគ្នាទៅវិញទៅមក និង ការសម្របសម្រួល និងកិច្ចសហប្រតិបត្តិការ ដែលជំនួសឲ្យការប្រកួតប្រជែងក្នុងចំណោមមហាអំណាចធំៗ។ លោកបន្ថែមថា សម្រាប់ប្រទេសចិន នឹងមិនប្រើប្រាស់គោលនយោបាយ នុយក្លេអ៊ែរជាគោលនយោបាយទី១នោះទេ។

គួរកត់សម្គាល់ថា សេចក្តីថ្លែងការណ៍រួមខាងលើរបស់មហាអំណាចទាំង៥ ដែលគេស្គាល់ដោយខ្លីថា P5 ធ្លាក់មកចំពេលដែលទំនាក់ទំនងទ្វេភាគីរវាងអាមេរិក និងរុស្សីបានធ្លាក់ដល់ចំណុចអាក្រក់បំផុត ចាប់តាំងពីក្រោយសង្គ្រាមត្រជាក់មក ខណៈទំនាក់ទំនងទ្វេភាគីរវាងមហាអំណាចអាមេរិក និងចិនវិញ ដូចដែលយើងបានដឹងស្រាប់ហើយគឺ មិនទាន់រកច្រកចេញពីជម្លោះសេដ្ឋកិច្ចពាណិជ្ជកម្ម ក៏ដូចជាជម្លោះនយោបាយការទូតបាននៅឡើយទេ។

គួរបញ្ជាក់ថា មន្ទីរបញ្ជកោណអាមេរិកកាលពីខែវិច្ឆិកាឆ្នាំមុន បានប៉ាន់ប្រមាណថា ប្រទេសចិនបានបង្កើនចំនួនគ្រាប់នុយក្លេអ៊ែរកាន់តែច្រើនជាងមុន នៅប៉ុន្មានឆ្នាំចុងក្រោយនេះ។ ក្នុងនោះចំនួន ក្បាលគ្រាប់នុយក្លេអ៊ែររបស់ចិន ត្រូវបានប៉ាន់ប្រមាណថា អាចកើនដល់ជាង ៧០០គ្រាប់នៅឆ្នាំ២០២៧ និងអាចមានរហូតដល់ ១ពាន់គ្រាប់នៅឆ្នាំ២០៣០។

ទាក់ទងនឹងអាវុធនុយក្លេអ៊ែរនេះ កន្លងមក មហាអំណាចអាមេរិក និងមហាយក្សចិន ក៏ធ្លាប់បានប៉ះពារពាក្យសម្ដីគ្នាខ្លះដែរ ដោយអាមេរិកបង្ហាញពីក្ដីបារម្ភក្រោយមានរបាយការណ៍ឃើញពីការកើនឡើងក្បាលគ្រាប់នុយក្លេអ៊ែររបស់ចិនកាន់តែច្រើនឡើង។  ភាគីចិនក៏បានឆ្លើយតបទៅវិញដែរ ឃ្លាំងអាវុធរបស់ខ្លួន គឺនៅតូចតាចណាស់ បើធៀបនឹងអ្វីដែល សហរដ្ឋអាមេរិក និងរុស្ស៊ីមាន។ក្រុងប៉េកាំងសង្កត់ធ្ងន់ថា ខ្លួនត្រៀមរួចជាស្រេច សម្រាប់ការសន្ទនាដោយបើកចំហ ប៉ុន្តែលុះត្រាតែទីក្រុងវ៉ាស៊ីនតោនកាត់បន្ថយឃ្លាំងអាវុធនុយក្លេអ៊ែររបស់ខ្លួន ដល់កម្រិតរបស់ចិនកំពុងមាននេះជាមុន សិន។សូមជម្រាបថា សហរដ្ឋអាមេរិក ជាប្រទេសមានក្បាលគ្រាប់នុយក្លេអ៊ែរច្រើនជាងគេបំផុតក្នុងលោក ពោលគឺមានសរុបដល់ជាង៣ពាន់៧រយគ្រាប់៕