ថ្លែងក្នុងសមាជបក្សកុម្មុយនិស្តចិន កាលពីថ្ងៃទី២៣ ខែតុលា ឆ្នាំ២០២២ លោក ស៊ី ជីនពីង បានសន្យាជំរុញសកម្មភាពការងារទាំងអស់នៃប្រព័ន្ធច្នៃប្រឌិតបច្ចេកវិទ្យាជាន់ខ្ពស់របស់ចិន ដោយការរួមបញ្ចូលគ្នាទាំងយោធា ស៊ីវិល និងបច្ចេកទេសឈានមុខរបស់វិស័យឯកជនក្នុងបច្ចេកវិទ្យាការពារជាតិ។
នៅក្នុងបរិបទដែលរុស្ស៊ីកំពុងឈ្លានពានអ៊ុយក្រែន និងបញ្ហារវាងចិន និងតៃវ៉ាន់ បានធ្វើឱ្យមានតានតឹងខ្លាំងរវាង ក្រុងប៉េកាំង និង វ៉ាស៊ីងតោន។ ជុំវិញបញ្ហានេះ បក្សកុម្មុយនិស្តចិន បាននឹងកំពុងប្រើប្រាស់ប្រព័ន្ធជាតិទាំងមូល ដើម្បីជំរុញការអភិវឌ្ឍកម្មវិធីសព្វាវុធ និងអវកាស។
គួររំលឹកថា កាលពីខែមុន លោក ស៊ី ជីនពីង បានតែងតាំងលោក Jin Zhuanglong ជារដ្ឋមន្រ្តីក្រសួងឧស្សាហកម្ម និងបច្ចេកវិទ្យាព័ត៌មាន និងបន្តតំណែងជាអនុប្រធានក្រុមហ៊ុនវិទ្យាសាស្រ្តអវកាស និងបច្ចេកវិទ្យារបស់ចិន ហៅកាត់ថា CASC។ កាលពីមុន លោកគឺជាអនុប្រធានការិយាល័យនៃគណៈកម្មការអភិវឌ្ឍសមាហរណកម្មស៊ីវិលយោធាមជ្ឈិម។
កាលពីខែសីហាឆ្នាំមុន លោក Huai Jinpeng ត្រូវបានតែងតាំងជារដ្ឋមន្រ្តីក្រសួងអប់រំ ដែលពីមុនលោកគឺប្រធានសាកលវិទ្យាល័យ Beihang ដែលមានឯកទេសលើការអភិវឌ្ឍបច្ចេកវិទ្យាអវកាស។
អត្ថបទគួរអាន
ក្រៅពីនោះក៏រួមមានទាំងលោក Ma Xingrui ផងដែរ ដែលលោកបានចូលរួមសម្រេចសមិទ្ធផលអវកាសដ៏ធំធេងរបស់ចិន ក្នុងការចុះចតយានដំបូងលើភពព្រះចន្ទ ក្នុងឆ្នាំ២០១៣។ លោកត្រូវបានតែងតាំងជាលេខាបក្សទទួលបន្ទុកតំបន់ស៊ីនជាំង កាលពីខែធ្នូឆ្នាំមុន។ ជាមួយគ្នានោះ លោក Zhang Qingwei ត្រូវបានតែងតាំងជាប្រធានបក្សកុម្មុយនិស្តប្រចាំខេត្ត Hunan កាលពីខែតុលា ឆ្នាំ២០២១ ដែលលោកជាអ្នកជួយឱ្យចិនសម្រេចបាននូវការបញ្ជូនមនុស្សទៅកាន់អវកាសជាលើកដំបូងកាលពីឆ្នាំ២០០៣។
គួរកត់សម្គាល់ថា ក្នុងរយៈពេលប៉ុន្មានឆ្នាំចុងក្រោយនៃអាណត្តិដឹកនាំរបស់លោកប្រធានាធិបតីចិន ស៊ី ជីនពីង នេះ គឺប្រទេសចិនបានបង្ហាញភាពលេចធ្លោយ៉ាងខ្លាំងបំផុតលើវិស័យអវកាស ដែលស្ទើតែគ្មានប្រទេសណាមួយអាចប្រៀបផ្ទឹមបាន ពោលគឺបានក្លាយជាគូប្រជែងដ៏ស្វិតស្វាញជាមួយអាមេរិក និងរុស្ស៊ី។
កាលពីខែមករា ឆ្នាំ២០១៩៖ ចិនបានក្លាយជាប្រទេសទី១ ដែលចុះចតយានលើផ្នែកងងឹតម្ខាងទៀតនៃឋានព្រះចន្ទ។ ក្រោយមកទៀត នៅខែធ្នូ ឆ្នាំ២០២០ បេសកកម្ម Changé 5 របស់ចិន បាននាំយកគំរូភពព្រះចន្ទ ត្រឡប់មកផែនដីវិញ ដែលនេះគឺជាលើកដំបូងក្នុងរយៈពេល ៤៤ឆ្នាំ បន្ទាប់ពីយានរបស់សូវៀត យកគំរូព្រះចន្ទ មកផែនដីក្នុងឆ្នាំ១៩៧៦។ នៅខែឧសភា ឆ្នាំ២០២១ ចិនក្លាយជាប្រទេសដំបូងគេ ដែលបានបញ្ជូនយាន Zhurong ទៅកាន់គន្លងភពអង្គារ រួចចុះចត និងធ្វើប្រតិបត្តិការលើផ្ទៃដីភពនោះ។
សម្រាប់ថ្ងៃអនាគតវិញ ចិនក៏មានផែនការបញ្ជូនយានទី២ ដើម្បីចុះចតលើភពអង្គារនៅឆ្នាំ២០២៨ ក្នុងគោលបំណងនាំយកគំរូមកពីភពនោះមកកាន់ផែនដីវិញ។ ក្រៅពីនេះ ចិនក៏គ្រោងសង់ស្ថានីយស្រាវជ្រាវលើភពព្រះចន្ទ បញ្ជូនយានទៅភពសុក្រ និងភពព្រហស្បតិ៍ ហើយក៏គ្រោងបាញ់បង្ហោះតេឡេស្កុបអវកាសនៅឆ្នាំ២០២៤ ដែលស្រដៀងនឹងតេឡេស្កុបរបស់អាមេរិក Hubble Space ផងដែរ៕
អត្ថបទ៖ នៅ សំភី
