ជុំវិញបញ្ហានេះ សម្តេចធិបតី បានសម្រេចប្រគល់ភារកិច្ចជូនឯកឧត្តម គី តិច ប្រធានក្រុមមេធាវីរបស់រាជរដ្ឋាភិបាលឱ្យជួយការពារប្រជាពលរដ្ឋ និងធ្វើជាតំណាងប្រជាពលរដ្ឋនៅក្នុងសំណុំរឿងទាំងឡាយ ដែលកំពុងចាត់ការដោយស្ថាប័នអយ្យការ និងស្ថាប័នតុលាការ។ ការសម្រេចបែបនេះរបស់សម្តេចធិបតី ធ្វើឡើងដើម្បីឆ្លើយតបនឹងសំណូមពររបស់ប្រជាពលរដ្ឋដែលរងគ្រោះក្នុងករណីគម្រោងរបស់អតីតឧកញ៉ា ឡេង ចាន់ណា ដែលបានស្នើសុំកិច្ចអន្តរាគមន៍ពីសម្តេចធិបតី។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១៥ ខែឧសភា ឆ្នាំ២០២៤ បានគូសបញ្ជាក់ថា តបតាមសំណូមពររបស់ប្រជាពលរដ្ឋដែលរងគ្រោះក្នុងករណីគម្រោងរបស់អតីតឧកញ៉ា ឡេង ចាន់ណា សម្តេចធិបតីបានសម្រេចប្រគល់ភារកិច្ចជូនក្រុមមេធាវីរបស់រាជរដ្ឋាភិបាល ដែលមានឯកឧត្តម គី តិច ជាប្រធាន ដើម្បីធ្វើយ៉ាងណាខិតខំការពារពលរដ្ឋរងគ្រោះក្នុងករណីនេះ ព្រមទាំងផ្តល់នូវជំនួយផ្នែកច្បាប់នានាតាមការចាំបាច់ ជាពិសេសការពារផលប្រយោជន៍របស់ប្រជាពលរដ្ឋតាមផ្លូវតុលាការ។
ទន្ទឹមនេះ សម្តេចធិបតី ក៏បានស្នើដល់មេធាវីរាជរដ្ឋាភិបាល ព្រមទាំងស្ថាប័នពាក់ព័ន្ធមានសមត្ថកិច្ចទាំងអស់ ខិតខំយកចិត្តទុកដាក់ក្នុងការការពារផលប្រយោជន៍របស់ប្រជាពលរដ្ឋ ដែលរងគ្រោះនៅក្នុងសំណុំរឿងនេះ ហើយធានាឱ្យបាននូវការអនុវត្តច្បាប់ឱ្យបានម៉ឺងម៉ាត់ទៅតាមនីតិវិធីជាធរមាន។
អត្ថបទគួរអាន
ជាមួយគ្នានេះ សម្តេចធិបតី បានរំលឹកថា ក្រោយពេលសម្តេចឃើញមានការផ្សព្វផ្សាយតាមប្រព័ន្ធបណ្ដាញសង្គមអំពីករណីទាមទារសំណងរបស់ប្រជាពលរដ្ឋ ដែលបានវិនិយោគជាមួយគម្រោង ប្រ៊ីលានស៊ីធី នៅខេត្តសៀមរាប របស់អតីតឧកញ៉ា ឡេង ចាន់ណា នៅក្នុងអំឡុងពាក់កណ្តាលខែកុម្ភ: ឆ្នាំ២០២៤ សម្តេចធិបតីបានប្រគល់ភារកិច្ចជូនឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្មនិងសំណង់ និងឯកឧត្តម ប្រាក់ សោភ័ណ្ឌ អភិបាលខេត្តសៀមរាប និងក្រុមជំនួយការច្បាប់របស់សម្តេចចុះស្រាវជ្រាវ ក៏ដូចជារិះរកដំណោះស្រាយលើករណីនេះ។ ក្រោយមានការបញ្ជាពីសម្តេចធិបតី ឯកឧត្តម សាយ សំអាល់ បានព្យាយាមសម្របសម្រួលជាមួយក្រុមហ៊ុន ក្នុងគោលបំណងរកដំណោះស្រាយជូនប្រជាជនទៅតាមលទ្ធភាព និងជំហានដែលអាចធ្វើទៅបាន ប៉ុន្តែដំណោះស្រាយតាមវិធីនេះពុំអាចធ្វើទៅបាននោះទេ។
បើតាមប្រមុខរាជរដ្ឋាភិបាលកម្ពុជា ក្រោយសមត្ថកិច្ចបានចុះស៊ើបអង្កេត និងស្រាវជ្រាវករណីខាងលើ បានរកឃើញថា គម្រោងវិនិយោគរបស់ក្រុមហ៊ុន ប្រ៊ីលាន ស៊ីធី ពុំមានលក្ខណៈជាគម្រោងវិនិយោគអចលនទ្រព្យ ដូចទៅនឹងគម្រោងវិនិយោគអចលនទ្រព្យពិតប្រាកដ ដែលបានជួបប្រឈមឧបសគ្គជាមួយនឹងបញ្ហានៃការធ្លាក់ចុះទីផ្សារនោះទេ ប៉ុន្តែផ្ទុយទៅវិញគម្រោងរបស់បុគ្គល ឡេង ចាន់ណា មានលក្ខណៈជាប្រព័ន្ធឆ.បោ.កតាមរូបមន្ត Ponzi Scheme។
ក្រោយទទួលបានលទ្ធផលស៊ើបអង្កេតរបស់អាជ្ញាធរ នៅថ្ងៃទី១២ ខែមីនា ឆ្នាំ២០២៤ សម្តេចធិបតី ក៏បានបញ្ជាឱ្យកម្លាំងសមត្ថកិច្ចអនុវត្តច្បាប់ឱ្យបានម៉ឺងម៉ាត់ និងឈានទៅឃាត់ខ្លួនបុគ្គលឈ្មោះ ឡេង ចាន់ណា ដើម្បីបញ្ជូនទៅតុលាការតាមនីតិវិធីជាធរមាន និងបានធ្វើសំណើថ្វាយព្រះមហាក្សត្រនៃកម្ពុជា ដើម្បីបញ្ចប់ងារជាឧកញ៉ា ពីបុគ្គល ឡេង ចាន់ណា ផងដែរ។
សម្តេចធិបតី ហ៊ុន ម៉ាណែត បានអះអាងថា ទោះបីជាសំណុំរឿងនេះកំពុងស្ថិតក្នុងដៃរបស់តុលាការ ក៏រាជរដ្ឋាភិបាលនៅតែបន្តតាមដានករណីនេះជាប្រចាំ និងបានប្រគល់ភារកិច្ចឱ្យសមត្ថកិច្ចពាក់ព័ន្ធបន្តការស្រាវជ្រាវ និងសហការគាំទ្រដល់ដំណើការរបស់តុលាការគ្រប់រូបភាពដែលច្បាប់អនុញ្ញាត ធ្វើយ៉ាងណារួមគ្នាដោះស្រាយបញ្ហាជូនប្រជាពលរដ្ឋឱ្យអស់លទ្ធភាពទៅតាមផ្លូវច្បាប់ផងដែរ៕
None
