សមាជិកសភាម៉ាឡេស៊ី ស្នើឱ្យរដ្ឋកំណត់ឱ្យមានប្រាក់ខែទី១៣ ដើម្បីជួយឱ្យពលរដ្ឋមានលុយបន្ថែមសម្រាប់វិនិយោគ

សមាជិកសភាម៉ាឡេស៊ី លោក ស៊ីម ហ្ស៊ី ហ្ស៊ីន (Sim Tze Tzin) បានថ្លែងទៅកាន់សភាកាលពីថ្ងៃទី២២ ខែតុលា ថា រដ្ឋគួរតែកំណត់ឱ្យមានប្រាក់ខែទី១៣ ដែលអនុញ្ញាតឱ្យកម្មករនិយោជិតទទួលបានប្រាក់ខែ២ខែឌុបនៅរៀងរាល់ចុងខែធ្នូ។ ប្រាក់ខែបន្ថែមនេះ កម្មករនិយោជិតអាចយកទៅប្រើប្រាស់សម្រាប់ការវិនិយោគ និងការបង្កើនប្រាក់ចំណូលព្រមទាំងរ៉ាប់រងការចំណាយផ្សេងទៀតដូចជាការចំណាយលើការសិក្សាជាដើម។

សមាជិកសភារូបនេះបានលើកឡើងថា ក្នុងនាមជាពលរដ្ឋសាមញ្ញ ពួកគេពឹងផ្អែកតែលើប្រាក់ខែប៉ុណ្ណោះ គឺពួកគេគ្មានដើមទុនដើម្បីវិនិយោគ និងទទួលបានផលចំណេញនោះទេ។ ប្រាក់ខែរបស់ពួកគេ គឺចំណាយគ្មានសល់ ពោលគឺចំណាយ១០០% ទៅលើការរស់នៅប្រចាំថ្ងៃ។ ដូច្នេះកម្មករនិយោជិតទូទៅគ្មានលុយបន្ថែមសម្រាប់ការវិនិយោគនោះទេ។

សមាជិសភារូបនេះបានលើកឡើងថា លោកបានលើកសំណើប្រាក់ខែទី១៣នេះទៅកាន់បណ្ដាក្រុមហ៊ុនឯកជន និងរដ្ឋាភិបាលដើម្បីពិចារណារួចហើយ។ លោកបានធ្វើការកត់សម្គាល់ថា ប្រព័ន្ធប្រាក់ខែទី១៣ នេះត្រូវបានគេអនុម័តរួចហើយនៅក្នុងក្រុមហ៊ុនឯកជនមួយចំនួន ហើយថា ប្រព័ន្ធប្រាក់ខែទី១៣នេះមានជាទូទៅទៅហើយនៅក្នុងប្រទេសផ្សេងទៀត។

ដោយឡែក លោក ក៏បានស្នើឱ្យក្រសួងសុខាភិបាលជួយត្រួតពិនិត្យ និងគ្រប់គ្រងថ្លៃសេវាព្យាបាលឱ្យបានសមស្របនៅតាមមន្ទីរពេទ្យឯកជនផងដែរ ដើម្បីជួយសម្រាលបន្ទុករបស់ពលរដ្ឋ៕

ដោយ: តែម សុខុម