កសិករអូស្ត្រាលី បំផ្លាញដំណាំទំពាំងបាយជូទាំងចម្ការៗ ក្រោយតម្លៃចុះថោកខ្លាំងពេក

ការធ្លាក់ចុះតម្រូវការស្រាទូទាំងពិភពលោក បានជះផលប៉ះពាល់ដល់អូស្ត្រាលី យ៉ាងធ្ងន់ធ្ងរ នៅពេលតម្រូវការស្រាក្រហមតម្លៃថោក ដែលជាផលិតផលដ៏សំខាន់បំផុតរបស់ខ្លួនធ្លាក់ចុះលឿនបំផុតមិនធ្លាប់មាន រួមទាំងនៅទីផ្សារប្រទេសចិន ដែលខ្លួនបានពឹងផ្អែកសម្រាប់កំណើនរហូតមកទល់នឹងប៉ុន្មានឆ្នាំចុងក្រោយនេះ។

តួលេខចុងក្រោយបំផុតបង្ហាញថា ប្រទេសអូស្ត្រាលី ដែលជាអ្នកនាំចេញស្រាធំបំផុតទី៥ របស់ពិភពលោកមានស្រាក្នុងស្តុករហូតដល់ទៅជាង២ពាន់លានលីត្រ នៅពាក់កណ្តាលឆ្នាំ២០២៣ ហើយដោយសារតែជោរជន់ខ្លាំងពេក ម្ចាស់ស្រាទាំងនោះកំពុងលក់វាចេញយ៉ាងតក់ក្រហល់ក្នុងតម្លៃថោកៗ។

កសិករម្នាក់ឈ្មោះ ជេមស៍ គ្រីម៉ាស្កូ (James Cremasco) ដែលជាអ្នកដាំដំណាំទំពាំងបាយជូជំនាន់ទី៤ នៅក្នុងទីក្រុងហ្គ្រីហ្វីហ្វ (Griffith) បានត្អូញត្អែរថា ជាយូរមកហើយដែលពួកគេបន្តដាំទំពាំងបាយជូទាំងខាតដើម។

ប្រហែល២ភាគ៣នៃដំណាំទំពាំងបាយជូរបស់ប្រទេសអូស្ត្រាលី ត្រូវបានដាំដុះនៅក្នុងតំបន់ដែលមានការរៀបប្រព័ន្ធធារាសាស្រ្តត្រឹមត្រូវដូចជាទីក្រុងហ្គ្រីហ្វីហ្វ (Griffith) ជាដើម។ ​ខណៈពេលដែលក្រុមហ៊ុនផលិតស្រាធំៗដូចជា ត្រេសឺរី វ៉ាញស៍ (Treasury Wines) និងក្រុមហ៊ុន អាខូឡេត វ៉ាញស៍ (Accolade Wines) ជាដើម ផ្តោតឡើងវិញលើដបស្រាដែលមានតម្លៃថ្លៃជាងមុន ដើម្បីលក់បានថ្លៃជាងមុន តំបន់ជុំវិញក្រុងហ្គ្រីហ្វីហ្វ (Griffith) កំពុងជួបការលំបាកដោយទំពាំងបាយជូទុំជ្រុះពេញចម្ការ ព្រោះគ្មានអ្នកទិញ ឬលក់មិនចេញ។ ​

កសិករម្នាក់ទៀតឈ្មោះ អែនឌ្រូ ខាឡាប្រៀ (Andrew Calabria) ដែលជាម្ចាស់ចម្ការទំពាំងបាយជូរជំនាន់ទី៣ និងជាអ្នកផលិតស្រានៅក្រុមហ៊ុន ខាឡាប្រៀ វ៉ាញស៍ (Calabria Wines) បានត្អួញត្អែរថា ពួកគេពិបាកចិត្តខ្លាំងណាស់ ​និងមានអារម្មណ៍ថា សម័យកាលទំពាំងបាយជូររីកចម្រើនបានឈានដល់ទីបញ្ចប់ហើយ។ ​

យោងតាមទិន្នន័យពី Wine Australia ដែលជាស្ថាប័នគ្រប់គ្រងឧស្សាហកម្មស្រារបស់អូស្ត្រាលី បង្ហាញថា ស្រាក្រហម​បានទទួលរងផលប៉ះពាល់ខ្លាំងបំផុត។ នៅតំបន់ដូចជា ហ្គ្រីហ្វីហ្វ (Griffith) ជាដើម ទំពាំងបាយជូបានធ្លាក់ចុះខ្លាំងមកនៅជាមធ្យមត្រឹម២០០ដុល្លារអាម៉េរិក ក្នុងមួយតោនកាលពីឆ្នាំមុន ដែលជាតម្លៃទាបបំផុតមិនធ្លាប់មានក្នុងរយៈពេលរាប់ទសវត្សរ៍មកនេះ និងធ្លាក់ចុះពី៤៣៨ដុល្លារអាម៉េរិក ក្នុងមួយតោនក្នុងឆ្នាំ២០២០៕

ដោយ: តែម សុខុម