ក្រុមហ៊ុនម៉ាតកាណាដាមួយ ស្នើសុំទិញទិញភាគហ៊ុនរបស់ 7-Eleven ក្នុងតម្លៃ៣៨ពាន់លានដុល្លារ

តាមសេចក្តីរាយការណ៍របស់សារព័ត៌មានបរទេសនានា បានឲ្យដឹងថា ក្រុមហ៊ុនម៉ាតខ្នាតយក្សរបស់កាណាដា Alimentation Couche-Tard ដែលជាម្ចាស់ប្រតិបត្តិករម៉ាត Circle K កំពុងដាក់សំណើស្នើសុំទិញភាគហ៊ុនពីក្រុមហ៊ុនប្រតិបត្តិករម៉ាត 7-Eleven របស់ជប៉ុន គឺក្រុមហ៊ុន Seven & i Holdings។

ជាមួយគ្នានេះ ក្រុមហ៊ុន Seven & i Holdings កំពុងបង្កើតគណៈកម្មាធិការដើម្បីពិនិត្យលើសំណើនេះ។

ក្រុមហ៊ុន Seven & i Holdings បានបញ្ជាក់នៅក្នុងសេចក្តីថ្លែងមួយថា សំណើសម្ងាត់មួយត្រូវបានស្នើដោយ Alimentation Couche-Tard ដើម្បីទទួលបានភាគហ៊ុនទាំងអស់របស់ក្រុមហ៊ុន ហើយនៅពេលនេះ ក្រុមប្រឹក្សាភិបាលរបស់ខ្លួនកំពុងបង្កើតគណៈកម្មាធិការពិសេសមួយ និងឯករាជ្យ ដើម្បីពិនិត្យមើលសំណើនេះ។

គិតត្រឹមថ្ងៃស្រុក សប្តាហ៍មុន តម្លៃភាគហ៊ុនសរុបរបស់ក្រុមហ៊ុន Seven & i Holdings មានប្រមាណជាង ៣១ពាន់លានដុល្លារ។ ហើយប្រសិនបើក្រុមហ៊ុនកាណាដា អាចទិញយកភាគហ៊ុន១00%របស់ក្រុមហ៊ុននេះ នោះក្រុមហ៊ុនកាណាដា អាចត្រូវការទុនយ៉ាងហោចណាស់៣៤ពាន់លានដុល្លារ។

បើយោងតាមការចុះផ្សាយរបស់សារព័ត៌មាន BBC សំណើដែលក្រុមហ៊ុនម៉ាតខ្នាតយក្សរបស់កាណាដា Alimentation Couche-Tard ដាក់ស្នើទៅក្រុមហ៊ុន Seven & i Holdings គឺមានតម្លៃដល់ទៅ៣៨ពាន់លានដុល្លារឯណោះ។

មកទល់ពេលនេះ ក្រុមហ៊ុន Alimentation Couche-Tard កំពុងគ្រប់គ្រងម៉ាតនៅអាម៉េរិកខាងជើង ស៊ុយអែត ហ្វាំងឡង់ អៀរឡង់ ប៉ូឡូញ និងបណ្តាប្រទេសផ្សេងទៀតក្រោមម៉ាក Couche-Tard និង Circle K. សរុបរហូតដល់ទៅ១ម៉ឺន៧ពាន់កន្លែង។ ចំណែកក្រុមហ៊ុន Seven & i Holdings វិញគ្រប់គ្រងម៉ាតសរុប៨ម៉ឺន៥ពាន់កន្លែងនៅក្នុងប្រទេសជប៉ុន និង២០ប្រទេសផ្សេងទៀត និងគ្រោងពង្រីកដល់១០ម៉ឺនទីតាំងនៅតាមប្រទេសចំនួន៣០ នៅឆ្នាំ២០៣០ខាងមុខ៕

ដោយៈ សរ សុជាតិ