ការលើកឡើងពីសហភាពអឺរ៉ុបដូច្នេះ ធ្វើឡើងនៅអំឡុងពេលថ្នាក់ដឹកនាំជាន់ខ្ពស់នៃសហភាពអឺរ៉ុប លោកចូសិប បូរេល និងលោក វ៉ាង យី ទីប្រឹក្សារដ្ឋចិនបានជួបពិភាក្សាគ្នាតាមរយៈប្រព័ន្ធវីដេអូ នៅថ្ងៃអង្គារសប្តាហ៍នេះ។ នេះបើតាមការចុះផ្សាយដោយសារព័ត៌មាន អន្តរជាតិធំៗជាច្រើននៅថ្ងៃនេះ។
ជាប្រធានផ្នែកគោលនយោបាយរបស់សហភាពអឺរ៉ុបលោក ចូសិប បូរេល (Josep Borrel) បាននិយាយទៅកាន់លោកវ៉ាង យីក្នុងសម្តីដើមយ៉ាងដូច្នេះថា ទោះបីជាការខ្វែងគំនិតគ្នានៅតែកើតមានរវាងភាគីទាំងពីរក៏ដោយ សហភាពអឺរ៉ុបនិងចិនចាំបាច់ត្រូវបន្តចូលរួមយ៉ាងសកម្មនៅក្នុងវិស័យសំខាន់ៗមួយចំនួនផ្សេងទៀត ស្របទៅតាមលក្ខណៈរួម និងកិច្ចសហប្រតិបត្តិការនៃយុទ្ធសាស្ត្រឥណ្ឌូប៉ាស៊ីហ្វិករបស់អឺរ៉ុប។
ជាមួយគ្នានេះ លោកវ៉ាង យី ទីប្រឹក្សារដ្ឋ និងជារដ្ឋមន្ត្រីក្រសួងការបរទេសចិន បាននិយាយថា ភាគីទាំងពីរគឺចិន និងអឺរ៉ុប ត្រូវតែបន្តនិន្នាការបង្កើនការចូលរួមក្នុងកិច្ចខិតខំប្រឹងប្រែងនានា ដើម្បីបង្កើនទំនុកចិត្តនយោបាយ និងដោះស្រាយភាពខ្វែងគំនិតគ្នា។ នេះបើយោងតាមសេចក្តីថ្លែងការណ៍មួយនៅលើគេហទំព័ររបស់ក្រសួងការបរទេសចិន។
គួរកត់សម្គាល់ថា រវាងសហភាពអឺរ៉ុប និងសហរដ្ឋអាមេរិក ដែលសុទ្ធសឹងតែមានបញ្ហារសើបជាមួយចិន គឺមានតែអឺរ៉ុបទេ ដែលបានបង្ហាញឥរិយាបទន់ភ្លន់ចំពោះក្រុងប៉េកាំង ខណៈដែលអាមេរិកវិញ រឹតតែបានបន្ថែមសម្ពាធថ្មីៗចំពោះក្រុងប៉េកាំងជាបន្ដបន្ទាប់។
ជាក់ស្តែង ដូចជាកិច្ចសហប្រតិបត្តិការត្រីភាគីថ្មីមួយដែលទើបចេញជារូបរាង មានឈ្មោះថា AUKUS ដែលសំដៅដាក់សម្ពាធ និងប្រឆាំងនឹងវត្តមានចិននៅប៉ាស៊ីហ្វិក។ ការដែលអឺរ៉ុបមានជំហរទន់ភ្លន់ចំពោះចិនជាងអាមេរិកធ្វើដាក់ចិននេះ ក៏ដោយសារតែចិនជាដៃគូរធ្វើពាណិជ្ជកម្មធំមួយ ខ្វះមិនបានរបស់អឺរ៉ុបផងដែរ។
សូមជម្រាបថា បច្ចុប្បន្នចិនបាននាំមុខសហរដ្ឋអាមេរិកវិញហើយ ដោយបានក្លាយជាដៃគូរពាណិជ្ជកម្មធំបំផុតមួយរបស់សហភាពអឺរ៉ុប។ ជាក់ស្តែង នៅពេញមួយឆ្នាំ២០២០ ទំហំពាណិជ្ជកម្មរបស់សហភាពអឺរ៉ុបជាមួយចិនបានឈានដល់ជិត ៥៩០ពាន់លានអឺរ៉ូ ឬស្មើនឹងជាង ៧១០ ពាន់លានដុល្លារអាមេរិក បើប្រៀបធៀបទៅនឹងសហរដ្ឋអាមេរិកដែលមានប្រមាណតែជាង ជាង ៦៤០លានដុល្លារអាមេរិកប៉ុណ្ណោះ៕
