ជុំវិញការត្អូញត្អែររបស់ប្រជាកសិករ អំពីការធ្លាក់ថ្លៃនៃតម្លៃស្រូវនាពេលបច្ចុប្បន្ននេះ ត្រូវបានលោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានទទួលស្គាល់ថា តម្លៃស្រូវនៅឆ្នាំនេះ ពិតជាមានការធ្លាក់ចុះបន្តិចមែន បើធៀបទៅនឹងតម្លៃកាលពីឆ្នាំមុន។ ប៉ុន្តែតម្លៃនេះ នៅតែជាតម្លៃល្អស្ថិតក្នុងកម្រិតមួយសមរម្យ ហើយកសិករនៅតែអាចទទួលបានប្រាក់ចំណេញ។ បើតាមមន្រ្តីជាន់ខ្ពស់រូបនេះ ការដែលកសិករត្អូញត្អែរពីការខាត់បង់នៅពេលប្រមូលផលស្រូវនេះ ក៏ដោយសារពួកគេបានចំណាយច្រើនលើការថែទាំដំណាំស្រូវនៅឆ្នាំនេះ ដោយសារជួបបញ្ហាប្រធានសក្កិមួយចំនួនដូចជាបញ្ហាទឹកជំនន់ បញ្ហាគ្រោះរាំងស្ងួត និងបញ្ហាសត្វល្អិតចង្រៃជាដើម។
ដើម្បីទប់ស្កាត់នូវបញ្ហាប្រឈមទាំងអស់នេះ លោកជំទាវ អ៊ឹម រចនា លើកទឹកចិត្តឱ្យប្រជាកសិករងាកមកដាំដុះពូជស្រូវរបស់កម្ពុជា ឱ្យបានច្រើន ដ្បិតថា ពូជស្រូវរបស់កម្ពុជា ដូចជា ពូជសែនក្រអូប០១ និងពូជផ្ការំដួលជាដើម គឺជាពូជស្រូវដែលមានទីផ្សារស្រាប់ទាំងនាំចេញទៅចិន និងអឺរ៉ុប ហើយនៅតាមរោងម៉ាស៊ីនកិនស្រូវផ្សេងៗការទទួលទិញស្រូវប្រភេទពូជទាំងនេះ ក៏មានតម្លៃខ្ពស់ជាងពូជស្រូវដែលនាំចូលពីបរទេសផងដែរ។ មន្រ្តីជាន់ខ្ពស់រូបនេះ បញ្ជាក់ដែរថា ការដាំដុះពូជស្រូវដែលនាំចូលពីបរទេសនេះទៀតសោត ប្រជាកសិករអាចប្រឈមនឹងហានិភ័យផងដែរ ដោយសារតែតម្លៃស្រូវលក់ចេញនៅរៀងរាល់ពេលប្រមូលផលម្តងៗ គឺអាស្រ័យលើមាត់ឈ្មួញពីប្រទេសជិតខាងប៉ុណ្ណោះ។ លោកជំទាវ អ៊ឹម រចនា បានសង្កត់ធ្ងន់ថា ការបន្តដាំដុះពូជស្រូវពីបរទេសនេះ គឺប្រៀបបាននឹងការខ្ចីដង្ហើមគេដក។
សូមជម្រាបថា តាមការបញ្ជាក់របស់មន្ទីរពាណិជ្ជកម្មខេត្តបាត់ដំបង តម្លៃស្រូវនៅថ្ងៃទី១០ ខែកញ្ញា ឆ្នាំ២០២៤នេះ តម្លៃស្រូវនៅទីវាល សម្រាប់ស្រូវសែនក្រអូប (SKO) មានតម្លៃជាង១,៤០០រៀលក្នុង១គីឡូក្រាម និងស្រូវស្រងែ មានតម្លៃជាង១,២០០រៀល ក្នុង១គីឡូក្រាម ៕
