ប៉ុន្ដែ អ្វីដែលចាប់អារម្មណ៍នោះ កន្លងមកមានការសង្ស័យថា កំពង់ផែ ដែលត្រូវបានសាងសង់ឡើងដោយជំនួយរបស់ទីក្រុងប៉េកាំងនោះ គឺអាចជាកន្លែងសម្រាប់បម្រើដល់មូលដ្ឋានយោធាចិន។ នេះបើតាមការរាយការណ៍ដោយទីភ្នាក់ងារព័ត៌មានរ៉យទ័រ។
បើតាមទិន្នន័យដឹកជញ្ជូនពីក្រុមហ៊ុន Refinitiv Eikon បានបង្ហាញថា នាវាស្រាវជ្រាវ និងអង្កេតការខ្នាតយក្សរបស់ចិនឈ្មោះយន់ វ៉ាង៥ (Yuan Wang 5) កំពុងធ្វើដំណើរចូលទៅកាន់កំពង់ផែហាមបានតូតា (Hambantota) ភាគខាងត្បូងប្រទេសស្រីលង្កា ហើយត្រូវបានគេរំពឹងថា នឹងមកដល់នៅថ្ងៃទី១១ ខែសីហាខាងមុខ។
អ្នកនាំពាក្យក្រសួងការបរទេសឥណ្ឌា លោក អារីនដាម បាឈី (Arindam Bagchi) បានប្រាប់សន្និសីទសារព័ត៌មានប្រចាំសប្តាហ៍ថា៖ «រដ្ឋាភិបាលឥណ្ឌាកំពុងត្រួតពិនិត្យដោយប្រុងប្រយ័ត្ននូវការវិវត្តទាំងឡាយណា ដែលមានឥទ្ធិពលលើសន្តិសុខ និងផលប្រយោជន៍សេដ្ឋកិច្ចរបស់ប្រទេសឥណ្ឌា ហើយក៏នឹងចាត់វិធានការចាំបាច់ដើម្បីការពារផលប្រយោជន៍របស់ខ្លួនផងដែរ»។
តែយ៉ាងណា លោកមិនបាននិយាយចំថា តើប្រទេសឥណ្ឌាកំពុងចាត់វិធានការអ្វីទេ។ ទន្ទឹមនឹងនេះ ក្រសួងការបរទេសចិន និងមន្ត្រីស្រីលង្កាមិនបានឆ្លើយតបភ្លាមៗចំពោះសេចក្តីការអត្ថាធិប្បាយរបស់អ្នកនាំពាក្យក្រសួងការបរទេសឥណ្ឌានេះនៅឡើយដែរ។
អត្ថបទគួរអាន
គួរជម្រាបថា យោងតាមក្រុមហ៊ុនប្រឹក្សាយោបល់មួយនៅស្រីលង្កាឈ្មោះ Belt & Road Initiative Sri Lanka និយាយនៅលើគេហទំព័ររបស់ខ្លួនថា កប៉ាលយក្សយន់ វ៉ាង៥ របស់ចិននេះ នឹងទៅកាន់កំពង់ផែហាមបានតូតា (Hambantota) ក្នុងរយៈពេលមួយសប្តាហ៍។
ហើយនាវាស្រាវជ្រាវ និងអង្កេតការនេះនឹងធ្វើការតាមដានលំហអាកាស ការគ្រប់គ្រងផ្កាយរណប និងតាមដានស្រាវជ្រាវនៅតំបន់ភាគពាយព្យ នៃតំបន់មហាសមុទ្រឥណ្ឌារហូតដល់ខែសីហា និងខែកញ្ញាឯណោះ។
មួយវិញទៀត ប្រទេសស្រីលង្កាបានប្រគល់សិទ្ធិគ្រប់គ្រង់ពាណិជ្ជកម្មនៅក្នុងកំពង់ផែភាគខាងត្បូងដ៏សំខាន់របស់ខ្លួនជាផ្លូវការទៅឱ្យក្រុមហ៊ុនចិនក្នុងឆ្នាំ២០១៧ ក្នុងការសម្បទានក្នុងរយៈពេល ៩៩ ឆ្នាំ ដើម្បីជាថ្នូរទៅការសងបំណុលចិនវិញ។ ហើយកំពង់ផែនេះ គឺនៅជិតផ្លូវដឹកជញ្ជូនសំខាន់ពីអាស៊ីទៅអឺរ៉ុបផងដែរ។
មិនតែប៉ុណ្ណោះ មន្ត្រីអាមេរិក និងឥណ្ឌាក៏សម្ដែងការព្រួយបារម្ភណាស់ដែរថា កំពង់ផែដែលសាងសង់ដោយប្រទេសចិនមានតម្លៃ ១ពាន់៥រយ លានដុល្លារនេះ អាចក្លាយទៅជាមូលដ្ឋានយោធាចិននៅមាហាសមុទ្រឥណ្ឌាក៏ថាបាន។
ប្រទេសចិនជាប្រទេសផ្តល់កម្ចីធំបំផុតមួយរបស់ស្រីលង្កា ហើយក៏បានផ្តល់មូលនិធិក្នុងការសាងសង់អាកាសយានដ្ឋាន ផ្លូវថ្នល់ និងផ្លូវដែកផងដែរ ដែលធ្វើឲ្យប្រទេសឥណ្ឌាមមិនមានឱកាសក្នុងការប្រជែងជាមួយចិនសោះឡើយ។ ទោះយ៉ាងណា នៅអំឡុងពេលដែលស្រីលង្កាកំពុងជួវិបត្តិសេដ្ឋកិច្ច រដ្ឋាភិបាលឥណ្ឌាក៏បានផ្តល់ជំនួយជិត ៤ ពាន់លានដុល្លារទៅឲ្យប្រទេសនេះ ក្នុងឆ្នាំ២០២២នេះផងដែរ៕
