លោក ពូទីន មានមហិច្ឆតាបង្កើនទ័ពសកម្មឱ្យដល់១,៥លាននាក់ ដើម្បីក្លាយជាប្រទេសមានកងទ័ពធំបំផុតទី២បន្ទាប់ពីចិន

នៅក្នុងក្រឹត្យមួយដែលបានចេញផ្សាយនៅលើគេហទំព័ររបស់វិមានក្រឹមឡាំង លោក វ្ល៉ាឌីមៀ ពូទីន បានបញ្ជាឱ្យបង្កើនទំហំកងកម្លាំងប្រដាប់អាវុធដល់ទៅ២,៣៨លាននាក់ ដោយក្នុងនោះ លោកអះអាងថា កងកម្លាងចំនួន១,៥លាននាក់ ត្រូវតែជាទាហានសកម្ម។ ទិន្នន័យពីវិទ្យាស្ថានអន្តរជាតិ សម្រាប់ការសិក្សាយុទ្ធសាស្ត្រ (IISS) បានបង្ហាញថា ការបង្កើនចំនួនទ័ពនេះ នឹងធ្វើឱ្យរុស្ស៊ីវ៉ាដាច់សហរដ្ឋអាម៉េរិក និងប្រទេសឥណ្ឌា សម្រាប់ចំនួនកងទ័ពសកម្មក្នុងការប្រយុទ្ធ ប៉ុន្តែស្ថិតនៅក្រោមប្រទេសចិន ដែលមានទាហានសកម្មរហូតដល់២លាននាក់។

នេះគឺជាលើកទី៣ហើយដែលលោក ពូទីន បានប្រកាសពីការពង្រីកកងទ័ពចាប់តាំងពីលោកបានបញ្ជាឱ្យកងកម្លាំងបើកការវាយចូលឈ្លានពានអ៊ុយក្រែន កាលពីអំឡុងខែកុម្ភៈ ឆ្នាំ២០២២ ហើយវាស្របពេលដែលកងទ័ពរុស្ស៊ី កំពុងវាយសម្រុកទៅមុខនៅក្នុងសមរភូមិភាគខាងកើតនៃប្រទេសអ៊ុយក្រែន។

លោក អេនដ្រេ កាតាប៉ូឡូវ (Andrei Kartapolov) ប្រធានគណៈកម្មាធិការការពារជាតិនៃសភាជាន់ទាបរបស់រុស្ស៊ី បាននិយាយថា ការបង្កើនចំនួនទាហានសកម្មនេះ គឺជាផ្នែកមួយនៃផែនការប៉ះប៉ូវកងកម្លាំងប្រដាប់អាវុធ និងការបង្កើនទំហំកងកម្លាំងប្រដាប់អាវុធបន្តិចម្តងៗដើម្បីឱ្យសមស្របនឹងស្ថានភាពអន្តរជាតិបច្ចុប្បន្ន និងអាកប្បកិរិយារបស់អតីតដៃគូបរទេសរបស់ពួកគេ៕

អត្ថបទ៖ សុខ មង្គល