![វិស័យធនាគារ](https://cdn.cambonomist.com/media/images/tthchn11222.2e16d0ba.fill-960x540.jpg)
យោងតាមរបាយការណ៍មួយដែលរដ្ឋាភិបាលសិង្ហបុរី បានបញ្ចេញនៅថ្ងៃពុធ ទី២៦ ខែមិថុនា នេះបង្ហាញថា ប្រទេសសិង្ហបុរី រឹបអូសទ្រព្យសម្បត្តិបានរហូតដល់ទៅ៤,៤ពាន់លានដុល្លារអាម៉េរិក ដែលមានជាប់ពាក់ព័ន្ធនឹងក្រុមឧក្រិដ្ឋជន និងសកម្មភាពលាងលុយកខ្វក់នៅចន្លោះពីឆ្នាំ២០១៩ ដល់ឆ្នាំ២០២៤ ហើយក្នុងចំណោមទ្រព្យសម្បត្តិ ដ៏មហាសាលនោះ ប្រាក់ជាង៣០០លានដុល្លារអាម៉េរិក ត្រូវបានប្រគល់ឱ្យទៅជនរងគ្រោះវិញ ខណៈដែលជាង៧០០លានដុល្លារអាម៉េរិកផ្សេងទៀត ត្រូវបានរឹបអូសទុកជាសម្បត្តិរបស់រដ្ឋ។
របាយការណ៍ដដែលនេះ បានបញ្ជាក់ថា ក្នុងករណីលាងលុយដែលមានទំហំរហូតដល់ទៅជាង២,២ពាន់លានដុល្លារអាម៉េរិក ដែលត្រូវបានបង្ក្រាបកាលពីឆ្នាំមុន ទឹកប្រាក់ប្រមាណ៧០០លានដុល្លារអាម៉េរិក ត្រូវបានរឹបអូសទុកជាសម្បត្តិរបស់រដ្ឋ។
អាជ្ញាធរនៅក្នុងប្រទេសដែនកោះដ៏តូចដែលគ្មានធនធានធម្មជាតិ និងដែលមានប្រជាជនសរុបត្រឹមតែជាង៦លាននាក់នេះសង្កេតឃើញថា សកម្មភាពលាងលុយកខ្វក់កាន់តែមានភាពស្មុគស្មាញ និងមានភាពច្នៃប្រឌិតខ្ពស់ ដែលពិបាកនឹងចាប់បាន ដោយក្រុមឧក្រិដ្ឋជនបានចល័តមូលនិធិខុសច្បាប់ក្នុងចំនួនច្រើនយ៉ាងឆាប់រហ័សក្នុងប្រតិបត្តិការផ្ទេរលុយឆ្លងដែន។
យ៉ាងណាមិរដ្ឋាភិបាលសិង្ហបុរី បានប្ដេជ្ញាកែលម្អ និងពង្រឹងការអនុវត្តច្បាប់ឱ្យបានម៉ឺងម៉ាត់ ដើម្បីទប់ស្កាត់បទល្មើសបែបនេះ ដោយក្នុងនោះរួមមានទាំងសេចក្ដីព្រាងច្បាប់ស្ដីពីការលាងលុយកខ្វក់ ដែលគេរំពឹងថា នឹងត្រូវបានអនុម័តក្នុងឆ្នាំនេះផងដែរ។
យោងតាមសារព័ត៌មាន Bloomberg ឱ្យដឹងថា ដើម្បីប្រយុទ្ធប្រឆាំងនឹងហានិភ័យនៃការលាងលុយកខ្វក់ រដ្ឋាភិបាលសិង្ហបុរី នឹងរំលាយក្រុមហ៊ុនដែលគ្មានសកម្មភាពបន្ថែមទៀត និងស្នើសុំព័ត៌មានលម្អិតបន្ថែមពីការិយាល័យគ្រប់គ្រងទ្រព្យសម្បត្តិឯកជន និងមូលនិធិវិយោគ។ ទន្ទឹមនេះ ធនាគារនានាក៏នឹងពិនិត្យតាមដានអតិថិជនមានទ្រព្យស្តុកស្ដម្ភរបស់ខ្លួនដោយប្រុងប្រយ័ត្នខ្ពស់ផងដែរ ដើម្បីបញ្ឈប់សកម្មភាពផ្ទេរលុយខុសច្បាប់៕
ដោយ: តែម សុខុម