អ្នកជំនាញថា បញ្ហាសេដ្ឋកិច្ចនឹងមិនប៉ះពាល់ដល់ការចំណាយរបស់ពលរដ្ឋនារដូវភ្ជុំបិណ្ឌខ្លាំងទេ

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជ្យបណ្ឌិតសភាកម្ពុជា បានគូសបញ្ជាក់ថា បើទោះបីជាបច្ចុប្បន្នសេដ្ឋកិច្ចពិភពលោក រួមទាំងកម្ពុជា កំពុងជួបបញ្ហាអតិផរណាថ្លៃទំនិញនៅលើទីផ្សារមានការកើនឡើងក៏ពិតមែន ប៉ុន្តែលោកសង្កេតឃើញថា វាមិនបានធ្វើឲ្យប៉ះពាល់ដល់ការចំណាយរបស់ប្រជាពលរដ្ឋនារដូវបុណ្យភ្ជុំបិណ្ឌ​ទេ ​ព្រោះពិធីបុណ្យនេះជាប្រពៃណីទំនៀមទម្លាប់របស់ខ្មែរតាំងពីដូនតាមក តែការចំណាយរបស់ប្រជាពលរដ្ឋក្នុងអំឡុងពេលភ្ជុំបិណ្ឌនេះ គឺខុសៗគ្នាទៅតាមសម្ថតភាព និងលទ្ធភាពជាក់ស្តែងរបស់ពួកគេផ្ទាល់ ហើយវាក៏មិនមែនជាការចំណាយច្រើនរហូតធ្វើឱ្យប៉ះពាល់ខ្លាំងដល់ជីវភាពពួកគេនោះដែរ។

បើតាមអ្នកជំនាញរូបនេះ ផ្ទុយទៅវិញការចំណាយរបស់ប្រជាពលរដ្ឋនៅក្នុងរដូវបុណ្យភ្ជុំបិណ្ឌរយៈពេល១៥ថ្ងៃនេះ វាជាការចូលរួមចំណែកក្នុងចរន្តសេដ្ឋកិច្ច តាមរយៈការទិញលក់ដោះដូរទំនិញនានា។ តែយ៉ាងណា លោកបណ្ឌិត ហុង វណ្ណៈ បានសង្កត់ធ្ងន់ថា ប្រជាពលរដ្ឋគួរពិចារណាកាត់បន្ថយក្នុងការចំណាយលើម្ហូបអាហារច្រើនលើសលប់ពេកនៅតាមវត្តមួយចំនួន ដោយជំនួសមកវិញដោយការប្រគេនជាស្បៀង អង្ករ ឬគ្រឿងឧបភោគបរិភោគមួយចំនួន ដែលអាចរក្សាទុកបានយូរ ជាជាងការប្រគេននូវបាយម្ហូបច្រើនរហូតសល់ចោលក្នុងពេលតែមួយ ដ្បិតវាជាការខ្ជះខ្ជាយក្នុងចរន្តសេដ្ឋកិច្ច ស្របពេលដែលបច្ចុប្បន្នកម្ពុជាកំពុងស្ថិតនៅក្នុងកាលៈទេសៈមួយ ដែលទំនិញនៅលើទីផ្សារកំពុងមានកំណើនអតិផរណា។

យ៉ាងណាមិញ បើក្រឡេកមើលពីតម្រូវការទំនិញចាំចាច់ដូចជាសាច់ជ្រូក មាន់ ទា នៅក្នុងរដូវកាលបុណ្យភ្ជុំបិណ្ឌនេះ លោក ស៊្រុន ពៅ ប្រធានសមាគមអ្នកចិញ្ចឹមសត្វនៅកម្ពុជាជឿជាក់ថា នៅក្នុងរដូវកាលបុណ្យភ្ជុំបិណ្ឌឆ្នាំនេះ តម្រូវការសាច់ដូចជា សាច់ជ្រូក សាច់មាន់ សាច់ទា នឹងមានការកើនឡើងជាងឆ្នាំមុន ខណៈការផ្គត់ផ្គង់វិញ ក៏មិនខ្វះខាតនោះដែរ។ ពាក់ព័ន្ធតម្លៃវិញលោក ស្រ៊ុន ពៅ ជឿជាក់ថា នៅឆ្នាំនេះនឹងមិនមានការប្រែប្រួលគួរឱ្យកត់សម្គាល់នោះទេ ដោយសម្រាប់តម្លៃសាច់ជ្រូករស់ដែលប្រជាកសិករអាចលក់បាននៅក្នុងរដូវបុណ្យភ្ជុំបិណ្ឌនេះ គឺចន្លោះពីជាង៨ពាន់រៀលទៅ៩ពាន់រៀលក្នុងមួយគីឡូលក្រាម។ ​

សូមបញ្ជាក់ដែរថា ពិធីបុណ្យភ្ជុំបិណ្ឌនិងកាន់បិណ្ឌនាឆ្នាំនេះ ត្រូវប្រារព្ធធ្វើឡើងចាប់ពីថ្ងៃទី៣០ ខែកញ្ញា ដល់ ថ្ងៃទី ១៥ខែតុលា ឆ្នាំ២០២៣៕