លោក ម៉ាស ដែលគាំទ្រលោក ត្រាំ និងលោក ប៊ីល ហ្កេត គាំទ្រលោកស្រី ហារីស កំពុងប្រជែងគ្នាផ្ដល់ថវិការាប់លានដុល្លារ ដើម្បីគាំទ្រយុទ្ធនាឃោសនាបោះឆ្នោត

លោក ប៊ីល ហ្គេត បាននិយាយដោយផ្ទាល់ថា លោកបានបរិច្ចាគថវិកាចំនួន៥០លានដុល្លារដល់អង្គការមិនរកប្រាក់ចំណេញមួយ ដែលគាំទ្របេក្ខជនប្រធានាធិបតីលោកស្រី កាម៉ាឡា ហារីស របស់គណបក្សប្រជាធិបតេយ្យ។ នេះបើតាមការចុះផ្សាយរបស់ការសែត New York Times ដែលបានស្រង់សម្តីមនុស្សបីនាក់ដែលដឹងពីបញ្ហានេះ។

ការបរិច្ចាគរបស់សហស្ថាបនិកក្រុមហ៊ុន Microsoft ដល់អង្គការ Future Forward ដែលជាក្រុមរៃអង្គាសប្រាក់ខាងក្រៅដ៏សំខាន់សម្រាប់គាំទ្រលោកស្រី ហារីស នោះ គឺមានបំណងបំពេញតម្រូវការខ្វះខាតរបស់អង្គការនេះតែប៉ុណ្ណោះ។

គួរបញ្ជាក់ថា លោក ហ្គេត មិនដែលបង្ហាញការគាំទ្រជាសាធារណៈ ចំពោះបេក្ខជនប្រធានាធិបតីណាមួយឡើយ ប៉ុន្តែកាលពីពេលថ្មីៗនេះលោកបានសរសើរលោកស្រី ហារីស នៅពេលដែលលោកស្រីបានក្លាយជាបេក្ខជនសម្រាប់គណបក្សប្រជាធិបតេយ្យ ដោយលោកនិយាយថា វាអស្ចារ្យណាស់ដែលមានមនុស្សក្មេងកំពុងឈរឈ្មោះបោះឆ្នោតបែបនេះ។

ជាមួយគ្នានេះកាលពីប៉ុន្មានថ្ងៃមុន លោក អេឡិន ម៉ាស នាយកប្រតិបត្តិក្រុមហ៊ុនរថយន្តថេស្លា បានប្រកាសផ្ដល់ថវិកា១លានដុល្លារជារៀងរាល់ថ្ងៃដល់អ្នកដែលបានចុះឈ្មោះគាំទ្រលោក ត្រាំ នៅរដ្ឋផេនស៊ីលវ៉េនៀ ដោយធ្វើឱ្យអភិបាលរដ្ឋនេះស្នើសុំឱ្យមន្ត្រីអនុវត្តន៍ច្បាប់បើកការស៊ើបអង្កេតចំពោះការជ្រៀតជ្រែកកិច្ចការបោះឆ្នោតដ៏មានសក្ដានុពលមួយនេះ។ 

បើតាមទស្សនាវដ្ដី Forbes បានបង្ហាញថា មហាសេដ្ឋីចំនួន៨១នាក់ កំពុងគាំទ្រលោកស្រី កាម៉ាឡា ហារីស ខណៈមហាសេដ្ឋីចំនួន៥០នាក់ កំពុងគាំទ្រលោក ដូណាល់ ត្រាំ៕
អត្ថបទ៖ សុខ មង្គល