បើតាមការចេញផ្សាយរបស់សារព័ត៌មានម៉ាឡេស៊ី The Edge បានឱ្យដឹងថា ប្រមុខការទូតនៃប្រទេសទាំងពីរបាននិងកំពុងជួបជជែកគ្នានៅក្នុងរដ្ឋធានីប៉េកាំង ប្រទេសចិន ដោយបានចាប់ផ្ដើមពីថ្ងៃអង្គារ ដល់ថ្ងៃព្រហស្បតិ៍ សប្ដាហ៍នេះ។ គោលបំណងសំខាន់នៃកិច្ចពិភាក្សាគ្នានេះ គឺដើម្បីស្វែងរកដំណោះស្រាយកណ្ដាលមួយ ដើម្បីដោះស្រាយបញ្ហាក្ដៅៗមួយចំនួនរួមមានការខ្វែងគំនិតគ្នាក្នុងសង្គ្រាមនៅមជ្ឈិមបូព៌ា និងអ៊ុយក្រែន បញ្ហាតៃវ៉ាន់រហូតដល់សមុទ្រចិនខាងត្បូង ជម្លោះពាណិជ្ជកម្ម និងបញ្ហាថ្នាំញៀនហ្វេនតានីលជាដើម។
លោក វ៉ាង យី ប្រមុខការទូតចិន បាននិយាយក្នុងជំនួបខាងលើថា នៅប៉ុន្មានឆ្នាំកន្លងមកនេះ ទំនាក់ទំនងទ្វេភាគីរវាងប្រទេសទាំងពីរមានការប្រែប្រួល និងផ្លាស់ប្តូរយ៉ាងខ្លាំង។ ចំណែកលោក ស៊ូលីវ៉ាន់ បាននិយាយថា អាម៉េរិកនឹងស្វែងយល់ពីបញ្ហាជាច្រើនរួមទាំងបញ្ហាដែលអាម៉េរិកយល់ស្រប និងបញ្ហាដែលនៅតែមានការខ្វែងគំនិតគ្នា ដើម្បីគ្រប់គ្រងវាប្រកបដោយប្រសិទ្ធភាព និងតាមការជាក់ស្តែង៕
អត្ថបទ៖ សុខ មង្គល
