សហរដ្ឋអាម៉េរិក កំពុងជំរុញឱ្យវៀតណាម យកគម្រោងកសាងខ្សែកាបអុបទិកក្រោមសមុទ្រគេចចេញឲ្យឆ្ងាយពីក្រុមហ៊ុនខ្សែកាបចិន HMN Technologies និងបណ្តាលក្រុមហ៊ុនចិន ផ្សេងទៀត។ នៅពេលនេះដើម្បីជំនួស និងបង្កើនប្រសិទ្ធភាពឲ្យបានលើសពីបណ្តាញខ្សែកាបអុបទិចក្រោមសមុទ្រមានស្រាប់ចំនួន៥ខ្សែ ដែលកំពុងតែស្ថិតក្នុងស្ថានភាពចាស់ទ្រុឌទ្រោម វៀតណាមបានដាក់ចេញនូវផែនការអភិវឌ្ឈន៍បណ្តាញខ្សែកាបថ្មីរហូតដល់ទៅ១០បណ្តាញនៅមុនឆ្នាំ២០៣០។
ពាក់ព័ន្ធនឹងផែនការនេះក្រុមមន្ត្រីវៀតណាម និងបណ្តាក្រុមហ៊ុននានារបស់សហរដ្ឋអាម៉េរិក កំពុងបង្កើនសកម្មភាពទំនាក់ទំនងជាមួយនឹងវៀតណាម ស្របពេលដែលក្រុមហ៊ុន HMN Technologies និងក្រុមហ៊ុនមួយចំនួនទៀតរបស់ចិន ក៏កំពុងតែចាប់អារម្មណ៍ផងដែរ។
ប្រភពដែលស្និទនឹងគម្រោងនេះបានបង្ហើបថា ចាប់តាំងពីខែមករា មក មន្ត្រី និងក្រុមហ៊ុនរបស់អាម៉េរិកជាច្រើនបានមកជួបជាមួយក្រុមមន្ត្រីវៀតណាម ដើម្បីពិភាក្សាអំពីយុទ្ធសាស្ត្ររាយខ្សែរបស់វៀតណាម ហើយពួកគេលើកឡើងថា វៀតណាមកំពុងតស្ថិតក្នុងដំណាក់កាលនៃការសម្រេចចិត្ត ដ៏លំបាកបំផុតនៅក្នុងអន្តរកម្មនៃទំនាក់ទំនងវៀតណាម-ចិន-អាម៉េរិក។
នៅពេលដែលអាម៉េរិក កំពុងពិភាក្សាលើកិច្ចការជាច្រើននៅក្រោមតុ ចិនឯណោះវិញ គឺកំពុងតែពិភាក្សាលើគម្រោងនេះដោយបើកចំហរ ពីព្រោះទីក្រុងវ៉ាស៊ីនតោនខ្លាចកម្លាំងចារកម្មទីក្រុងប៉េកាំង ធ្វើការបញ្ចុះបញ្ចូលវៀតណាមបានមុន។
ពាក់ព័ន្ធនឹងបញ្ហាដ៏រសើបនៃគម្រោងនះ ក្រុមហ៊ុន APTelecom របស់អាម៉េរិក និងក្រុមហ៊ុន HMN Tech របស់ចិន ក៏នៅមិនទាន់ធ្វើអត្ថាធិប្បាយអ្វីទាំងអស់ អំពីគម្រោងទាំងនេះ ហើយសេតវិមានក៏ដូចជា ក្រសួងព័ត៌មាន និងបច្ចេកវិទ្យាវៀតណាម ក៏មិនឆ្លើយតប ប៉ុន្តែក្រសួងការបរទេសចិនបាននិយាយថា យុទ្ធនាការរបស់សហរដ្ឋអាមេរិកបានបំពានច្បាប់អន្តរជាតិ និងគំរូប្រតិបត្តិការអាជីវកម្មយ៉ាងធ្ងន់ធ្ងរ៕
ដោយៈ សរ សុជាតិ
