រដ្ឋាភិបាលអាម៉េរិក បានចោទប្រកាន់ថា មន្ត្រីចិនបន្តប្រព្រឹត្តអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ ទៅលើជនជាតិអ៊ុយហ្គឺ (Uyghurs) និងជនជាតិភាគតិចមូស្លីមផ្សេងទៀតនៅក្នុងស៊ីនជាំង ហើយក្រុមសិទ្ធិមនុស្សបានដាក់គំនាបឱ្យក្រុមហ៊ុនបស្ចិមលោកនៅទីនោះធ្វើសវនកម្មប្រតិបត្តិការរបស់ពួកគេ ដោយសារពួកគេព្រួយបារម្ភពីពលកម្មដោយបង្ខំ ប៉ុន្តែចិន បានបដិសេធការចោទប្រកាន់នេះ។
ពាក់ព័ន្ធនឹងកង្វល់សិទ្ធិមនុស្សនេះ លោកស្រី ធៀ លី (Thea Lee) អនុរដ្ឋលេខាធិការទទួលបន្ទុកកិច្ចការអន្តរជាតិនៃក្រសួងការងាររបស់អាម៉េរិក បានប្រាប់សវនាការសភាអាម៉េរិកថា ទីក្រុងប៉េកាំង បានចាត់ទុកជារឿងខុសច្បាប់ចំពោះការធ្វើសវនកម្មសិទ្ធិមនុស្សដោយឯករាជ្យនៅតំបន់ស៊ីនជាំង។
លោកស្រី ធៀ លី បានប្រាប់គណៈកម្មការសភាពាក់ព័ន្ធនឹងប្រទេសចិនថា ប្រសិនបើចិនមិនអាចអនុញ្ញាតឱ្យធ្វើសវនកម្មសិទ្ធិមនុស្សដោយឯករាជ្យនេះទេ ដូច្នេះហើយ គឺមានតែធ្វើរឿងមួយគត់គឺក្រុមហ៊ុនបស្ចិមលោកមិនត្រូវបន្តធ្វើប្រតិបត្តិការរបស់ពួកគេនៅទីនោះទៀតឡើយ។
ស្ថានទូតចិន ប្រចាំទីក្រុងវ៉ាស៊ីនតោន បាននិយាយតាមអ៊ីមែលថា ការចោទប្រកាន់ពីអាម៉េរិក ចំពោះការងារដោយបង្ខំនេះ គឺគ្មានអ្វីក្រៅតែពីការភូតកុហកក្នុងបំណងគាបសង្កត់សហគ្រាសចិន នោះទេ។ ជាការពិតមន្ត្រីចិន បានទទួលស្គាល់ថា ខ្លួនបានបង្កើតមជ្ឈមណ្ឌលបណ្តុះបណ្តាលវិជ្ជាជីវៈ នៅក្នុងតំបន់នេះមែន ប៉ុន្តែគឺក្នុងបំណងទប់ស្កាត់អំពើភេរវកម្ម ការបំបែកខ្លួន និងភាពជ្រុលនិយមខាងលទ្ធិសាសនាតែប៉ុណ្ណោះ៕
អត្ថបទ៖ សុខ មង្គល
