ជាមួយគ្នានេះ អាជីវកម្មទេសចរណ៍ស្ទើរពាក់កណ្តាលដែលបានបិទទ្វាដោយសារវិបត្តិកូវីដ-១៩ ក៏មិនទាន់បានបើកដំណើរការឡើងវិញផងដែរ ទោះបីជារាជរដ្ឋាភិបាល បានដាក់ចេញយន្តការលើកលែងពន្ធមួយចំនួន ក៏ដូចការផ្តល់ឥណទានដោយផ្ទាល់ពីធនាគារ SME Bank ជាមួយនឹងដើមទុន៥០លានដុល្លារក្នុងអត្រាការប្រាក់សមរម្យ និងលក្ខខណ្ឌអនុគ្រោះដល់ប្រតិបត្តិករទេសចរនៅខេត្តនេះក៏ដោយ។ តើហេតុអ្វីបានអាជីវកម្មទេសចរណ៍ក្នុងខេត្តសៀមរាប នៅតែជួបបញ្ហាប្រឈមខ្ពស់បែបនេះ?
លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា បានគូសបញ្ជាក់ថា គិតចាប់ពីខែមករា ដល់ខែមីនា ឆ្នាំ២០២៤នេះ ខេត្តសៀមរាប ដែលជាគោលដៅទេសចរណ៍ដ៏សំខាន់របស់កម្ពុជានោះ ទទួលបានភ្ញៀវទេសចរបរទេសក្នុងរង្វង់ជាង១១ម៉ឺននាក់ ក្នុង១ខែ ក៏ប៉ុន្តែនៅក្នុងរយៈពេល២ខែចុងក្រោយនេះ ដែលជារដូវខ្សត់ភ្ញៀវ គឺទទួលបានប្រមាណជាង៥ម៉ឺននាក់ក្នុង១ខែប៉ុណ្ណោះ។ កត្តានេះបានជំរុញឱ្យអ្នករកស៊ីក្នុងវិស័យទេសចរណ៍ នៅខេត្តសៀមរាប ហាក់មានការរអ៊ូរទាំ និងមានការព្រួយបារម្ភខ្លាំងអំពីស្ថានភាព និងនិរន្តភាពនៃអាជីវកម្មរបស់ពួកគេ។ សម្រាប់អ្នកជំនាញរូបនេះ បញ្ហាប្រឈមដែលអ្នកប្រកបអាជីវកម្មទេសចរណ៍ក្នុងខេត្តសៀមរាប នៅតែជួបប្រទះនោះ គឺបញ្ហាហិរញ្ញវត្ថុដែលបន្សល់ទុកពីពេលវិបត្តិកូវីដ-១៩ ដែលបានប៉ះពាល់ដល់ក្រេឌីតរបស់ពួកគេ ក្នុងការទទួលបានកម្ចីថ្មី បើទោះបីរាជរដ្ឋាភិបាលបានទម្លាក់ហិរញ្ញប្បទាន៥០លានដុល្លារ ដល់ប្រតិបត្តិករទេសចរនៅខេត្តនេះក៏ដោយ ដែលកត្តានេះអាចជំរុញឱ្យពួកគេបាត់បង់អាជីវកម្មដោយសារគ្មានដើមទុនបង្វិលបន្ត។
អត្ថបទគួរអាន
ស្រដៀងគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានគូសបញ្ជាក់ថា ស្ថានភាពអាជីវកម្មទេសចរណ៍ក្នុងខេត្តសៀមរាបបច្ចុប្បន្នកំពុងប្រឈមនូវហានិភ័យខ្ពស់ ដោយសារមិនសូវមានភ្ញៀវទេសចរចូលទៅកម្សាន្តច្រើនដូចការរំពឹងទុក បើទោះរាជរដ្ឋាភិបាលបានដាក់ខិតខំអភិវឌ្ឍន៍ និងស្តារវិស័យទេសចរណ៍ក្នុងខេត្តនេះ តាមរយៈកម្មវិធីទស្សនាសៀមរាបឆ្នាំ២០២៤ ក៏ដោយ។ អ្នកជំនាញរូបនេះកត់សម្គាល់ឃើញថា នៅក្នុងរយៈពេល៥ខែកន្លងមកនេះគេនៅមិនទាន់ឃើញមានអ្វីដែលជាចំណុចខ្លាំងរបស់ក្រសួងស្ថានប័នពាក់ព័ន្ធ ក្នុងការទាក់ទាញភ្ញៀវទេសចរឱ្យមកកម្សាន្តនៅខេត្តសៀមរាបឱ្យបានទូលំទូលាយ និងទាក់ទាញជាងប្រទេសជិតខាងនៅឡើយទេ។
យ៉ាងណាមិញលោក ហូ វណ្ឌី ទីប្រឹក្សាសមាគមទេសចរណ៍កម្ពុជា កត់សម្គាល់ឃើញថា មកទល់ពេលនេះមានអាជីវកម្មទេសចរណ៍នៅក្នុងខេត្តសៀមរាប ប្រមាណជាង៥០%ប៉ុណ្ណោះ ដែលបានបើកដំណើរការឡើងវិញ ក្រោយរងផលប៉ះពាល់នៅអំឡុងវិបត្តិកូវីដ-១៩។ អ្នកជំនាញរូបនេះអះអាងថា ទោះបីរាជរដ្ឋាភិបាល បានផ្តល់ដើមទុន៥០លានដុល្លារ តាមរយៈធនាគារ SME Bank ដោយផ្ទាល់ ជាមួយនឹងអត្រាការប្រាក់សមរម្យ និងលក្ខខណ្ឌអនុគ្រោះដល់ប្រតិបត្តិករទេសចរនៅខេត្តនេះក៏ដោយ ក៏ពួកគេមិនទាន់ហ៊ានសម្រុកបើក ឬពង្រីកអាជីវកម្មឡើងវិញនោះទេ ដោយសារការគំរាមកំហែងពីឥទ្ធិពលខាងក្រៅនៅតែបន្តកើតមានជាបន្តបន្ទាប់។
សូមជម្រាបថា បើតាមការបញ្ជាក់របស់លោកជំទាវ ឆាយ ស៊ីវលីន គិតក្នុងរយៈពេល៥ខែដើមឆ្នាំ២០២៤នេះ ខេត្តសៀមរាបទទួលបានភ្ញៀវទេសចរអន្តរជាតិ សរុបប្រមាណជាង៤៧ម៉ឺននាក់ មានការកើនឡើងប្រមាណ៣៦% បើធៀបនឹងរយៈពេលដូចគ្នាកាលពីឆ្នាំមុន៕
