តំណាងឬ ប្រសិតពិសេសទើបផុតអណត្តិរបស់អង្គការសហប្រជាជាតិ គឺលោកស្រី គ្រីស្ទីន ច្រានឺ ប៊ឺកចេនឺ (Christine Chraner Burgener) បានលើកឡើងពីក្ដីសង្ឃឹមថា សហគមន៍អន្តរជាតិនឹងមិនបោះបង់ប្រទេសភូមានោះទេ ហើយសហគមន៍អន្តរជាតិនឹងនៅតែបន្ដជំហនៅជាមួយប្រជាជនភូមា។
បញ្ហាបាតុកម្ម និងភាពចលាចលបានកើតឡើងនៅក្នុងប្រទេសភូមាចាប់តាំងពីថ្ងៃរដ្ឋប្រហារថ្ងៃទី ០១ខែកុម្ភៈមកម្ល៉េះ ដោយតាមសេចក្ដីរាយការណ៍ពីព័ត៌មានអន្តរជាតិជាច្រើនបានឲ្យដឹងថា យោធាភូមាបានប្រព្រឹត្តិអំពើឃោរឃៅ និងប្រើកម្លាំងហួសហេតុទៅលើប្រជាជនស៊ីវិលស្លូតត្រង់ ខណៈដែលក្រុមយោធាវិញបានចោទថា ភាពចលាចលនេះ គឺដោយសារតែមានក្រុមភេរវករ ដែលជាប់ទាក់ទងនឹងរដ្ឋាភិបាលស្រមោល ដែលបានបង្កើតឡើងដោយក្រុមលោកស្រី អ៊ុង សានស៊ូជី។
លោក អានតូនីញ៉ូ ហ្គាត់ធើរេស (Antonio Guterres) អគ្គលេខាធិកាអង្គការសហប្រជាជាតិ នៅថ្ងៃចន្ទសប្ដាហ៍នេះ បានតែងតាំងលោកស្រី ណូអែលឡែន ហីហ្សឺ (Noeleen Heyzer) មកពីប្រទេសសិង្ហបុរី ដើម្បីធ្វើជាប្រេសិតពិសេសរបស់អង្គការសហប្រជាជាតិ ដើម្បីបន្ដចុះតាមដានស្ថានភាពប្រទេសភូមា ខណៈដែលលោកស្រី ណូអែលឡែន ក៏ធ្លាប់ធ្វើជាមន្ត្រីការទូតជាន់ខ្ពស់របស់អង្គការសហប្រជាជាតិផងដែរ។
លោកស្រី ច្រានឺ ប៊ឺចេនឺ ដែលជាប្រេសិតពិសេសរបស់អង្គការសហប្រជាជាតិដែលទើបផុតអាណត្តិនោះបានលើកឡើង ថា ប្រទេសភូមា បានឈានទៅរកសង្គ្រាមស៊ីវិលហើយ ហើយឱកាសនៃការត្រឡប់មករកលទ្ធិប្រជាធិបតេយ្យវិញ គឺកំពុងត្រូវបានរលាយបាត់ទៅហើយដែរ។ លោកស្រីបន្ថែមថា ក្រុមយោធាវិញ ក៏មិនមានចំណាប់អារម្មណ៍ក្នុងការសម្របសម្រួល ឬកិច្ចពិភាក្សានោះទេ។ ទោះយ៉ាងណា របបយោធាភូមា បានចេញមុខច្រានចោល ការលើកឡើងរបស់ប្រេសិតពិសេសផុតអាណត្តិរបស់អង្គការសហប្រជាជាតិរូបនេះ ដោយចាត់ទុកថា ការអត្ថាធិប្បាយរបស់លោកស្រី គឺខុសឆ្ងាយពីការពិត និងឆ្លុះបញ្ចាំងពីភាពលំអៀងរបស់អង្គការសហប្រជាតិ។
អត្ថបទគួរអាន
សូមបញ្ជាក់ថា នៅក្នុងកិច្ចប្រជុំកំពូលអាស៊ានលើកទី ៣៨-៣៩ ដែលបានចាប់ផ្ដើមធ្វើឡើងនៅថ្ងៃទី ២៦ខែតុលានេះ គឺមានការចូលរួមពីមេដឹកនាំអាស៊ានទាំងអស់ លើកលែងតែមេដឹកនាំភូមាមួយប៉ុណ្ណោះ ដែលត្រូវបានគេផាត់ចេញមិនឲ្យចូលរួមប្រជុំ។
អតីតប្រេសិតពិសេសរបស់អង្គការសហប្រជាជាតិបាននិយាយសង្កត់ធ្ងន់ថា គ្មានប្រទេសណាមួយនៅក្នុងតំបន់ មានចំណាប់អារម្មណ៍ទទួលស្គាល់របបយោធាភូមានោះទេ ពីព្រោះថា វាអាចនឹងជំរុញឲ្យប្រទេសនេះក្លាយទៅជារដ្ឋបរាជ័យមួយ គ្មានស្ថិរភាព ហើយបញ្ហានេះ មិនត្រឹមតែអាចកើតមាននៅក្នុងប្រទេសភូមានោះទេ ប៉ុន្ដែគឺអាចកើតនៅក្នុងតំបន់ទាំងមូលផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
