ជើងហោះហើរអន្តរជាតិជាង ៥០ បានចាប់ផ្ដើមហោះហើរទៅកាន់ទឹកដីប្រទេសអូស្ត្រាលីឡើងវិញក្នុងរយៈពេលត្រឹមមួយថ្ងៃប៉ុណ្ណោះ បន្ទាប់ពីប្រទេសនេះ បានបើកទ្វារទទួលអ្នកដំណើរពីអន្តរជាតិឡើងវិញ។ ក្នុងនោះ ២៧ ជើងហោះហើរ គឺទៅកាន់ទីក្រុងស៊ីដនី ដែលជាទីក្រុងធំជាងគេក្នុងប្រទេសអូស្ត្រាលី។ ការបើកជើងហោះហើរអន្តរជាតិឡើងវិញ គឺជាកត្តាមួយចូលរួមជំរុញដល់វិស័យទេសចរណ៍ និងបដិសណ្ឋារកិច្ចនៅក្នុងប្រទេសអូស្ត្រាលី ឲ្យមានការស្ទុះងើបឡើងវិញ បន្ទាប់ពីត្រូវបានវាយប្រហារយ៉ាងធ្ងន់ធ្ងរដោយការរឹតបន្តឹងនៃ COVID-១៩។
នាយករដ្ឋមន្ត្រីអូស្ត្រាលីលោក Scott Morrison បានប្រាប់អ្នកយកព័ត៌មានថា សេដ្ឋកិច្ចប្រទេសអូស្ត្រាលី គឺពឹងផ្អែកលើវិស័យទេសចរណ៍ជាខ្លាំង ហើយការបើកប្រទេសដើម្បីទទួលភ្ញៀវទេសចរឡើងវិញ គឺជាពេលវេលាប្រសើរ ដែលលោកបានទន្ទឹងរង់ចាំបន្ទាប់ពីមានការបិទប្រទេសអស់រយៈពេលជាយូរមកហើយនោះ។
អត្ថបទគួរអាន
គួរជម្រាបថា ទេសចរណ៍គឺជាឧស្សាហកម្មដ៏ធំមួយរបស់ប្រទេសអូស្ត្រាលី ដែលអាចរកចំណូលបានជាង ៦០ ពាន់លានដុល្លារអូស្ត្រាលី ស្មើរនឹង ៤៣ ពាន់លានដុល្លារ និងបានផ្តល់ការងារប្រហែលជាង ៥ ភាគរយ បើគិតជាកម្លាំងពលកម្មសរុបនៅក្នុងប្រទេស។ ប៉ុន្តែវិស័យនេះ ត្រូវបានប៉ះពាល់យ៉ាងធ្ងន់ធ្ងរបន្ទាប់ពីប្រទេសនេះ បានបិទព្រំដែនរបស់ខ្លួននៅក្នុងខែមីនាឆ្នាំ ២០២០ ។
រដ្ឋមន្ត្រីក្រសួងពាណិជ្ជកម្ម ទេសចរណ៍ និងវិនិយោគ លោក Tehan បាននិយាយថា លោកមានក្តីសង្ឃឹមយ៉ាងខ្លាំងសម្រាប់ការស្ទុះងើបឡើងវិញ នៅក្នុងទីផ្សារទេសចរណ៍ ដោយក្រុមហ៊ុន Qantas កំពុងបើកទទួលការហោះហើរសម្រាប់អ្នកដំណើរជាង១ម៉ឺន៤ពាន់នាក់ ទៅកាន់ប្រទេសអូស្ត្រាលីក្នុងសប្តាហ៍នេះ។
នៅពេលដែលព្រំដែនប្រទេសអូស្ត្រាលីបានបើកឡើងវិញ ការផ្ទុះឡើងនៃមេរោគបំប្លែងថ្មី Omicron នៅប្រទេសនេះ ហាក់ដូចជាបានឆ្លងក្នុងកម្រិតមួយដែលអាចគ្រប់គ្រងបាន និង ការចូលមន្ទីរពេទ្យបានធ្លាក់ចុះជាលំដាប់ ក្នុងរយៈពេលបីសប្តាហ៍កន្លងមកនេះ។ ជំងឺរាតត្បាតក្នុងប្រទេសអូស្ត្រាលីមានចំនួនសរុបប្រហែលជិត ៣ លានករណី និងចំនួនអ្នកស្លាប់សរុបមានចំនួនជិត ៥ ពាន់នាក់ ខណៈដែលមេរោគអូមីក្រុងត្រូវបានរកឃើញនៅក្នុងប្រទេសនេះចាប់តាំងពីចុងខែវិច្ឆិកាឆ្នាំមុនមក ។ ក្នុងនោះ ករណីឆ្លងប្រចាំថ្ងៃនៅអូស្ត្រាលីមានជិត ២ សែននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
