នាយកដ្ឋានគ្រប់គ្រងការចុះបញ្ជីអាជីវកម្មនៅក្រោមក្រសួងផែនការនិងវិនិយោគទុន របស់ប្រទេសវៀតណាម បានបង្ហាញថា ចំនួនអាជីវកម្មបើកថ្មីនៅក្នុងប្រទេសមានកំណើនខ្ពស់នៅក្នុងខែមិថុនា។ នេះបើយោងតាមសារព័ត៌មាន Vietnam News។
ប្រភពដដែលបានបន្តថា វាជាសញ្ញាវិជ្ជមានមួយ ទោះបីជាពេលនេះ ក្រុមហ៊ុនអាជីវកម្មទាំងនេះនៅតែប្រឈមមុខនឹងបញ្ហាលំបាកជាច្រើននៅក្នុងកិច្ចដំណើរការអាជីវកម្មរបស់ពួកគេក៏ដោយចុះ។
នៅក្នុងខែមិថុនា សហគ្រាសអាជីវកម្មដែលបានចុះបញ្ជីគឺមានរហូតដល់ទៅជិត១ម៉ឺន៤ពាន់អាជីកម្ម ដោយមានកំណើនកើនឡើង ៤,៨ ភាគរយ ហើយសហគ្រាសដែលបានសុំធ្វើសកម្មភាពឡើងវិញមានជាង៧ពាន់សហគ្រាស កើនឡើងរហូតដល់ទៅ ២១៥ ភាគរយ បើធៀបនឹងរយៈពេលដដែលកាលពីឆ្នាំ២០២២។
ប្រភពដដែលបានបន្តថា ប្រសិនបើគេគិតនៅក្នុងរយៈពេល៦ខែដើមឆ្នាំនេះវិញ គឺវៀតណាមបានទទួលការចុះបញ្ជីអាជីវកម្មថ្មីសរុប១សែន១ម៉ឺន៣ពាន់សហគ្រាស ហើយនៅក្នុងមួយខែៗ គឺមានក្រុមហ៊ុនអាជីវកម្មបើកដំណើរការឡើងវិញប្រមាណជា១ម៉ឺន៩ពាន់សហគ្រាស។
ក្រុមហ៊ុនបើកអាជីវកម្មនិងដាក់ដំណើរការអាជីវកម្មឡើងវិញឃើញមានកំណើន ប៉ុន្តែក្រុមហ៊ុនដែលសុំផ្អាកក៏មានផងដែរ ដោយតួរលេខមានសរុបប្រមាណជា១សែនសហគ្រាស នៅក្នុងឆមាសទី១ ហើយបើនៅក្នុងខែមិថុនា គឺមានរហូតដល់ទៅជាង១ម៉ឺន២ពាន់សហគ្រាស។
សូមរំលេចថា ដើមទុនរបស់ក្រុមហ៊ុនចុះបញ្ជីអាជីវកម្មថ្មីនៅក្នុងរយៈពេល៦ខែដើមឆ្នាំ២០២៣នេះ មានតម្លៃសរុប ៣០ ពាន់លានដុល្លារ ពោលគឺស្មើនឹងប្រហែល ៧៥ ទៅ ៨០ ភាគរយ នៃតម្លៃចុះបញ្ជីនៅក្នុងរយៈពេលដូចគ្នាកាលពីឆ្នាំ២០២១ ដែលមានការរីករាលដាលនៃមេរោគកូវីដ ១៩។ ពេលនោះ វៀតណាមទាក់ទាញ វិនិយោគតម្លៃជិត ៤០ ពាន់លានដុល្លារ និង នៅក្នុងឆ្នាំ២០២២ មានតម្លៃជាង ៣៧ ពាន់លានដុល្លារ។
ជាទូទៅ ក្រុមហ៊ុនចុះបញ្ជីវិនិយោគថ្មីនីមួយៗនៅវៀតណាមគឺដាក់ទុនប្រមាណជាជិត ៤០ ម៉ឺនដុល្លារជាមធ្យម៕
