ក្រុមហ៊ុន BYD បានបង្ហាញចេញរថយន្តអគ្គិសនីចំនួន៣ម៉ូដែលនៅក្នុងពិព័រណ៌យានយន្តក្រុងប៉ារីស ប្រទេសបារាំង កាលពីថ្ងៃទី១៧ ខែតុលា ឆ្នាំ២០២២ រួមមានដូចជា BYD ATTO 3 ជាប្រភេទ SUV, BYD Tang ៧កៅអី និង BYD Han ជាប្រភេទ Sedan រាងបែបស្ព័រ។
លោក Michael Shu នាយក BYD ប្រចាំតំបន់អឺរ៉ុប បាននិយាយនៅក្នុងព្រឹត្តិការណ៍ពិព័រណ៌នេះថា តាមរយៈការនាំផលិតផល និងការច្នៃប្រឌិតថ្មីរបស់ខ្លួន មកកាន់តំបន់អឺរ៉ុប គឺក្រុមហ៊ុន BYD មានគោលដៅក្លាយជាអ្នកនាំមុខគេក្នុងប្រភេទរថយន្តអគ្គិសនី។
ក្រុមហ៊ុនចិន BYD នឹងបញ្ចេញលក់រថយន្តអគ្គិសនីនៅក្នុងប្រទេសអាល្លឺម៉ង់ត្រឹមចុងឆ្នាំ២០២២ បន្ទាប់មកនៅទីផ្សារបារាំង និងអង់គ្លេស ព្រមទាំងទីផ្សារប្រទេសផ្សេងៗទៀត នៅឆ្នាំ២០២៣។ ក្នុងចំណោមរថយន្តអគ្គិសនីរបស់ BYD ដែលនាំចេញនោះគឺ ភាគច្រើនជារថយន្តផលិតនៅរោងចក្រប្រទេសចិន ហើយក៏នឹងមានជម្រើសយករថយន្ត ដែលផលិតចេញពីរោងចក្រ BYD នៅប្រទេសថៃផងដែរ។
អត្ថបទគួរអាន
សូមជម្រាបថា ក្នុងចំណោមការលក់រថយន្តអគ្គិសនីនៅលើពិភពលោកលោក ក្នុងនោះ ២០% ឬប្រមាណ ១លាន២សែនគ្រឿង គឺជាចំនួនលក់ក្នុងទីផ្សារអឺរ៉ុប ដែលធ្វើឱ្យវាក្លាយជាទីផ្សារដ៏ធំបំផុតទីពីរបន្ទាប់ពីប្រទេសចិន។ ជាមួយគ្នានោះដែរ គណៈកម្មការអឺរ៉ុប បានតម្រូវឱ្យរថយន្តថ្មីទាំងអស់ដែលបានលក់នៅឆ្នាំ២០៣៥ ក្នុងតំបន់នេះ គឺមិនត្រូវមានការបញ្ចេញឧស្ម័នកាបូនឌីអុកស៊ីតដាច់ខាត ពោលគឺចង់សំដៅទៅលើរថយន្តប្រើអគ្គិសនីសុទ្ធ ទោះជាប្រភេទ Hybrid ក៏មិនអនុញ្ញាតដែរ។
ក្នុងឆមាសទី១នៃឆ្នាំ២០២២នេះ ក្រុមហ៊ុន BYD បានលក់រថយន្តអគ្គិសនីចំនួន ៣២ម៉ឺនគ្រឿងនៅទូទាំងពិភពលោក។ តម្លៃទាបនៃរថយន្តអគ្គិសនីរបស់ BYD គឺជាចំណុចធំមួយក្នុងការយកឈ្នះគូប្រជែង ដោយសារក្រុមហ៊ុននេះអាចផលិតអាគុយសម្រាប់បំពាក់លើរថយន្តរបស់ខ្លួនបាន។
យោងតាមទិន្នន័យរបស់ស្ថាប័ន MarkLines ឱ្យដឹងថា ក្នុងរយៈពេល ៦ខែ នៃឆ្នាំ២០២២នេះ ក្រុមហ៊ុនដែលនាំមុខគេក្នុងការលក់រថយន្តអគ្គិសនីនៅតំបន់អឺរ៉ុប គឺ Volkswagen ចំនួនជាង ១២ម៉ឺនគ្រឿង។ ទីពីរគឺក្រុមហ៊ុន Stellantis មានចំនួនជាង ១១ម៉ឺនគ្រឿង និងទីបីគឺ Tesla មានចំនួនជាង ៨ម៉ឺនគ្រឿង៕
អត្ថបទ៖ នៅ សំភី
