តម្លៃប្រេងឆៅកើនឡើងខ្ពស់ដោយសារក្ដីកង្វល់ពីការផ្គត់ផ្គង់ ខណៈការរំខានលើការដឹកជញ្ជូននៅតែបន្តមាន

សន្ទស្សន៍តម្លៃប្រេងឆៅនាពេលអនាគតរបស់ទីផ្សារប្រេងរបស់អង់គ្លេស Brent បានកើនឡើង១៦សេនដុល្លារ ឬ០.២% គឺឡើងដល់ជាង៨២ដុល្លារ ក្នុងមួយធុងបារ៉ែល គិតត្រឹមព្រឹកថ្ងៃចន្ទ ទី២៦ ខែកុម្ភៈ ខណៈដែលសន្ទស្សន៍តម្លៃប្រេងឆៅទីផ្សារប្រេងរបស់អាម៉េរិក West Texas បានកើនឡើង១៥សេន ឬ០.២% ដូចគ្នា គឺឡើងដល់ជិត៧៨ដុល្លារ ក្នុងមួយធុងបារ៉ែល។

កត្តាដែលជំរុញឱ្យតម្លៃប្រេងឆៅកើនឡើងនេះ គឺដោយសារតែក្រុមប្រទេសនាំចូលប្រេងធំៗ និងក្រុមឈ្មួញមួយចំនួនកំពុងមានការព្រួយបារម្ភពីការបន្តការរំខានដល់ខ្សែច្រវាក់ផ្គត់ផ្គង់ប្រេងដូចជាសង្គ្រាមនៅអ៊ុយក្រែន ជម្លោះរវាងអ៊ីស្រាអែល និងក្រុមហាម៉ាស និងការគំរាមកំហែងរបស់ក្រុមឧទ្ទាមហ៊ូទីនៅសមុទ្រក្រហម ផងដែរ៕

អត្ថបទ៖ សុខ ជា