ក្រុមហ៊ុនផលិតគីមីឥន្ធនៈធំៗទូទាំងពិភពលោកកំពុងបន្តដំណើរទៅមុខយ៉ាងត្រដាបត្រដួសដោយសារវិបត្តិផ្គត់ផ្គង់លើសតម្រូវការនៅក្នុងប្រទេសចិន និងកំពុងប្រឹងសម្របខ្លួនដើម្បីសម្រាលផលប៉ះពាល់។ ក្រុមហ៊ុនផលិតគីមីឥន្ធនៈធំៗទាំងនោះ រួមមាន ទី១, ក្រុមហ៊ុនអាម៉េរិក អ៊ិចសុនម៉ូប៊ីល (ExxonMobil) ដែលបានបិទរោងចក្ររបស់ខ្លួនក្នុងប្រទេសបារាំង បន្ទាប់ពីខាតបង់ប្រាក់រហូតដល់ទៅជាង៥៤៦លានដុល្លារអាម៉េរិក ចាប់តាំងពីឆ្នាំ២០១៨ មក។
ទី២, ក្រុមហ៊ុនតៃវ៉ាន់ ហ្វ័រម៉ូសា ប៉េត្រូខេមីខល (Formosa Petrochemical) ពេលនេះដំណើរការរោងចក្រតែ១ប៉ុណ្ណោះ ក្នុងចំណោមរោងចក្រចំនួន៣របស់ខ្លួន ដោយសារតម្រូវការធ្លាក់ចុះ។ ទី៣, ក្រុមហ៊ុនអង់គ្លេស អ៊ីណូស (INEOS) បានទិញភាគហ៊ុនរបស់ក្រុមហ៊ុនបារាំង តូតាល់ (TotalEnergies) ក្នុងក្រុមហ៊ុមបុត្រសម្ព័ន្ធជាច្រើននៅបារាំង។ ទី៤, ក្រុមហ៊ុនអាម៉េរិក លីអូនដេល បេសែល (LyondellBasell) កំពុងពិនិត្យមើលឡើងវិញនូវទ្រព្យសកម្មនៅអឺរ៉ុប និងលក់ក្រុមហ៊ុនបុត្រសម្ព័ន្ធមួយនៅរដ្ឋតិចសាស ក្នុងសហរដ្ឋអាម៉េរិក តម្លៃ៧០០លានដុល្លារ។
ទី៥, ក្រុមហ៊ុនជប៉ុន មីតស៊ូអ៊ី ខេមីខល (Mitsui Chemicals) បានបិទរោងចក្រជាច្រើននៅប្រទេសជប៉ុន ហើយកំពុងពិចារណាបិទរោងចក្របន្ថែមទៀត។ ទី៦, ក្រុមហ៊ុនម៉ាឡេស៊ី ប៉េនហ្គើរ៉ាង ប៉េត្រូខេមីខល (Pengerang Petrochemical) បន្តបិទរោងចក្រដ៏ធំមួយដោយគ្មានកាលបរិច្ឆេទចាប់ផ្តើមឡើងវិញ។ ទី៧, ក្រុមហ៊ុនអារ៉ាប៊ីសាអូឌីត សាប៊ីក (SABIC) បិទរោងចក្រមួយនៅប្រទេសហូឡង់ ជាអចិន្ត្រៃយ៍។ ទី៨, ក្រុមហ៊ុនអង់គ្លេស សែល (Shell) លក់រោងចក្រចម្រាញ់ប្រេងមួយនៅប្រទេសសិង្ហបុរី និងទ្រព្យសកម្មគីមីឥន្ធនៈរបស់ខ្លួនទៅឱ្យក្រុមហ៊ុនបណ្តាក់ទុនរួមគ្នា។
ហើយទី៩, ក្រុមហ៊ុនជប៉ុន ស៊ូមីតូម៉ុ ខេមីខល(Sumitomo Chemical) លក់ភាគហ៊ុន២២,៥%នៅក្នុងក្រុមហ៊ុនបណ្តាក់ទុនរួមគ្នាមួយឱ្យទៅក្រុមហ៊ុនអារ៉ាប៊ីសាអូឌីត សូឌី អារ៉ាមកូ (Saudi Aramco) ដោយកាត់បន្ថយចំណែកភាគហ៊ុនរបស់ខ្លួនមកត្រឹម១៥%៕
ដោយ: តែម សុខុម
