តើឥណ្ឌា អាចបោះបង់ចិនទេ ស្របពេលខ្សែច្រវាក់ផ្គត់ផ្គង់ពិភពលោកកំពុងរើពីចិន ទៅកាន់ប្រទេសខ្លួន?

ក្រោយលោក ណារ៉េនដ្រា ម៉ូឌី បានបន្តដឹកនាំឥណ្ឌាក្នុងអាណត្តិទី៣ គោលនយោបាយដើម្បីលើកកម្ពស់ផលិតកម្មនៅក្នុងប្រទេសឥណ្ឌា ទំនងជានឹងមានការផ្លាស់ប្តូរ ដោយអាចផ្តោតលើការទាក់ទាញវិនិយោគិនចិនជាថ្មី។ តាមការវិភាគដោយអ្នកជំនាញការនានា បានឲ្យដឹងថា ផលិតកម្មឧស្សាហកម្មឥណ្ឌារីកចម្រើនខ្លាំងនៅប៉ុន្មានឆ្នាំចុងក្រោយនេះ ប៉ុន្តែទន្ទឹមនឹងការរីកចំរើននេះឧស្សាហកម្មរបស់ឥណ្ឌា ក៏នៅមានលក្ខណៈចន្លោះប្រហោងខ្លាំងផងដែរ។

ក្រៅពីនោះស្ថិតិវិនិយោគបរទេសរបស់ឥណ្ឌា នៅក្នុងរយៈពេល៣ខែចុងក្រោយ ពោលគឺពីខែមេសា ដល់ខែមិថុនា បានធ្លាក់ចុះដល់កម្រិតទាបបំផុតនៅក្នុងរយៈពេល២០ឆ្នាំកន្លងមកនេះ ដែលអាចធ្វើឱ្យនិន្នាការស្វាគមន៍ការវិនិយោគពីចិន ត្រូវបានលើកឡើងទាំងក្នុង និងក្រៅរដ្ឋាភិបាលរបស់លោក ម៉ូឌី។

តាមស្ថិតិដែលចេញផ្សាយដោយធនាគាររដ្ឋរបស់ឥណ្ឌា បានឲ្យដឹងថា សំណើសុំវិនិយោគរាប់រយពីក្រុមហ៊ុនចិន ដូចជាក្រុមហ៊ុនផលិតរថយន្តអគ្គិសនី BYD ត្រូវបានផ្អាក ឬច្រានចោលដោយទីក្រុងញូវដែលីក្នុងប៉ុន្មានឆ្នាំថ្មីៗនេះ ចំពេលមានការប្រឈមមុខដាក់គ្នាផ្នែកយោធា នៅតាមព្រំដែននៃប្រទេសទាំងពីរ​។ បរិមាណនៃការដាក់ស្នើនេះ ឆ្លុះបញ្ចាំងពីចំណាប់អារម្មណ៍របស់ធុរកិច្ចចិន ក្នុងការកសាងសមត្ថភាពពង្រីកទីផ្សាររបស់ពួកគេក្នុងប្រទេសឥណ្ឌា ។

ជុំវិញនិន្នាការថ្មីៗនេះ មន្ត្រីជាន់ខ្ពស់ក្រសួងពាណិជ្ជកម្មឥណ្ឌាម្នាក់បានទម្លាយឱ្យដឹងថា ការផ្លាស់ប្តូរគោលនយោបាយមួយចំនួនកំពុងដំណើរការ ស្របពេលសំណើវិនិយោគដែលរង់ចាំជាយូរមកហើយពីក្រុមហ៊ុនចិន រួមទាំងគម្រោងមួយមកពីក្រុមហ៊ុន Luxshare Precision Industry ដែលជាក្រុមហ៊ុនដំឡើងទូរស័ព្ទ iPhone ធំជាងគេទី២ ត្រូវបានអនុម័តដោយស្ងាត់ស្ងៀមក្នុងប៉ុន្មានសប្តាហ៍ថ្មីៗនេះ។

ជុំវិញបញ្ហានេះ លោក ព្រីណា ហ្គានឌី (Prerna Gandhi) សមាជិកក្រុមការងារវិភាគនៃវិទ្យាស្ថានមួយដែលមានមូលដ្ឋាននៅក្នុងទីក្រុងញូវដេលី បាននិយាយថា ចិននិងឥណ្ឌានៅតែប្រឈមបញ្ហាផ្នែកសន្តិសុខដ៏ធំ ប៉ុន្តែប្រសិនបើក្រុមហ៊ុនចិនបង្កើតទ្រព្យតាមរយៈការវិនិយោគនៅក្នុងប្រទេសឥណ្ឌា វាមិនត្រឹមតែជួយដល់កំណើនសេដ្ឋកិច្ចឥណ្ឌាប៉ុណ្ណោះទេ វាអាចកាត់បន្ថយភាពមិនសប្បាយចិត្តដ៏ធំ ដែលទាក់ទងនឹងភាពមិនស៊ីសង្វាក់គ្នាជាយុទ្ធសាស្ត្ររវាងប្រទេសទាំងពីរផងដែរ។ កាលពីឆ្នាំ២០២៣ កន្លងទៅពាណិជ្ជកម្មរវាងចិន និងឥណ្ឌាមានទំហំប្រមាណជាង១១៨ពាន់លានដុល្លារ កើនឡើងប្រមាណ៤%៕

ដោយៈ សរ សុជាតិ