តើពិតទេ ដែលថា សួនឧស្សាហកម្មនៅកម្ពុជា កំពុងស្វែងរកអ្នកជួលមកពីថៃ និងវៀតណាម?

សារព័ត៌មាន Nikkei Asia បានចុះផ្សាយថា តំបន់សេដ្ឋកិច្ចពិសេសរ៉ូយ៉ាល់ភ្នំពេញ ដែលមានទំហំជាង៣,៥គីឡូម៉ែត្រការ៉េ មានអ្នកជួលជាង៩០នាក់ មកពី១៥ប្រទេស ហើយវាជាសួនឧស្សាហកម្មឈានមុខគេមួយរបស់កម្ពុជា។ បច្ចុប្បន្នក្រុមហ៊ុនជប៉ុន និងចិន មានចំនួនពីរភាគបីនៃអ្នកជួលទាំងជាង៩០នាក់នេះ ខណៈដែលប្រទេសមានសេដ្ឋកិច្ចរីកចម្រើនទាំងពីរនេះនៅតែមានសារសំខាន់សម្រាប់ការវិនិយោគនៅសួនឧស្សាហកម្មកម្ពុជា។ ប៉ុន្តែថ្នាក់ដឹកនាំតំបន់សេដ្ឋកិច្ចពិសេសនេះបាននិយាយថា បច្ចុប្បន្នសួនឧស្សាហកម្មនេះកំពុងទាក់ទាញក្រុមហ៊ុនថៃ និងវៀតណាម ក៏ដូចជាក្រុមហ៊ុនពិភពលោកដែលផ្លាស់ប្តូរមូលដ្ឋានរបស់ពួកគេចេញពីប្រទេសទាំងពីរនេះផងដែរ។

លោក ហ៊ីរ៉ូស៊ី អូម៉ាតស៊ូ (Hiroshi Uematsu) នាយកប្រតិបត្តិនៃប្រតិបត្តិករក្រុមហ៊ុន Royal Group PPSEZ បានប្រាប់សារព័ត៌មាន Nikkei Asia ថា តាមភូមិសាស្រ្ត វាមានភាពងាយស្រួលក្នុងការបំពេញបន្ថែមខ្សែច្រវាក់ផ្គត់ផ្គង់របស់ប្រទេសថៃ ហើយក្រុមហ៊ុននេះបានព្យាយាមទាក់ទាញក្រុមហ៊ុននានាឱ្យមកកាន់សួនឧស្សាហកម្ម PPSEZ ជាមួយនឹងកម្មវិធីលក់«ថៃបូកមួយ (Thailand plus one)»។

បើតាមមន្ត្រីអាជ្ញាធររបស់កម្ពុជា បានឱ្យដឹងថា រដ្ឋមន្ត្រីការបរទេសកម្ពុជា ឯកឧត្ដម សុខ ចិន្តាសោភា និងរដ្ឋមន្ត្រីការបរទេសថៃ លោក ម៉ារីស សានហ្គៀមពុងសា (Maris Sangiampongsa) បានជួបប្រជុំគ្នានៅទីក្រុងភ្នំពេញ កាលពីថ្ងៃទី២៨ ខែមិថុនា ដោយថ្នាក់ដឹកនាំទាំងពីរបានពិភាក្សាលើការបង្កើតតំបន់សេដ្ឋកិច្ចពិសេសទៅវិញទៅមកនៅតាមខេត្តជាប់ព្រំដែន ដើម្បីពង្រឹងការតភ្ជាប់ខ្សែច្រវាក់ផ្គត់ផ្គង់ និងបង្កើតការរួមផ្សំសេដ្ឋកិច្ច៕

អត្ថបទ៖ សុខ មង្គល